– ول 6 مەتر قاشىقتىقتان اتقاندا ءدال تيگىزىپ, اسىقتاردى شەڭبەردىڭ سىرتىنا شاشىپ جىبەرەدى. بىراق شەڭبەردىڭ ىشىنەن اتقاندا شامالى قاتەلىكتەر جىبەرىپ الدى. وقاسى جوق, جاتتىعۋلاردا ونىڭ ادىستەرىن جەتىلدىرەمىز, سوندا دانيلگە تەڭ كەلەر ەشكىم بولمايدى, – دەپ اسىق اتۋدان وبلىستاعى اعا جاتتىقتىرۋشى كارىشال كاكەشەۆ جەلپىنىپ قويدى.
دانيل فەدوروۆ اۋدانىنداعى ۆلادىكين اۋىلىنداعى شاعىن جيناقتى ورتالاۋ مەكتەبىنىڭ التىنشى سىنىبىن ءبىتىردى. سوندا دەنەشىنىقتىرۋ پانىنەن بەرەتىن اسقار دوسانوۆ اعايى اۋىل بالالارىنا اسىق اتۋدان ۇيىرمە جۇرگىزەدى. ول ءدانيلدىڭ كىشكەنتاي كەزىنەن ەپتىلىگىن بايقاپ, ونى اۋداندىق, وبلىستىق جارىستارعا اپارا باستايدى.
– دانيل رەسپۋبليكادا اسىق اتۋ ۇلتتىق سپورتىنان وتەتىن جارىستار تاريحىندا شەبەرلىگىمەن كوزگە تۇسكەن ۇلتى قازاق ەمەس العاشقى ويىنشى. قوستانايلىق ۇلدار كومانداسى وسى جولى ءدانيلدىڭ ارقاسىندا ءۇشىنشى ورىنعا ىلىكتى. ونىڭ وزىنە اسىق اتۋ ويىنى وتە ۇنايدى, جاتتىعۋدان قالماي ۇقىپتى قاتىسادى. اسىقتى شيىرىپ اتقاندا ەكىنىڭ ءبىرىن جولدا قالدىرادى. ونەر مەن سپورت ۇلت تاڭدامايدى, – دەيدى كارىشال كاكەشەۆ.
حالقىمىزدىڭ اسىق اتۋ ۇلتتىق ويىنى يۋنەسكو-نىڭ ماتەريالدىق ەمەس مادەني قۇندىلىقتار تىزىمىنە كىرگەننەن كەيىن وبلىس اۋداندارى مەن قالالارىنداعى مەكتەپتەردە ۇيىرمەلەردە كوبەيدى. قازىر اۋىلداردا, اۋدانداردا اسىقتان جارىستار ءجيى وتەدى, ونىڭ تانىمالدىعى كەڭەيىپ كەلەدى. رەسپۋبليكالىق چەمپيوناتتا رۋدنىي قالاسىنداعى №15 ورتا مەكتەپتەن جاساقتالعان قىزدار كومانداسى ءبىرىنشى ورىندى جەڭىپ الدى. ولاردىڭ بارلىعى دا اسىق اتۋدىڭ بىلگىر جاتتىقتىرۋشىلارىنىڭ ءبىرى عالينۇر بەكتەپوۆتىڭ شاكىرتتەرى.
مىنە, ءبىر كەزدەرى قازاق مەكتەبى بولماعان كەنشىلەر قالاسىندا قازىر ۇلتتىق سپورت ويىندارى وسىلاي قاناتىن كەڭ جايىپ كەلەدى.
ءنازيرا جارىمبەت,
«ەگەمەن قازاقستان»
قوستاناي
