دەپۋتاتتىڭ ساۋالىندا وبلىستىق پروكۋراتۋرانىڭ جۇرگىزگەن تەكسەرىسى بارىسىندا ۋران ءوندىرۋ ورىندارىنىڭ دۇرىس شەگەندەلمەگەندىگىنەن راديواكتيۆتى زاتتار تۇرعىنداردىڭ دەنساۋلىعىنا زيانىن تيگىزىپ جاتقانى ايتىلعان. وسىعان وراي پروكۋراتۋرا 2016 جىلدىڭ 2 اقپانىندا ەنەرگەتيكا مينيسترلىگىنىڭ اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنە انىقتالعان قاتەرلەردى جويۋ تۋرالى ۇسىنىس ەنگىزگەنىمەن, بۇل ۇيىم 2016 جىلدىڭ ماۋسىم ايىندا تەك نەمقۇرايلى شەشىم قابىلداپ, ماسەلەنى سولتۇستىك قازاقستان وبلىسى اكىمدىگىنىڭ بيۋدجەتى ەسەبىنەن جۇرگىزۋدى ۇسىنعانىن جازادى. الايدا بۇل ماسەلەنىڭ شەشىمى جەرگىلىكتى اتقارۋشى ورگاننىڭ قۇزىرەتىنە كىرمەيتىندىكتەن ولاردىڭ قاراجات ءبولۋى زاڭسىز بولار ەدى, وسىنى مينيسترلىكتىڭ بىلمەۋى مۇمكىن ەمەس, دەيدى دەپۋتات.
2016 جىلدىڭ جەلتوقسان ايىندا سول كەزدەگى پرەمەر-ءمينيستردىڭ ورىنباسارى ا.مىرزاحمەتوۆ قارجى مينيسترلىگى مەن رەسپۋبليكانىڭ باسقا دا مۇددەلى مەملەكەتتىك ورگاندارىنا جۇمىستاردى قارجىلاندىرۋ تەتىكتەرىن انىقتاۋ تۋرالى تاپسىرما بەرگەن. الايدا ماسەلە ءبارىبىر سول كۇيىندە قالعان, ويتكەنى رەسپۋبليكالىق بيۋدجەتتىك كوميسسيا بۇل شىعىنعا قاراجات ءبولۋدى قولداماعان. وسى ەكى جىل بويى شەشىمىن تاپپاي كەلە جاتقان ماسەلەنى شەشۋدى دەپۋتات پرەمەر-مينيستردەن وتىنگەن ەدى. ساۋالدى قولداپ بىرنەشە دەپۋتات قول قويعان.
ۇكىمەت باسشىسىنىڭ اتىنان وسى ساۋالعا كەلگەن جاۋاپتا 2001-2010 جىلدارى بۇرىنعى ۋران كەن ورىندارىن رەسپۋبليكادا كونسەرۆاتسيالاۋ جۇمىستارى قالاي جۇرگىزىلگەنى ايتىلىپ, وعان 4,2 ملرد تەڭگە جۇمسالعانى جەتكىزىلگەن. الايدا 2014-2015 جىلدارى ماگاتە-ءنىڭ ساراپشىلارى تەكسەرگەن كەزدە كوپتەگەن كەمشىلىكتەر تابىلىپ, ولاردى جويۋ تۋرالى ۇسىنىستار جاسالىپتى. وسىعان بايلانىستى 2016 جىلى ۆەدومستۆوارالىق جۇمىس توبى قۇرىلىپ, سولتۇستىك قازاقستانداعى بۇرىنعى ۋران رۋدنيكتەرىنىڭ دۇرىس بىتەلمەگەنى سەبەپتى رادياتسيانىڭ نورمادان بىرنەشە ەسە ارتىق ەكەندىگى انىقتالعان. جاۋاپتا وسىعان بايلانىستى اكت جاسالىپ, ۇسىنىستار بەرىلگەنى ايتىلعان. بىراق سول ۇسىنىستاردىڭ ىسكە اسىرىلۋى تۋرالى ءسوز جوق.
بىراق بۇل كوميسسيانىڭ وتىرىسى قاشان بولىپ, حاتتاماسى قاشان جاسالعانى بەلگىسىز. مەملەكەتارالىق كوميسسيانىڭ بۇرىنعى كسرو اۋماعىندا قازىر پايدالانىلماي قالعان ۋران كەن ورىندارى وشاقتارىن بىتەۋدى قولعا العانى, ونى ۇيلەستىرۋشى رەسەيدىڭ «روساتوم» كومپانياسى ەكەنى دە جەتكىزىلگەن. بۇل كومپانيا ءبىر رەت كونسەرۆاتسيالاۋ جۇمىستارىن جۇرگىزگەن, الايدا ولارى شالا بولىپ, ەندى سول مىندەتتى ەكىنشى رەت اتقارا ما, سول جاعى جاۋاپتا ناقتىلانباعان. سونىمەن قاتار جۇمىستاردى ەكىنشى رەت اتقاراتىن بولسا ونى قارجىلاندىراتىن كىم ەكەندىگى دە جاۋاپتا كورسەتىلمەپتى.
دايىنداعان جاقسىباي سامرات,
«ەگەمەن قازاقستان»
