تايىنشا اۋدانىنىڭ اكىمى قىزمەتىن اتقاراتىن ۆلاديمير دۋدوۆ ع.مۇسىرەپوۆ اۋدانىنا باسشىلىق ەتكەن تۇستا «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسىنا قاتىسۋشى تۋعان قارىنداسىنا, اۋدان اكىمىنىڭ ورىنباسارى التىنشاش تايشىباەۆا تۋعان سىڭلىسىنە پاتەر الۋعا كومەكتەسىپ, زاڭ بۇزۋشىلىقتارعا ورىن بەرگەن. سونداي-اق بەرىلگەن باسپانالاردىڭ اۋماعىنا قاتىستى دا زاڭعا قايشى جايتتار بەلگىلى بولعان. ماسەلەن, ءبىر بولمەلى پاتەر الۋعا ءوتىنىش بەرگەن ازاماتقا اۋماعى 56 شارشى مەتر قۇرايتىن باسپانا بوساتىلعان. ەكى بولمەلى پاتەر الۋى ءتيىس وتباسىعا ءۇش بولمەلى باسپانانىڭ كىلتى تاپسىرىلعان. ءتىپتى وتباسى قۇرامى جايلى انىقتاما دا سۇرالماعان.
«اۋدان اكىمى دە, ونىڭ ورىنباسارى دا باسپانا بەرۋ جونىندەگى كوميسسيانىڭ مۇشەلەرى بولا تۇرىپ وسى ارەكەتتەرى ارقىلى مەملەكەتتىك قىزمەتكە نۇقسان كەلتىردى», دەيدى سىبايلاس جەمقورلىققا قارسى ءىس-قيمىل دەپارتامەنتى تەرگەۋ باسقارماسى باسشىسىنىڭ ورىنباسارى سەرعالي ءتۇسىپوۆ.
تايىنشا اۋدانىنىڭ اكىمى ۆلاديمير دۋدوۆ ەكى ازاماتشا دا باعدارلاماعا قاتىسۋشى بولعاندىقتان وتىنىشتەرىن قابىلداماۋعا ەش نەگىز جوق. مەن قارىنداسىما پاتەر بەرۋ بويىنشا داۋىس بەرۋگە قاتىسقان جوقپىن. شەشىمدى وزگە كوميسسيا مۇشەلەرى شىعاردى, دەگەن ءۋاجى كوميسسيا مۇشەلەرىن سەندىرە قويعان جوق.
ادەپ كەڭەسىندە ۆ. دۋدوۆتىڭ, ع. مۇسىرەپوۆ اۋدانى اكىمىنىڭ ورىنباسارى تالعات ابىلپەيىسوۆتىڭ كاسىپكەرلەردەن زاڭسىز قارجى تالاپ ەتكەنى دە راستالدى. كەڭەس مۇشەلەرى ولقىلىقتارعا جول بەرگەن شەندىلەر اتقارىپ وتىرعان قىزمەتتەرىنە تولىق ساي ەمەس دەگەن شەشىم شىعاردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
