وبلىس اكىمى كەزدەسۋ بارىسىندا وبلىستاعى جاستار ساياساتىنىڭ ىسكە اسىرىلۋى تۋرالى ايتىپ بەردى. بەردىبەك ساپارباەۆ مەملەكەت بارلىق قازاقستاندىق جاستاردىڭ باسەكەگە قابىلەتتىلىكتەرىن ارتتىرۋعا جانە قولداۋ باعىتىنا بارلىق مۇمكىندىكتەردى جاسايتىنىن اتاپ ءوتتى.
- ەلباسىنىڭ جاقىندا كوتەرگەن بەس الەۋمەتتىك باستامالارىنىڭ ءبىرى وسىعان دالەل بولا الادى. ەلباسىنىڭ باستاماسى اياسىندا جوعارى وقۋ ورىندارىنا قولجەتىمدىلىكتى ارتتىرۋعا 20 مىڭ قوسىمشا گرانتتار بولىنگەن بولاتىن. تاعى ءبىر باستاما باسپانامەن قامتاماسىز ەتۋ ءۇشىن يپوتەكالىق قارىزدىڭ پايىزدىق ستاۆكاسىن ەداۋىر تومەندەتۋگە جانە تولەۋ مەرزىمىن ۇزارتۋعا باعىتتالادى. باسقا باستامالار بويىنشا اقتوبە وبلىسىندا جوعارى جانە ارناۋلى وقۋ ورىندارىنىڭ ستۋدەنتتەرى ءۇشىن 8 جاتاقحانا تۇرعىزۋ جوسپارلانىپ وتىر, - دەدى ايماق باسشىسى.
ول اقتوبەلىك ستۋدەنتتەرگە ءوڭىردىڭ قوعامدىق ءومىرى مەن «جاسىل ەل» سەكىلدى مەملەكەتتىك باعدارلامالارعا بەلسەندى تۇردە قاتىسقاندارى ءۇشىن العىس ايتتى. ايتا كەتەيىك, بىلتىردان بەرى وبلىسىمىزداعى ستۋدەنتتىك وتريادتار جىل بويى جۇمىس جاساپ كەلەدى. وسى جىلى 6 مىڭعا جۋىق جاس ەڭبەك ەتەدى دەپ جوسپارلانىپ وتىر.
- مەملەكەت بەرىپ تۇرعان مۇمكىندىكتى پايدالانىڭىزدار. جاستاردىڭ قاشان دا يدەياسى كوپ, سولاردى باتىل جۇزەگە اسىرىڭىزدار. جاستار ءىسى جونىندەگى كەڭەس, جاس عالىمدار كەڭەسى سول ءۇشىن قۇرىلدى. بۇعان قوسا جاستار سەنگىش كەلەدى. بىرەۋدىڭ ايتقانىمەن جۇرمەس بۇرىن «بۇل مەن ءۇشىن, حالقىم ءۇشىن, ەلىم ءۇشىن قاجەت پە نەمەسە پايدالى ما؟» دەگەن جالعىز سۇراقتى قويىڭىز. قاشان ء«يا» دەپ جاۋاپ بەرسەڭىز, سوندا عانا ءىستى قولعا الىڭىز. مەملەكەت ارقاشان قولداپ, سىزدەرگە ۇلكەن ءۇمىت ارتادى, سىزدەردىڭ مىندەتتەرىڭىز – سونى اقتاۋ,-دەدى بەردىبەك ساپارباەۆ جاس اقتوبەلىكتەرگە قاراتا ايتقان سوزىندە.
شارا كەزىندە از قامتىلعان وتباسىدان شىققان وقۋدا, عىلىمدا, مادەنيەت پەن سپورتتا جەتىستىكتەرىمەن ەرەكشەلەنگەن 158 ستۋدەنتكە وبلىس اكىمىنىڭ اتاۋلى ستيپەندياسى تابىستالدى. جوعارى وقۋ ورىندارىنداعى 122 ستۋدەنتتىڭ شاكىرتاقىسى 160 000 تەڭگەنى, وبلىس كوللەدجدەرىندە وقىپ جاتقان 36 بالانىڭ شاكىرتاقىسى 80 000 تەڭگەنى قۇرادى.
تەمىر قۇسايىن,
“ەگەمەن قازاقستان”
