ەكىنشى دۇنيەجۇزىلىك سوعىس جىلدارىنان كەيىن ەڭبەك جولىن قاتارداعى ەكونوميست بولىپ باستاعان اكادەميك تۇيمەباي اشىمباەۆتىڭ ەلىمىزدىڭ عىلىمىنا قوسقان سۇبەلى ۇلەسى زور. 1958 جىلى ەڭبەگىن قازسسر ەكونوميكا ينستيتۋتىندا كىشى عىلىمي قىزمەتكەردەن باستاعان عالىم 1963 جىلى ينستيتۋتتىڭ عىلىمي حاتشىسى, 1965 جىلى – ءبولىم مەڭگەرۋشىسى, ال 1967-1973 جىلدارى ديرەكتوردىڭ ورىنباسارى دارەجەسىنە دەيىن كوتەرىلدى. 1973 جىلى ەكونوميكا ينستيتۋتىنىڭ ديرەكتورى بولىپ تاعايىندالدى. 1988 جىلعا دەيىن 15 جىل وسى مىندەتتى قالتقىسىز اتقارعان عالىم 1970 جىلى قازاق كسر عىلىم اكادەمياسىنىڭ كوررەسپوندەنت مۇشەسى بولىپ سايلاندى.
كونفەرەنتسيانىڭ العىسوزىن باستاعان قر بعم عك ەكونوميكا ينستيتۋتىنىڭ ديرەكتورى, ە.ع.د, پروفەسسور, قر ۇعا اكادەميگى ا.ا. ساتىبالدين اكادەميك ت.اشىمباەۆتىڭ وسى ينستيتۋت قابىرعاسىنداعى ىلگەرىندى ەڭبەكتەرىن اتاپ ءوتتى. ال كونفەرەنتسيانى قۇتتىقتاۋ سوزىمەن باستاعان قر ءبىلىم جانە عىلىم مينيسترلىگى عىلىم كوميتەتى توراعاسىنىڭ ورىنباسارى ە.ت. سادىقوۆ ت.ءا.اشىمباەۆتىڭ تىڭنان جول سالىپ, الەۋمەتتىك-ەكونوميكالىق پروبلەمالاردى زەرتتەۋدەگى ەڭبەكتەرى باعا جەتپەس قۇندىلىعىمەن ەرەكشەلەنەتىندىگىن اتاپ ءوتتى.
عىلىم جولىندا ت.اشىمباەۆ 400-دەن استام عىلىمي ەڭبەك, سونىڭ ىشىندە 19 ىرگەلى مونوگرافيا جاريالادى, 40-قا جۋىق عىلىمي جۇمىس تىكەلەي عالىمنىڭ رەداكتسيالىعىمەن جارىق كورگەن. ت.ءا.اشىمباەۆتىڭ عىلىمي كادر دايارلاۋدا ءوز مەكتەبى قالىپتاسىپ, ونعا جۋىق عىلىم دوكتورى مەن 50-دەن استام عىلىم كانديدات تاربيەلەپ شىعاردى. بۇگىندە عالىمنىڭ شاكىرتتەرى ەكونوميكانىڭ ءتۇرلى سالالارى مەن مەملەكەتتىك قۇرىلىمداردا ەڭبەك ەتۋدە.
كونفەرەنتسيا بارىسىندا ت.اشىمباەۆتىڭ قىزى ناتاليا اشىمباەۆا اكەسىنىڭ ومىرىنە قاتىستى ماڭىزدى ساتتەردى ەسكە الا وتىرىپ, عىلىمداعى ەڭبەگىنىڭ بارىسىنا توقتالىپ ءوتتى. ال قر ۇعا اكادەميگى ا.ق. قوشانوۆ, قر ۇيا اكادەميگى, ە.ع.د., پروفەسسور, C.و.سابدەن, قر ۇعا اكادەميگى, ە.ع.د., پروفەسسور, و.ب. بايمۇراتوۆ, قر جوو قاۋىمداستىعىنىڭ پرەزيدەنتى ر.ا. الشانوۆ, ە.ع.د., پروفەسسور س.ا. سۆياتوۆ, م.ۆ. لومونوسوۆ اتىنداعى ممۋ قازاقستان فيليالىنىڭ ديرەكتورى, ە.ع.د, پروفەسسور ا.ۆ. سيدوروۆيچ, تاشكەنت مەملەكەتتىك ەكونوميكالىق ۋنيۆەرسيتەتتىڭ پروفەسسورى, ە.ع.د. ا.ف. راسۋلەۆ, ە.ع.د., پروفەسسور ۋ.ج. اليەۆ جانە ت.ب. بايانداما جاساپ, اكادەميك ت.اشىمباەۆتىڭ ومىردەگى جانە عىلىمداعى جارقىن جولدارى تۋرالى ساتتەردى ەسكە الدى.
كونفەرەنتسيا جۇمىسىنا قاتىسقان وزگە دە وتاندىق جانە شەتەلدىك عالىمدار, بيزنەس جانە حالىقارالىق ۇيىمدارى وكىلدەرى ەاەو ەلدەرىنىڭ ەكونوميكالىق دامۋ تەورياسى تۇرعىسىندا جالپىالەمدىك ۇردىستەر مەن ۇلتتىق ەرەكشەلىكتەر; وندىرىستىك قورلاردىڭ تيىمدىلىگىن ارتتىرۋ جانە قازاقستان ونەركاسىبىندەگى ەڭبەك ونىمدىلىگىن ءوسىرۋ پروبلەمالارى; قازاقستاننىڭ الەۋمەتتىك ساياساتىنىڭ باسىمدىقتارى جانە ەلدىڭ ءومىر ءسۇرۋ ساپاسىنىڭ جاڭا ستاندارتتارى; ۇلتتىق ەكونوميكانى تسيفرلاندىرۋ; «جاسىل ەكونوميكا» قازاقستاننىڭ تۇراقتى دامۋ باعىتى رەتىندە; قازاقستاندىق قوعامنىڭ رۋحاني جاڭعىرۋى سياقتى تاقىرىپتار توڭىرەگىندەگى ماسەلەلەردى تالقىلاپ, پىكىرلەرىن ورتاعا سالدى.
ەلۆيرا سەرىكقىزى,
«ەگەمەن قازاقستان»
الماتى
