گفر ءبىلىم جانە مادەنيەت مينيسترلەر كەڭەسى نەمىس ەلىنىڭ جوعارى وقۋ ورىندارىنا نازارباەۆ زياتكەرلىك مەكتەپتەرىنىڭ تۇلەكتەرىنە ارنالعان ارنايى نۇسقاۋلىق جىبەردى. كەڭەس زياتكەرلىك مەكتەپتەر تۇلەكتەرىنىڭ سەرتيفيكاتىن گەرمانيانىڭ جوعارى وقۋ ورىندارىندا تىكەلەي ءبىلىم الۋعا جارامدى دەپ تاپتى. بۇل تۋرالى گفر-دىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى رولف مافاەلدىڭ «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى باسقارماسىنىڭ ءتورايىمى كۇلاش شامشيدينوۆاعا جولداعان رەسمي حاتىندا جازىلعان. حاتتا نەمىس ۋنيۆەرسيتەتتەرى ستۋدەنتتەردى قابىلداۋ تۋرالى شەشىم قابىلداۋدا تاۋەلسىز ەكەندىگى تۇسىندىرىلگەن. الايدا, ءبىلىم جانە مادەنيەت مينيسترلىگىنىڭ جانىنداعى تۇراقتى كونفەرەنتسيانىڭ كەڭەسى نۇسقاۋلىق نەگىزىندە شەتەلدىك مەكتەپ سەرتيفيكاتتارىن تانۋ تۋرالى ءوز ۋنيۆەرسيتەتتەرىنە ۇسىنىس جاساۋعا قۇقىلى.
رولف مافاەلدىڭ حاتىنا سايكەس NIS Grade 12 Certificate ماتەماتيكا, تەحنيكا, عىلىم, مەديتسينا, قوعامدىق, الەۋمەتتىك, ەكونوميكالىق, ءتىل سالالارىندا, سونداي-اق سپورت جانە ونەر ماماندىقتارى بويىنشا جوعارى وقۋ ورىندارىندا سالالىق وقىتۋعا مۇمكىندىك بەرەدى. بۇل زياتكەرلىك مەكتەپتەردىڭ تۇلەكتەرى گەرمانيانىڭ جوعارى وقۋ ورىندارىنا Foundation كۋرسىن وقۋسىز, تىكەلەي ءبىرىنشى كۋرسقا قابىلدانادى دەگەن ءسوز. اتالعان نۇسقاۋلىق 2018 جىلعى جازعى سەمەستردەن باستاپ كۇشىنە ەنەدى. نەمىس كەڭەسىنىڭ شەشىمى زياتكەرلىك مەكتەپتەردىڭ حالىقارالىق جەتىستىكتەرىن راستاپ, قازاقستاندىق-گەرماندىق ءبىلىم بەرۋ جانە گۋمانيتارلىق ىنتىماقتاستىقتى دامىتۋ ءۇشىن جاڭا ساتىلارعا جول اشادى.
