بۇگىندە اتالمىش نىسان تۋريستەردى قابىلداۋعا اشىق. توكاماك قتم جوباسى استانادا وتكەن «ەكسپو-2017» كورمەسىنىڭ باستى ەكسپوناتى بولدى. قازاقستاندىق ماتەريالتانۋ توكاماگى (قتم) ەلدە عىلىم مەن تەحنولوگيانى دامىتۋ جانە عىلىمي-ينجەنەرلىك سالالاردا جوعارى بىلىكتى كادرلارىن دايىنداۋ ماقساتىندا قر پرەزيدەنتى نۇرسۇلتان نازارباەۆتىڭ شەشىمىمەن قۇرىلعان. الداعى ۋاقىتتا قازاقستاننىڭ بالالارى كۋرچاتوۆتاعى ۇلتتىق يادرولىق ورتالىق پەن پوليگون وتكەن ولكەگە كەلە الادى. «رۋحاني جاڭعىرۋ» باعدارلاماسى اياسىندا ەلدەگى بولاشاق عالىمدار مەن دارىندى بالالار قازاقستاندىق ماتەريالتانۋ توكاماگىمەن (قتم) تانىسا الادى.
-بۇل تۋرالى بۇگىن «نۇر وتان» پارتياسى فيليالىنىڭ ساياسي بيۋرو وتىرىسىندا ايتىلدى,-دەدى شقو ءباسپاسوز قىزمەتىنىڭ ماماندارى,-كۇن تارتىبىنە سايكەس «رۋحاني جاڭعىرۋ» باعدارلاماسىنىڭ جۇزەگە اسۋ بارىسى تۋرالى كۋرچاتوۆ قالاسى مەن زايسان جانە ۇلان اۋداندارىنىڭ اكىمدەرى بايانداما جاسادى. اتالعان بارلىق وڭىرلەردە بۇقارانى رۋحاني جاڭعىرتۋ باعىتىندا قىرۋار ءىس اتقارىلىپ, مەجەگە الىنعان مىندەتتەر لەگى جەتەرلىك. ماسەلەن, ۇلان اۋدانىنىڭ اكىمى جازدا 1719 بالا شىمكەنت – سايرام - تۇركىستان – تارازدا, سونداي-اق, كاتون-قاراعاي ۇلتتىق پاركىندە بولىپ, ەلدەگى كيەلى جەرلەردى ارالاماق. بۇدان بولەك ەلوردا – استاناعا اپارۋ جوسپارى بار. ال كۋرچاتوۆ قالاسى «جاس فيزيك-2018» جازعى مەكتەبىن ۇيىمداستىرىپ وتىر. الايدا فيليال توراعاسى - وبلىس اكىمى دانيال احمەتوۆ قولدا «گاۋھار تاس» - توكاماك (قتم) پەن ۇلتتىق يادرولىق ورتالىق تۇرعاندا كۋرچاتوۆ جوبالار شەڭبەرىن كەڭەيتۋ قاجەتتىگىن نىقتادى.
– الەمدە بار-جوعى ەكى توكاماك بار. ونىڭ بىرەۋى قايدا؟ كۋرچاتوۆتا. 4 يادرولىق رەاكتور مەن پوليگون تۇر,-دەدى وبلىس اكىمى دانيال احمەتوۆ,-ولاي بولسا, شىعىس قازاقستان مەن بۇكىل ەلىمىزدىڭ بالالارى توكاماكتىڭ نە ەكەنىن ءبىلۋى ءۇشىن نە ىستەۋ قاجەتتىگىن قاراستىرايىق. ولار كەڭەس وداعىنان قالعان مۇرانىڭ قاتىگەزدىك قارۋى ەكەنىن جانە ونى بەيبىتشىلىك جولدا قولدانۋدىڭ دۇرىستىعىن ءتۇسىنسىن. سەمەي يادرولىق سىناق پوليگونىن جابۋ تۋرالى ەلباسى نۇرسۇلتان نازارباەۆ قابىلداعان تاريحي شەشىمنىڭ ماڭىزدىلىعىن ۇعىنسىن. وسى رەتتە ارنايى باعدارلاما دايىنداۋدى تاپسىرامىن. بۇكىل قازاقستاننىڭ بالالارى كەلىپ, توكاماك تاجىريبەسىمەن تانىسۋى قاجەت. يادرولىق ورتالىققا, پوليگون وتكەن ايماققا ەكسكۋرسياعا بارىپ, بۇگىنگى كەلىسىمدەر تۋرالى اقپاراتپەن قامتىلسىن.
راۋشان نۇعمانبەكوۆا,
سەمەي
