پالاتا سامميتكە 15-كە جۋىق سالا مەكەمە وكىلدەرىن باستاپ باردى. قازاقستان ساراپتاما ۇيىمدارى پالاتاسىنىڭ باسقارما توراعاسى بىرلىك ەرەجەپوۆ جيىندا الەمنىڭ ءار ايماعىنان جينالعان قۇرىلىس شەبەرلەرىنە كاسىبي بىرلەستىك جۇمىسىن تانىستىرىپ, ەلباسى نۇرسۇلتان نازارباەۆتىڭ ەلوردانىڭ كەلبەتىندە ەڭ سوڭعى ۇزدىك قالا قۇرىلىسى مەن ساۋلەت ونەرى جاڭالىقتارى كورىنىس تاپقانىن ءجىتى قاداعالايتىنىن ايتتى. سونىمەن قاتار پالاتا توراعاسى, ەلىمىزدەگى قۇرىلىس قارقىنىنىڭ ەكونوميكاعا دا سونى سەرپىن بەرىپ وتىرعانىن اتاپ ءوتتى.
«استانا قازاقستاننىڭ الىپ قۇرىلىس الاڭى ىسپەتتى. وندا بىرەگەي ساۋلەت ونەرىنىڭ قولتاڭباسى سەزىلىپ تۇرادى. تورتكۇل دۇنيەنىڭ ەڭ بىلىكتى ساۋلەتشىلەرى مەن ينجەنەرلەرى ءۇشىن باس قالامىزدىڭ قۇشاعى ءاردايىم اشىق», – دەي كەلە, ب.ەرەجەپوۆ نورمان فوستەر, مانفرەدي نيكولەتتي سياقتى اتاقتى ساۋلەتشىلەردىڭ استانا قالاسىنداعى بىرەگەي جوبالارىنا توقتالدى.
بۇل اقپاراتقا يسپاندىق مامانداردىڭ قىزىعۋشىلىعى زور بولدى. سەبەبى سانتياگو كالاتراۆا مەن ريكاردو بوفيلل ىسپەتتى يسپانيانىڭ بەدەلدى ساۋلەتشىلەرى ەلباسىنا قالا اۋماعىن دامىتۋ جونىندەگى ءوز تۇجىرىمدارىن ۇسىنعانى بەلگىلى.
سامميت بارىسىندا جوبالاۋ جانە ساراپتاما قىزمەتى بويىنشا ءتورت جۇمىس سەسسياسى ءوتتى. اتالعان كەزدەسۋلەرگە قاتىسۋشىلار ماڭىزدى ماسەلەلەرگە بايلانىستى جەمىستى سۇحبات قۇرىپ, قوس تاراپ قۇرىلىس سالاسىنداعى رۇقسات بەرۋ قاعازدارىن كەلىسىمدەۋ, قىزمەتتى ساقتاندىرۋ ءتارىزدى وزەكتى ماسەلەلەردى تالقىلادى.
قازاقستاندىق قوناقتار يسپانيانىڭ قۇرىلىس ساراپشىلارىن وزىندىك كاسىبي كەڭىستىككە بىرىكتىرۋ تاجىريبەسىن زەردەلەپ, ساۋلەتشىلەر فران سيلۆەستەر مەن حوسە ماريا توماس لياۆادوردىڭ كەڭسە-ستۋديالارىندا بولدى. ماسەلەن العاشقىسىنىڭ ءتول جوباسى بويىنشا سالىنىپ جاتقان «Casa Hofmann» تۇرعىن ۇيىندە ىشكى جايلار مەن سىرتقى ورتانىڭ قازىرگى زامانعى ۇيلەسىمى ويلاستىرىلعان. بۇل جەردە قازاقستان وكىلدەرى نىساندى تۇرعىزۋداعى وزىق تەحنولوگيالار جانە ماتەريالدارمەن تانىستى.
ۆەنەرا تۇگەلباي,
«ەگەمەن قازاقستان»
