تۇرعىنداردىڭ ايتۋىنشا, قازىر بوس قالعان 15 ءۇيدىڭ قۇلاپ قالۋى دا مۇمكىن. جىل سايىن كوكتەمدە اۋلالاردى, باقشالاردى سۋ باسىپ قالادى. تۇرعىندار بۇل اۋماقتا توتەنشە جاعداي جاريالاۋدى سۇراپ وتىر. بىراق, دەپارتامەنت وكىلدەرى «ازاماتتىق قورعانىس تۋرالى» زاڭىنا سايكەس, ۇيلەردى سۋ باسىپ قالۋ جاعدايىن توتەنشە جاعداي ەمەستىگىن ايتۋدا. تۇرعىندار وبلىستىق توتەنشە جاعدايلار جونىندەگى دەپارتامەنتتىڭ قورىتىندىسىمەن كەلىسپەيدى.
قالا اكىمى نۇرجان اشىمبەتوۆتىڭ ايتۋىنشا, قازىر ارنايى شتاب قۇرىلدى. اكىمدىك, كوممۋنالدىق قىزمەت وكىلدەرى, دەپۋتاتتار مەن تۇرعىندار ۇيلەردى ارالاپ, قاجەتتى زاتتاردىڭ ءتىزىمىن جاساۋدا. جەرگىلىكتى كاسىپكەرلەر 20 توننا تسەمەنت, 40 توننا كومىر, اعاش بەرۋگە ءازىر. ال «گيدروگەولوگيا» جشس-ى جەراستى سۋىنىڭ مولشەرىن باقىلاپ, سۋدى تارتىپ شىعاراتىن ۇڭعىمالار قازىپ جاتىر. كوشەلەرگە كارىز جۇيەسىن سالۋ بويىنشا جوبالاۋ قۇجاتتارىن ازىرلەۋ ءۇشىن 10 ميلليون تەڭگە كەرەك. بۇل جۇمىس تەك قازان ايىندا عانا باستالادى.
فاريدا بىقاي,
«ەگەمەن قازاقستان»
