اكتسيانىڭ باستى ماقساتى - وبلىس ورتالىعىنان شالعايدا ورنالاسقان اۋىل مەكتەبىنىڭ ماتەريالدىق جانە ادىستەمەلىك بازاسىن نىعايتۋعا كومەك كورسەتىپ, زياتكەرلىك مەكتەپ تاجىريبەسىن تاراتۋ.
شارا بارىسىندا ەڭ الدىمەن مەكتەپ باسشىسى ەرمەك پايزوۆ ءسوز الىپ, جينالعانداردى نازارباەۆ زياتكەرلىك مەكتەپتەرىنىڭ ەرەكشەلىكتەرىمەن تانىستىرىپ ءوتتى. سودان سوڭ, مەكتەپ ديرەكتورىنىڭ تاربيە ءىسى جونىندەگى ورىنباسارى التىنزەر يحسانوۆا قازاقستاندىق پاتريوتيزم جانە ازاماتتىق جاۋاپكەرشىلىك قۇندىلىعىنا سايكەس بالالاردى الەۋمەتتىك جوبالار ارقىلى تاربيەلەۋ تۋرالى جانە «ەكى اپتا اۋىلدا», «تۋعان ەلگە تاعزىم» جوبالارى تۋرالى ايتتى.
- نازارباەۆ زياتكەرلىك مەكتەپتەرىنىڭ بيىل قۇرىلعانىنا 10 جىل.وسى اكتسيانى وتكىزىپ, سىزدەرگە كورسەتۋدەگى ماقساتىمىز بىزدەر جۇزەگە اسىرعان جوبالاردى جاساۋ سىزدەردىڭ دە قولدارىڭىزدان كەلەتىندىگىن كورسەتۋ, دەيدى مەكتەپ ديرەكتورىنىڭ ورىنباسارى.
كەيىن مەكتەپ دالىزىنە زياتكەرلىك مەكتەپتەردەگى ءبىلىم بەرۋ جۇيەسىنىڭ ەرەكشەلىكتەرى تۋرالى باياندالعان ونەر ءپانى مۇعالىمدەرى جانە مەكتەپ كىتاپحاناشىلارى دايىنداعان ارنايى ستەند ورناتىلدى.
ونەر ءپانىنىڭ مۇعالىمى جۇلدىزاي ۇزاقباەۆا باستاۋىش سىنىپ مۇعالىمدەرىنە تاسقا سۋرەت سالۋ ونەرىن ساباقتا قولدانۋ ءادىسىن, ال قازاق ءتىلى مەن ادەبيەتى ءپانى مۇعالىمى نۇرگۇل ايتمۇحان «تىلدىك داعدىلاردى مەڭگەرتۋدىڭ ادىستەرى» تاقىرىبىندا شەبەرلىك ساعاتىن وتكىزدى. گەوگرافيا ءپانىنىڭ مۇعالىمى ەرلان سەيتوۆ گۋماني-تارلىق پاندەر مۇعالىمدەرىنە گەوگرافيانى وقىتۋدىڭ جاڭا ادىستەرىن كورسەتتى. فيزيكا ءپانى مۇعالىمى دامير ەركماليەۆ پەن ينفورماتيكا ءپانىنىڭ مۇعالىمى ايزادا نۇرلانوۆا ناقتى عىلىمدار پاندەرىنىڭ مۇعالىمدەرى ينفورماتيكا مەن فيزيكانى كىرىكتىرىپ وقىتۋدىڭ اتىقشىلىقتارى مەن ەرەكشەلىكتەرىن ايتتى.
اقتاۋداعى نازارباەۆ زياتكەرلىك مەكتەبىندەگى كىتاپحانا ءرولى ەرەكشە. مۇنداعى كىتاپحاناشىلار بالالاردى كىتاپ وقۋعا باۋلىپ, مۇعالىمدەردى قاجەتتى وقۋلىقتارمەن قامتاماسىز ەتۋدە جانە نەگىزگى وقۋلىقپەن قوسا ساباق پروتسەسىنە تىكەلەي ارالاسىپ وتىرادى. سونىمەن قاتار, كىتاپ وقۋعا شاقىراتىن ءتۇرلى الەۋمەتتىك جوبالارى وقۋشىلار اسىعا كۇتەتىن شاراعا اينالدى. مەكتەپ كىتاپحاناشىسى دينارا قايراتبەكقىزى «Bookrossing» جوباسىن تانىستىرىپ, مەكتەپ مۇعالىمدەرى, وقۋشىلارى جيناعان, پەداگوگيكالىق شەبەرلىك ورتالىعى بولىسكەن ادىستەمەلىك كىتاپتاردى مەكتەپ كىتاپحاناشىسىنا تابىستادى.
وقۋشىلاردىڭ ءوزىن-ءوزى باسقارۋ ۇيىمىنىڭ بەلسەندى مۇشەلەرى ازيزا جۇباەۆا مەن نەسىبەلى التىباي جەتىبايلىق وقۋشىلارعا ءوزىن-ءوزى باسقارۋ ۇيىمىنىڭ ءرولى جانە ەرەكشەلىكتەرى تۋرالى ايتىپ بەردى. -زياتكەرلىك مەكتەپتەر 10 جىلدىق مەرەيتويلارىن تويلاپ جاتسا, ءبىزدىڭ مەكتەبىمىز بيىل 50 جىلدىق مەرەيتويىن تويلاماق. وسىنداي ايتۋلى مەرەكەمىزگە كەرەمەت سىيلىق جاساعان زياتكەرلىك مەكتەپ ۇجىمىنا العىسىمىزدى بىلدىرەمىز, - دەدى №8 ورتا مەكتەپ ديرەكتورى سارا تۇراباەۆا. ول اقتاۋ قالاسىنداعى نازارباەۆ زياتكەرلىك مەكتەبى مەن پەداگوگيكالىق شەبەرلىك ورتالىعىنىڭ ماماندارىنا وقۋ ورنى اتىنان العىس حات تابىستادى.
مەكتەپ ديرەكتورىنىڭ سوزىنشە, زياتكەرلىك مەكتەپ وقۋشىلارى وزدەرى باپستاپ وسىرگەن 100 گۇلدى بيىل عيماراتتا اشىلعان سۋبۇرقاق جانىن كوركەيتۋ ماقساتىندا پايدالاناتىن بولادى.
سونداي-اق, اقتاۋداعى پەداگوگيكالىق شەبەرلىك ورتالىعىنىڭ ترەنەرلەرى اۋىل مەكتەبىنىڭ ۇستازدارىنا جاڭارتىلعان ءبىلىم مازمۇنى مەن كريتەريالدى باعالاۋدان, وقىتۋدىن ادىستەرىمەن تەحنولوگيالارىنا قاتىستى ادىستەمەلىك كونسۋلتاتسيالار ۇيىمداستىرىپ, شەبەرلىك ساعاتتارىن وتكىزدى.
ايتا كەتەيىك, اكتسيا ەلىمىزدىڭ 16 وڭىرىندە ءوتتى. جوبا شەڭبەرىندە نازارباەۆ زياتكەرلىك مەكتەپتەرى 20 اۋىل مەكتەبىنە زياتكەرلىك مەكتەپتەرىنىڭ وقۋشىلارى مەن مۇعالىمدەرى جيناعان 6 875 دانا كوركەم جانە عىلىمي-تانىمدىق ادەبيەت, وقۋشىلار وسىرگەن 2 000 ءتۇپ گۇل, دببۇ ورتالىقتىرى (وبو, پشو, ءپوو) جاساعان 860 دانا مۇعالىمدەرگە ارنالعان ادىستەمەلىك نۇسكاۋلار, الماتى قالاسىنداعى نزم وقۋشىلارى جاساعان 20 3D پرينتەر, 20 ستەند, 300 سپورتتىق دوپ سىيلادى. سپورتتىق دوپتى الۋعا «كازتسينك» مەكەمەسى دەمەۋشىلىك كورسەتتى. اكتسيانىڭ جاناشىرلارى «كازتسينك» جشس 300 سپورتتىق دوپ ساتىپ الۋعا دەمەۋشىلىك جاسادى, ۇلتتىق قۇندىلىقتاردى دامىتۋ «ابىروي» جەكە قورى جانە جەكسەنباي ب. ن., قازاقستان رەسپۋبليكاسى تۇنعىش پرەزيدەنتىنىڭ كىتاپحاناسى, «دەلوۆوي مير استانا» باسپاسى اۋىل مەكتەپتەرىنە 1 204 دانا كوركەم ادەبيەت سىيعا تارتتى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
