ال جاس ماماندار اۋىلدىق جەرلەرگە جۇمىسقا بارۋدان باس تارتپايتىندىعىن ءومىر تاجىريبەسى كورسەتىپ وتىر. باعدارلاما ىسكە اسىرىلعان 9 جىل ىشىندە اۋىلدىق ەلدى مەكەندەرگە 54 مىڭنان استام جاس مامان تۇراقتى جۇمىسقا كەلىپ, 12,5 ميلليارد تەڭگە سوماسىندا كوتەرمەاقى العاندىعى جانە ولاردىڭ 23,5 مىڭعا جۋىعىنا 57 ميلليارد تەڭگە سوماسىندا تۇرعىن ءۇي الۋعا نەسيە بەرىلگەندىگى سونىڭ ايعاعى.
ەڭ وزەكتى ماسەلە – باعدارلاما تولىق كولەمدە قارجىلاندىرىلماي كەلەدى. مىسال ءۇشىن, جەرگىلىكتى اتقارۋشى ورگاندار اتالعان باعدارلاما بويىنشا 2018 جىلعا ارنالعان بيۋدجەتتىك نەسيەلەرگە 19 ميلليارد تەڭگەدەن استام قارجى سۇراعان بولسا, ءىس جۇزىندە 13,7 ميلليارد تەڭگە بولىنگەن. سوندىقتان دا اۋىلدىق جەرلەردە كەيىنگى كەزدە جىل سايىن 6 مىڭداي جاس مامان جۇمىسقا ورنالاسقانىمەن, ولاردىڭ تەڭ جارتىسىنا جۋىعى ەشقانداي مەملەكەتتىك قولداۋمەن قامتىلماعاندىقتان, ورىندى رەنىش بىلدىرۋدە. ماسەلەن, بيىلعى جىلى باعدارلاماعا 3786 مامان عانا ەنگىزىلگەن. ال دەنساۋلىق ساقتاۋ مينيسترلىگىنىڭ ۇستىمىزدەگى جىلدىڭ باسىنداعى مالىمەتى بويىنشا اۋىلدىق جەرلەردە 580 دارىگەر جەتىسپەيدى. بۇعان قوسا, ءبىلىم جانە عىلىم مينيسترلىگىنەن الىنعان دەرەككە قاراعاندا, رەسپۋبليكا بويىنشا قازىر 4952 مۇعالىم تاپشى.
سونداي-اق ۇكىمەتتىڭ 2009 جىلعى 18 اقپانداعى №183 قاۋلىسىنا سايكەس تۇرعىن ءۇي ساتىپ الۋعا نەمەسە سالۋعا بەرىلەتىن 1500 ايلىق ەسەپتىك كورسەتكىش (3 607 500 تەڭگە) مولشەرىندەگى جەڭىلدىكتى نەسيە كەيبىر ءىرى ەلدى مەكەندەردە, نەگىزىنەن, اۋىلدىق اۋدانداردىڭ ورتالىقتارىندا تۇرعىن ءۇي سالۋعا نەمەسە پاتەر ساتىپ الۋعا جەتپەي, ەكى-ءۇش جىل بويى باسپانا الا الماي جۇرگەن جاس ماماندار بار.
وبلىستار مەن اۋداندار ورتالىقتارىنان جاقىن جانە الىس قاشىقتىقتا ورنالاسقان اۋىلدىق ەلدى مەكەندەرگە جۇمىسقا ورنالاسۋعا باراتىن جاس ماماندارعا بولىنەتىن كوتەرمە جاردەماقى مولشەرى بىردەي ەكەندىگى دە ويلاندىرماي قويمايدى.
تاعى ءبىر وزەكتى ماسەلە – قازىر اۋىلدىق اۋداندارداعى مەملەكەتتىك ورگانداردا 900-دەن استام جۇمىس ورنى بوس تۇر. ال وبلىستىق دەڭگەيدەگى مەملەكەتتىك ورگانداردا قىزمەت ىستەپ جۇرگەن جاس ماماندار وزدەرىن اتالعان باعدارلاماعا ەنگىزسە, اۋىلدىق جەرلەرگە بارىپ جۇمىس ىستەۋگە قارسى ەمەس ەكەندىكتەرىن بىلدىرۋدە. وسى ايتىلعان جايلاردىڭ نەگىزىندە ءبىز پرەمەر-مينيستر باقىتجان ساعىنتاەۆتىڭ قۇزىرىنا مىناداي ۇسىنىستار ەنگىزدىك:
1. الداعى ۋاقىتتا باعدارلامانى جەرگىلىكتى اتقارۋشى ورگانداردىڭ بيۋدجەتتىك وتىنىمدەرىن ەسكەرە وتىرىپ, تولىق كولەمدە قارجىلاندىرۋ ماسەلەسىن شەشۋ;
2.اۋىلدىق جەرلەرگە جۇمىسقا باراتىن جاس ماماندارعا تۇرعىن ءۇي ساتىپ الۋعا نەمەسە سالۋعا بەرىلەتىن جەڭىلدىكتى بيۋدجەتتىك نەسيە مولشەرىن جەرگىلىكتى اتقارۋشى ورگانداردىڭ ۇسىنىستارىنا سايكەس 2000 ايلىق ەسەپتىك كورسەتكىشكە دەيىن ۇلعايتۋ;
3. وبلىستار مەن اۋداندار ورتالىقتارىنان جاقىن جانە الىس قاشىقتىقتا ورنالاسقان اۋىلدىق ەلدى مەكەندەرگە جۇمىسقا باراتىن جاس ماماندارعا بولىنەتىن كوتەرمە جاردەماقى مولشەرىن قايتا قاراپ, شالعايداعى اۋىلدارعا, سونىڭ ىشىندە الىستاعى شەكارالىق ەلدى مەكەندەرگە جۇمىسقا ورنالاساتىن جاس ماماندارعا بەرىلەتىن كوتەرمەاقى مولشەرىن قازىرگى 70 ايلىق ەسەپتىك كورسەتكىشتەن 150-200 ايلىق ەسەپتىك كورسەتكىشكە دەيىن ارتتىرۋ;
4. باعدارلامانىڭ اۋقىمىن كەڭەيتىپ, وعان اۋىلدىق اۋدانداردىڭ ورتالىقتارى بولىپ تابىلاتىن مونوقالالار مەن شاعىن قالالاردى ەنگىزۋ قاجەت.
كارىباي مۇسىرمان,
ءماجىلىس دەپۋتاتى
