فەستيۆالدىڭ ماقساتى – مۇراجايلار مەن عىلىمي ورتالىقتاردىڭ اراسىندا تاريحي-مادەني مۇرانى ساقتاۋ مەن ناسيحاتتاۋ بو-
يىنشا بايلانىستى جانداندىرۋ. وسى شاراعا قازاقستان رەسپۋبليكاسىنىڭ ۇلتتىق مۇراجايى, قازاقستان رەسپۋبليكاسى تۇڭعىش پرەزيدەنتىنىڭ مۇراجايى, قىزىلورداداعى قورقىت اتا مەموريالدىق مۇراجايى, وتىرار قورىق مۇراجايى, سونىمەن قاتار, قاراعاندى وبلىسىنىڭ اۋدان-قالالارىنداعى مۇراجايلار قاتىستى.
جەزقازعان تاريحي-ارحەولوگيالىق مۇراجايىنىڭ قورىندا قازىرگى ۋاقىتتا 50 مىڭنان استام جادىگەر بار. سونىڭ ون پايىزدان استامى تاريحي قۇندىلىعى اسا جوعارى, سيرەك كەزدەسەتىن, بىرەگەي دۇنيەلەر.
فەستيۆالدىڭ اشىلۋ سالتاناتىنان كەيىن «تاريحتا اتىڭدى قالدىر» اتتى اكتسياعا كەزەك بەرىلدى. وسى اكتسيا ارقىلى مۇراجاي قورى 276 جاڭا جادىگەرمەن تولىقتى. مەملەكەتتىك قىزمەت سالاسىنداعى وڭىرلىك حابتى باسقارۋشى كوميتەتتىڭ توراعاسى ءاليحان بايمەنوۆ جەزقازعان مۇراجايىنا ءفيردوۋسيدىڭ «شاحناما» داستانىنىڭ قولجازبا كۇيىندەگى تۇپنۇسقاسىن تارتۋ ەتتى.
فەستيۆالعا قاتىسۋشىلار مەن قوناقتار اعاش كوشەتتەرىن وتىرعىزدى. اشىق اسپان اياسىندا «جەزقازعان – شەبەرلەر قالاسى» اتتى جارمەڭكە-كورمە ءوتتى. كورمەگە جەرگىلىكتى قولونەر شەبەرلەرىنىڭ تۋىندىلارى مەن ەتنومادەني بىرلەستىكتەردىڭ جۇمىستارى قويىلعان.
جيىلعان قاۋىمدى ءوڭىر تاريحىمەن تەرەڭىرەك تانىستىرۋ ءۇشىن مۇراجايدا جانە جەزقازعاننان 85 شاقىرىم جەردەگى تەرەكتى اۋليە كەشەنىنە ەكسكۋرسيالار ۇيىمداستىرىلدى.
«رۋحاني جاڭعىرۋ» باعدارلاماسىن جۇزەگە اسىرۋداعى مۇراجايلاردىڭ ءرولى» اتتى عىلىمي-تاجىريبەلىك كونفەرەنتسيانىڭ جۇمىسىنا مادەنيەت جانە سپورت مينيسترلىگى زاڭ دەپارتامەنتىنىڭ ديرەكتورى كۇمىس سەيىتوۆا, قاراعاندى وبلىسىنىڭ مادەنيەت, مۇراعات جانە قۇجاتتاما باسقارماسىنىڭ باسشىسى ەركەبۇلان اعىمباەۆ, زاڭ عىلىمدارىنىڭ دوكتورى, پروفەسسور, اكادەميك جامالاددين يبراگيموۆ, «ادىرنا» ۇلتتىق-ەتنوگرافيالىق بىرلەستىگىنىڭ ديرەكتورى, ر.سۇلەيمەنوۆ اتىنداعى شىعىستانۋ ينستيتۋتىنىڭ Phd-دوكتورانتى ارمان اۋباكىر جانە باسقا دا عالىمدار قاتىستى.
فەستيۆالعا قاتىسۋشى مۇراجايلاردىڭ وكىلدەرى «كوكجيەگى كەمەل مۇراجاي» بايقاۋىندا دا بەلسەندىلىك تانىتتى. ءوز جۇمىستارىن ورتاعا سالىپ, ءبىر-بىرىمەن تاجىريبە الماستى.
فەستيۆال قورىتىندىسىندا وسى شاراعا اتسالىسقان مۇراجايلاردىڭ بارلىعى ارنايى ديپلومدارمەن, 140 مىڭ تەڭگەنىڭ اقشالاي سەرتيفيكاتتارىمەن ماراپاتتالدى.
قايرات ءابىلدا,
«ەگەمەن قازاقستان»
قاراعاندى وبلىسى,
جەزقازعان قالاسى
