بۇگىندە تەحنولوگيا كۇن سايىن وزگەرگەن زامان عوي. جاڭا قوجايىن بىردەن كاسىپورىننىڭ ميللياردتاعان قارىزىن وتەپ, ءوندىرىستى تەحنيكالىق جاڭعىرتۋ جۇمىستارىن قولعا العان ەدى. جاڭعىرتۋ جۇمىستارىنا بارلىعى 2 ملرد 300 ملن تەڭگە قارجى جۇمسالىپتى.
– جاڭادان ورناتىلعان ەۋروپالىق قۇرال-جابدىقتار مەن زاماناۋي تەحنولوگيا ءوندىرىس كولەمىن ەكى ەسەگە ارتتىرۋعا مۇمكىندىك بەرەدى. بۇرىن جىلىنا 20 مىڭ توننا شيكىزات وندىرىلسە, قازىر ول 45 مىڭ توننانى قۇرايدى. زاۋىتتا بۇرىن مايلى داقىلداردان تەك 30 پايىز عانا ماي الىناتىن. جاڭا جەلىلەر 43 پايىزعا دەيىن ماي الۋعا مۇمكىندىك بەرەدى. بۇرىنعى ءتورت وندىرىستىك تسەح جەلىسى جاڭا ءتورت تسەحپەن تولىقتى. ونىڭ ىشىندە شيكىزاتتى دايىندايتىن, ءداندى سىعىمداپ تازارتاتىن, ەكستراكتسيالايتىن زاماناۋي جەلىلەر بار. دانىنەن اجىراتىلعان كۇنباعىس قابىعىن جاعىپ, ودان بۋ وندىرەمىز. ياعني مايلى داقىلدان ماي الۋ بارىسىندا گاز نەمەسە كومىر وتىنى قولدانىلمايدى. قازىر الىپ بۋ قازاندىعى قۋاتىنىڭ تەك وتىز پايىزىن عانا قولدانىپ وتىرمىز. بولاشاقتا بۋ قورىن جىلىجاي شارۋاشىلىعى مەن مال ازىعىن دايىنداۋدا پايدالانۋعا بولادى, – دەيدى مۇرات جاكىباەۆ.
ەكىنشى تىنىسى اشىلعان كاسىپورىننىڭ جۇمىس بارىسىمەن تانىسقان وبلىس اكىمى التاي كولگىنوۆ كاسىپورىن باسشىسىمەن, تەحنولوگ ماماندارمەن, جۇمىسشىلارمەن پىكىرلەسىپ, مامانداردى دايىنداۋ, قىزمەتكەرلەردىڭ بىلىكتىلىگىن ارتتىرۋ, جالاقىنىڭ ۋاقتىلى تولەنۋى جانە شيكىزات الۋدا جەرگىلىكتى تاۋار وندىرۋشىلەرگە باسىمدىق بەرۋ ماسەلەلەرىن تالقىلادى.
– مەملەكەتتىڭ قولداۋىمەن كاسىپورىندا ەكى جىل بويى قىرۋار جۇمىس اتقارىلدى. جاڭا تەحنولوگيا تارتىلىپ, كوپ قاراجات قۇيىلدى. ەندى وزىمىزگە قاجەت ءونىمدى شىعارۋ, وعان قوسا ەكسپورتقا جونەلتۋ كەزەك كۇتتىرمەيتىن ماڭىزدى ماسەلە. بولاشاقتا كاسىپورىن جۇيەلى جۇمىس جاسايدى دەپ سەنەمىز, – دەدى ءوڭىر باسشىسى.
زاۋىتتا كۇنباعىس مايىنىڭ تازارتىلعان, يىسسىزدەندىرىلگەن, مۇزداتىلعان جانە رافينادتالماعان تۇرلەرى شىعارىلادى. كاسىپورىن ءونىمى باتىس قازاقستان, اقتوبە جانە اتىراۋ وبلىستارىنىڭ ساۋدا ورىندارىنا كوتەرمە باعامەن ءبىر ءليترى 260-265 تەڭگەگە ساتىلۋدا. جۋىردا «بەلەس» كۇنباعىس مايىنىڭ العاشقى 50 تونناسى وزبەكستان رەسپۋبليكاسىنا جونەلتىلگەن.
ماي زاۋىتىندا 105 ادام تۇراقتى جۇمىس ىستەيدى. ولاردىڭ كوبى – جەرگىلىكتى تۇرعىندار. 2017 جىلى جەرگىلىكتى ديقانداردان 13 مىڭ توننا كۇنباعىس داقىلى ساتىپ الىنعان.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
