ايتا كەتۋ كەرەك, «ورال ءوڭىرى» گازەتى كىشكەنتاي وقىرماندارىمەن جۇيەلى بايلانىس ورناتقان. باسىلىمدا بالالار شىعارماشىلىعىنا ارنالعان «اينالايىن» بەتى تۇراقتى جاريالانادى. ال كىشكەنتاي قالامگەرلەردىڭ شىعارماشىلىعىنا ارنالعان بايقاۋ 2002 جىلدان بەرى ءوتىپ كەلەدى. «مەكتەپتە وقىپ جۇرگەن كەزىندە وسى بايقاۋعا قاتىسىپ, جۇلدەگەر بولعان بىرنەشە جاس بۇگىندە جۋرناليستيكا سالاسىندا قىزمەت ەتىپ, ارىپتەس بولىپ ءجۇرمىز» دەيدى «ورال ءوڭىرى» گازەتىنىڭ باس رەداكتورى باۋىرجان عۇبايدۋللين.
بۇل جولعى بايقاۋ 1-6 سىنىپ ارالىعىنداعى وقۋشىلار اراسىندا ۇيىمداستىرىلىپتى. جەڭىمپاز اتانعان كىپ-كىشكەنتاي قالامگەرلەر «جايىق پرەسس» عيماراتىنا ارنايى شاقىرىلىپ, سىيلىقتارى سالتاناتتى جاعدايدا تاپسىرىلدى.
وسى شاراعا ارنايى كەلگەن اقىن, قازاقستان رەسپۋبليكاسىنىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى اقۇشتاپ باقتىگەرەەۆا جاس قالامگەرلەردى قۇتتىقتاپ, اق تىلەگىن ايتتى:
– ءبىز ءسوزدى ۇعىپ, شىعارما تۇسىنەتىن بالدىرعاندارعا ءزارۋمىز عوي. ادەبيەتكە بەيجاي قاراماي, كىتاپ-گازەت وقۋعا ىنتالى بالدىرعانداردى كورگەنىمە قۋانىپ وتىرمىن. مەن دە سەندەر سەكىلدى اۋىلدا تۋىپ-ءوستىم. العاشقى ولەڭدەرىم دە اۋىلعا ارنالدى. مىنە, ارۋ الماتىنى, اسەم استانانى تاستاپ, اق جايىققا قايتىپ ورالعانىم دا وسى تۋعان جەرگە دەگەن ماحابباتتىڭ ارقاسى, – دەدى اقۇشتاپ باقتىگەرەەۆا.
سونىمەن «ورال ءوڭىرى» گازەتىنىڭ عاسىرلىق تويىنا ارنالعان بالالار شىعارماشىلىعى بايقاۋىنىڭ جۇلدەسىن ءوڭىردىڭ زەلەنوۆ اۋدانىنداعى وركەن مەكتەپ بالاباقشا كەشەنى وقۋشىسى راۋكەن زايدۋللين, شىڭعىرلاۋ اۋدانى اقتاۋ اۋىلى مەكتەبى وقۋشىلارى رايحان تاسەمەن مەن شەرحان قايدارعالي, ءبورلى اۋدانى گريگورەۆ مەكتەپ-بالاباقشا كەشەنىنىڭ 4-سىنىپ وقۋشىلارى گۇلايحان عانيەۆا, ەركەبۇلان شاريبدانوۆ, ايكوركەم قاناپيا جەڭىپ الدى. ولاردىڭ ارقايسىسىنا ارنايى ديپلوم, اقشالاي سىيلىق, سپورتتىق بۇيىمدار جانە كىتاپتار توپتاماسى سىيعا بەرىلدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
