مادەنيەت جانە سپورت مينيسترلىگى مەن سىرتقى ىستەر مينيسترلىگىنىڭ بىرلەسكەن جوباسىنىڭ ماقساتى – دۇنيە ءجۇزىنىڭ ءىرى بۇقارالىق اقپارات قۇرالدارى ورتالىقتارىنان كەلگەن جۋرناليستەرگە ەلباسىنىڭ «رۋحاني جاڭعىرۋ» باعدارلامالىق ماقالاسىنىڭ نەگىزگى تارماعىنىڭ ءبىرى – «جاھاندىق الەمدەگى زاماناۋي قازاقستاندىق مادەنيەت» جوباسى اياسىندا قازاق مادەنيەتى مەن ونەرىن تانىستىرۋ جانە ناسيحاتتاۋ.
– ەلىمىزدىڭ تاريحى مەن مادەنيەتىنە, ونەرىنە وزدەرىنىڭ ۇلكەن قىزىعۋشىلىعىن تانىتىپ, مىنە الەمدەگى ەڭ ءىرى اقپارات ورتالىقتارىنىڭ جۋرناليستەرى استاناعا كەلىپ جاتىر. بۇل بىزگە ماقتانىش سەزىمىمەن قاتار, ۇلكەن جاۋاپكەرشىلىك تە جۇكتەيدى. سەبەبى وسى ءساتتى پايدالانىپ شەتەلدىك جۋرناليستەر نازارىنا بارلىق جەتىستىگىمىز بەن جەڭىسىمىزدى ءوز دەڭگەيىندە كورسەتىپ, ءتۇسىندىرۋ قاجەتتىلىگى تۋىندايدى. ال تاۋەلسىزدىك العان كەزدەن باستاپ ىسكە اسىپ جاتقان ونداي جەتىستىكتەر ءبىزدىڭ ەلىمىزدە جەتەرلىك. سونىڭ ءبىرى – ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسى. اتالعان باعدارلاما اياسىندا ومىرگە كەلگەن «جاھاندىق الەمدەگى زاماناۋي قازاقستاندىق مادەنيەت» جوباسى نەگىزىندە جۇرگىزىلىپ جاتقان ءىس-شارالار الەمنىڭ تۇكپىر-تۇكپىرىنەن جينالعان باق وكىلدەرىنىڭ نازارىنا ۇسىنىلاتىن, تانىستىرىلاتىن بولادى, – دەدى ارىستانبەك مۇحامەدي ۇلى.
ءىس-شارا بارىسىندا شەتەلدىك باق وكىلدەرى ءۇشىن مادەنيەت جانە سپورت ءمينيسترى ارىستانبەك مۇحامەدي ۇلى «رۋحاني جاڭعىرۋ» باعدارلاماسىن شەتەلدە ىلگەرىلەتۋ ماقساتىندا وسى باعىتتا اتقارىلىپ جاتقان جۇمىستاردى تانىستىردى. سونىڭ ىشىندە, اسىرەسە قازاق تەاترى مەن كينوسىنىڭ الەم كورەرمەنىنە تانىستىرىلۋ مەن ناسيحاتتالۋى جايىندا كەڭىنەن اڭگىمە ءوربىدى. جاھان نازارىن وزىنە اۋدارىپ, الەمدى تاڭداي قاقتىرىپ جۇرگەن تالانت ديماش قۇدايبەرگەن, كۇنى كەشە كانن فەستيۆالىندە توپ جارعان ۇزدىك اكتريسا سامال ەسلياموۆانىڭ جەتىستىكتەرى تانىستىرىلىپ, جالپى قازاق ونەرىنىڭ دامۋ بارىسىنا باعا بەرىلدى. سونداي-اق مينيستر جۋرناليستەردىڭ لاتىن گرافيكاسى مەن تۋريزمگە قاتىستى سۇراقتارىنا دا جان-جاقتى جاۋاپ بەردى. الداعى ۋاقىتتا شىعارماشىلىق مادەني بايلانىستى بۇدان ءارى نىعايتۋعا ءوز ۇسىنىسىن ءبىلدىردى. «جاھاندىق الەمدەگى زاماناۋي قازاقستاندىق مادەنيەت» ءباسپاسوز تۋرىنىڭ اياسىندا قوناقتار كيەلى ماڭعىستاۋ جەرىنە بارىپ, قاسيەتتى ولكەنىڭ تاريحي جەرلەرىمەن تانىساتىن بولادى.
بۇل كەزدەسۋ قازاقستاندىق مودەلدى اشىق تالقىلاۋعا شىعارۋ ارقىلى ءبىر جاعىنان كونسترۋكتيۆتى وي-پىكىرلەر مەن جاڭا يدەيالاردىڭ تۋىنداۋىنا نەگىز قالاسا, ەكىنشى جاعىنان حالىقارالىق قوعامداستىق قازاقستاندىق باعدارلامادا بەكىتىلگەن دامۋدىڭ پايدالى جولدارى مەن ونى قولدانۋدىڭ الەۋەتىن كەڭىنەن پايدالانۋعا مۇمكىندىك بەرەدى دەپ كۇتىلۋدە.
نازەركە جۇماباي,
«ەگەمەن قازاقستان»
