ەۋروپارلامەنت مۇشەلەرى Facebook ديرەكتورى مارك تسۋكەربەرگكە ءبىر ساعاتقا سوزىلعان جيىن بارىسىندا مالىمەتتەر قاۋىپسىزدىگى, دەزينفورماتسيا, مونوپوليا تۋرالى سۇراقتار قويدى.
تسۋكەربەرگ مالىمەتتەر قاۋىپسىزدىگى تۋرالى ايتا كەلە Facebook قولدانۋشىلاردىڭ جەكە اقپاراتتارىن سۇرايتىن مىڭداعان قوسىمشالارمەن جۇمىس ىستەيتىنىن, بۇل ماسەلەنى شەشۋ ءۇشىن ازداعان ۋاقىت كەرەك ەكەنىن ايتتى. ال تەررورعا قاتىسى بار اككاۋنتتار ارنايى كومپيۋتەرلىك جۇيەلەر ارقىلى اۆتوماتتى تۇردە ءوشىرىلىپ وتىراتىنىن ايتتى. "دەزينفورماتسياعا كەلەر بولساق, Facebook جالعان اقپارات تاراتاتىن ادامداردىڭ ەكونوميكالىق ستيمۋلىن انىقتاۋعا تىرىساتىن بولادى", دەدى ول.
ەۋروپارلامەنت مۇشەلەرى Facebook كومپانياسىنداعى مونوپوليالىق بيلىك تۋرالى دا سۇراقتار قويدى. مانفرەد ۆەبەر "مونوپوليانى جويۋ كەرەك. Facebook-ءتى بىرنەشە ءىرى كومپانياعا بولەتىن ۋاقىت جەتتى دەپ ويلايمىن", دەدى. بۇعان جاۋاپ رەتىندە مارك تسۋكەربەرگ Facebook كومپانياسىنىڭ الەمدىك جارنامانىڭ 6 پايىز ۇلەسىن قامتيتىنىن اتاپ ءوتتى ءارى كوپتەگەن جاڭا تالاپتارعا دەگەن سۇرانىستاردىڭ ارتۋىنان كومپانيا ۇنەمى جاڭا نارىققا بەيىمدەلىپ وتىراتىنىن اتاپ ءوتتى.
