تاربيە جۇمىسىنىڭ تيىمدىلىگىن ارتتىرۋ ماقساتىندا قازاق ۇلتتىق اگرارلىق ۋنيۆەرسيتەتىندە 2004 جىلدان بەرى ولجاس سۇلەيمەنوۆ اتىنداعى «الەۋمەتتىك-گۋمانيتارلىق ءبىلىم بەرۋ جانە تاربيە ينستيتۋتى» جۇمىس ىستەۋدە. اقىن وسىندا وقيتىن ستۋدەنتتەرمەن ءجيى كەزدەسىپ, ءتۇرلى مادەني-كوپشىلىك, سپورتتىق شارالارعا دا ءجيى قاتىسىپ تۇرادى. وسىنداي كەزدەسۋلەر بارىسىندا كورنەكتى قايراتكەر ادەبيەت پەن مادەنيەت, ۇلتتىق پاتريوتيزم مەن بەيبىتشىلىك ماسەلەسى, ەلىمىزدىڭ ەكولوگيالىق پروبلەمالارى جانە جوعارى وقۋ ورىندارىنىڭ حالىقارالىق ءبىلىم كەڭىستىگىنە كىرۋى تۋرالى پايىمداۋلارىمەن پىكىر الماسادى.
بيىل دا ولجاس ومار ۇلى تۋعان كۇنى قارساڭىندا ءوزىنىڭ اتىمەن اتالاتىن ينستيتۋتقا كەلىپ, ۋنيۆەرسيتەتتەگى ءار ۇلتتىڭ جاستارىنان قۇرالعان ستۋدەنتتىك «دوستىق» اسسامبلەياسى مۇشەلەرىمەن كەزدەسىپ, رۋحانيات تاقىرىبىندا اڭگىمە ءوربىتىپ, پىكىر الماستى. ونەرلى جاستار ولجەكەڭنىڭ ولەڭدەرىن ءار ۇلتتىڭ تىلىندە وقىپ, شىعارمالارىنان كومپوزيتسيالىق كورىنىستەر ۇسىنىپ, كورنەكتى اقىننىڭ باتاسىن الدى.
شىعارماشىلىق كەزدەسۋدەن كەيىن ۋنيۆەرسيتەتتىڭ سپورت كەشەنىندە «ولجاس سۇلەيمەنوۆ جۇلدەسى» ءۇشىن ۆولەيبولدان ارداگەر كوماندالار اراسىندا ءداستۇرلى حII حالىقارالىق تۋرنير تارتىستى ءوتتى. ءتۋرنيردى ۇيىمداستىرۋشى – ۋنيۆەرسيتەت رەكتورى, اكادەميك تىلەكتەس ەسپولوۆ.
ولجەكەڭنىڭ قول دوبى – ۆولەيبول ويىنىنا قۇمارلىعىن ءدۇيىم جۇرت جاقسى بىلەدى. اقىن ستۋدەنتتەر اراسىندا سالاماتتى ءومىر سالتىنىڭ ۇلگىسى دە بولۋدا. ونىڭ باستاۋىمەن ۋنيۆەرسيتەتتە ارداگەرلەردىڭ كومانداسى قۇرىلىپ, باسقا وقۋ ورىندارى مەن مەكەمەلەردىڭ كوماندالارىمەن كەزدەسۋلەر وتكىزۋ داستۇرگە اينالعان.
بيىلعى تۋرنيرگە رەسەي, وزبەكستان, قىرعىزستان ەلدەرى كوماندالارىمەن قاتار, تاراز, تالدىقورعان, شىمكەنت, قاراعاندى, سەمەي, قىزىلوردا قالالارىنىڭ جانە قازاق ۇلتتىق اگرارلىق ۋنيۆەرسيتەتىنىڭ 2 ارداگەر ۆولەيبولشىلار كوماندالارى قاتىسۋدا. قالىپتاسقان ءداستۇردى بۇزباي, اقساقالدىق جاسىنا قاراماستان بۇل جارىستارعا ولجەكەڭنىڭ ءوزى دە قاتىستى.
ءۇش كۇنگە جوسپارلانعان ءتۋرنيردىڭ قورىتىندىسى بويىنشا ولجاس ومارۇلى وينايتىن قازاق ۇلتتىق اگرارلىق ۋنيۆەرسيتەتىنىڭ كومانداسى باس جۇلدەنى ولجالادى. جامبىل وبلىسىنان كەلگەن «ارداگەر» ەكىنشى ورىن السا, تالدىقورعاندىق «جەتىسۋ» ءۇشىنشى ساتىعا تۇراقتادى.
عالىم سۇلەيمەن,
«ەگەمەن قازاقستان»
الماتى
