قولاربادا بيلەۋدەن قارسىلاس شاق كەلتىرمەيدى
تىرەك-قيمىل اپپاراتى بۇزىلعان, پسيحو-نەۆرولوگيالىق اقاۋى بار بالالاردى وڭالتۋ, ساۋىقتىرۋ ماقساتىندا قۇرىلعان ورتالىقتى «تۋعان جەرگە تاعزىم» اكتسياسى اياسىندا ومىردەن وتكەن قوعام قايراتكەرى نۇرلان قاپپاروۆ پەن ءامىر ۋاليەۆ سەكىلدى ازاماتتار ءوز قاراجاتتارىنا سالىپ, قاجەتتى قۇرال-جابدىقتارمەن قامتاماسىز ەتىپ, مەملەكەت قاراماعىنا بەرگەن ەكەن. قازىر مۇندا مۇمكىندىگى شەكتەۋلى 56 بالاعا 92 ادام قىزمەت كورسەتەدى. «شىن مانىندە, بۇل ورتالىقتى اشۋ وڭاي بولعان جوق. اتا-انالارمەن جۇمىس ىستەۋگە تۋرا كەلدى. اۋدانداعى 57 ەلدى مەكەننىڭ بارىنە بارىپ, اتا-انالارمەن سويلەستىك, تۇسىندىردىك. قازىرگى تاڭدا بالالار الەۋمەتتىك-پسيحولوگيالىق, الەۋمەتتىك-پەداگوگيكالىق, الەۋمەتتىك-تۇرمىستىق, الەۋمەتتىك-مەديتسينالىق, الەۋمەتتىك-قۇقىقتىق, الەۋمەتتىك-ەكونوميكالىق, الەۋمەتتىك-مادەني, الەۋمەتتىك-ەڭبەكتىك دەگەن سەكىلدى 8 ءتۇرلى قىزمەت الادى. بىزدەگى قىزمەتكەرلەردىڭ ءوز جۇمىسىنا دەگەن ىنتا-ىقىلاسى, بالالارعا دەگەن سۇيىسپەنشىلىگىنىڭ ارقاسىندا مۇمكىندىگى شەكتەۋلى بالعىنداردىڭ قوعامعا ارالاسۋى جەڭىلدەدى. قوعامدىق جۇمىستارعا بەلسەندىلىگى ارتتى. مادەني ءىس-شارالارعا كوپتەپ قاتىسا باستادىق. قۇدايعا شۇكىر, جۇرە الماعان بالالار ءجۇرىپ, سويلەي الماعان بالالار سويلەپ, ومىردەن ءوز جولدارىن تاۋىپ جاتقانى قۋانتادى. قازىر ورتالىقتا جاس مامان ايجان مۇحاماديەۆانىڭ باسشىلىعىمەن بىرقاتار جۇمىس قولعا الىنىپ جاتىر. بىلتىر تۇڭعىش پرەزيدەنت قورى مەكەمە ءۇشىن وتە قاجەت ينتەراكتيۆتى تاقتانى تارتۋ ەتتى», دەيدى وسى ورتالىقتىڭ اشىلۋىنا ۇلكەن ەڭبەك سىڭىرگەن, جوعارىدا ەسىمدەرى اتالعان جومارت جاندارعا حابارلاسىپ, عيماراتتى سالۋ جونىندە ءوتىنىش ءبىلدىرىپ, قۇرىلىستىڭ ىستىق-سۋىعىنا كۇيگەن, بۇگىندە مەكەمە ديرەكتورىنىڭ ورىنباسارى قىزمەتىن اتقاراتىن رىسحان جانكۇشىكوۆا.
ورتالىق 3 پەن 18 جاس ارالىعىنداعى مۇمكىندىگى شەكتەۋلى بالالاردى وبلىس بويىنشا تەگىن قابىلدايدى. مۇندا جاتىپ ەمدەلەتىن دە, تاڭەرتەڭ كەلىپ, ءتيىستى ەم-دومىن الىپ, كەشكە ۇيىنە قايتاتىن دا بالالار بار. مەكەمە قىزمەتكەرلەرى بالالاردى وزدەرى كولىكپەن الىپ كەتىپ, اكەپ تاستايدى. ورتالىقتاعى 56 بالانىڭ 30-ى مەكتەپكە بارادى. ولاردىڭ اراسىندا قاتارداعى بالالارمەن وقيتىندارى دا, جەكە ءبىلىم الاتىندارى دا بار. مەكتەپتە پاندۋس جوق بولعاندىقتان 5 بالا ۇيدە وقىپ جاتقان كورىنەدى. ورتالىقتا بالالاردىڭ تالانتىن اشۋعا ەرەكشە ءمان بەرىلەدى. مەكەمەدە تاربيەلەنۋشىلەر جاقىندا قولاربادا وتىرىپ بيلەۋدەن قازاقستان چەمپيوناتىنا قاتىسىپ, 17 مەدالمەن (ونىڭ 8-ءى التىن, 5-ءۋى – قولا, 4-ءۋى – كۇمىس) ورالىپتى. «قازىر ءبىزدىڭ بالالار حالىقارالىق جارىستارعا دا شىعا باستادى. ماسەلەن, تۋعاننان اياعى سەمىپ قالعان 12 جاستاعى الەكسەي جۋراۆلەۆ رەسەيدىڭ سانكت-پەتەربۋرگ قالاسىندا وتكەن 13 مەملەكەتتىڭ ونەرپازدارى قاتىسقان قۇرلىقتىق سايىستا التىن مەدال يەلەندى. لەشا – وتە تالانتتى, اقىلدى بالا. تۋا بىتكەن دارىن. جالعىز ءوزى دە, جۇپپەن دە بيلەيدى. بولاشاقتا قولاربادا بيلەۋدەن ونى ەشكىم جەڭە المايدى», دەيدى بالا جاناشىرى.
ەكى ينۆاتاكسي,ء ۇش قولاربا قاجەت
الەكسەي وسكەمەننەن ۇرجارعا 4 جاسىندا كەلگەن ەكەن. قازاقشاسى سۋداي. ءتىلى دە قازاقشا شىعىپتى. سانكت-پەتەربۋرگكە بارعاندا لەشانىڭ ونەرىنە رەسەيلىكتەر دە ءتانتى بوپ, ء«وزىمىز ەمدەپ الامىز, قامقورلىعىمىزعا الساق قايتەدى» دەپ قىزىعۋشىلىق تانىتىپتى. لەشادان بولەك باعلان ماناباەۆ پەن الىبەك تولەگەنوۆتى دە ەرەكشە ايتۋعا بولادى. ولار دا قولاربادا بيلەۋدەن بۇعان دەيىن بىرنەشە مەدال ەنشىلەدى. ءبىر وكىنىشتىسى, جۇلدەدەن جۇلدە بەرمەي جۇرگەن تالانتتى بالعىنداردىڭ وتىراتىن قولارباسى تالاپقا ساي كەلمەيدى ەكەن. ماسەلەن, الەكسەيدىڭ وتىرۋىنا, بي بيلەۋ كەزىندە ەركىن, كەدەرگىسىز قوزعالۋىنا قولايلى قولاربا سانكت-پەتەربۋرگتە 3 مىڭ اقش دوللارى تۇرادى. «جومارتتىڭ قولىن جوق بايلايدى» دەمەكشى, ورتالىق مۇنداي قولارباعا قول جەتكىزە الماعاننان كەيىن الماتى وبلىسىندا كونتسەرت قويىپ, ودان تۇسكەن 1 ميلليون 128 مىڭ تەڭگەگە جانە مەتسەنات راقىمعالي قۇلمۇحامەد بەرگەن 500 مىڭ تەڭگەگە قازىر بالالار بيلەپ جۇرگەن ءۇش قولاربانى ساتىپ الىپتى.
ارينە, تۇرعىندار بالالارىن جولدىڭ شالعايلىعىنا قاراماي استاناعا نەمەسە الماتىعا اپارىپ ەمدەتكىسى كەلەتىنى بەلگىلى. دەگەنمەن ۇرجارداعى ورتالىق قىزمەتكەرلەرى لوكومات سەكىلدى روبوتتاندىرىلعان قۇرىلعىلار مەكەمەگە ساتىپ الىنسا, بالالاردى الىسقا سابىلتپاي ءوزىمىز-اق ەمدەپ, ساۋىقتىرار ەدىك دەيدى. «بىزدە بالالار ماسساج قابىلدايدى, فيزيوەم الادى, ءارتۇرلى جاتتىعۋلار جاسايدى. دەگەنمەن دە كومپيۋتەر ارقىلى ءوزىنىڭ قيمىل-ارەكەتىن كورىپ, سول ارقىلى جۇرۋگە ىنتالاندىراتىن لوكومات سياقتى مەديتسينالىق قۇرىلعىلار قاجەت-اق. ونىڭ باعاسى دا قىمبات. 300 ميلليون تەڭگە تۇرادى. سونىڭ ارزانىن اكەلسە دە جاقسى بولار ەدى», دەيدى ديرەكتوردىڭ ورىنباسارى.
زەينەتكەرلىككە شىققان سوڭ مۇمكىندىگى شەكتەۋلى بالالاردى ساۋىقتىرۋ, وڭالتۋ ىسىمەن شۇعىلدانىپ كەلە جاتقان ر.جانكۇشىكوۆا وبلىستا قانشاما بالعىن ءالى كۇنگە دەيىن اتا-اناسىنىڭ جانىنان شىعا الماي, ءتيىستى ەم-دومىن قابىلداي الماي وتىرعانىنا الاڭدايدى. «كەيبىر اتا-انالاردى دا تۇسىنۋگە بولادى. ارينە, كىم ءوزىنىڭ باۋىر ەتى بالاسىن تانىمايتىن ادامداردىڭ قولىنا تاپسىرعىسى كەلەدى. دەگەنمەن دە بالانىڭ بولاشاعىن, الداعى ءومىرىن ويلاۋ كەرەك قوي. 2016 جىلى اباي اۋدانىنىڭ ورتالىعى قاراۋىلدا بولىپ, اتا-انالاردى مەكەمەنىڭ جۇمىسىمەن تانىستىرعان ەدىك. كەزدەسۋدە تالاي ساۋالدار قويىلدى. سول كەزدە اۋىراتىن بالاسىن ءبىزدىڭ ورتالىققا اكەلگىسى كەلەتىن اتا-انالاردىڭ از ەمەس ەكەنىن بايقادىم. بىراق كەلۋگە جاعدايى جوق. سوندىقتان اۋدان تاراپى ارنايى كولىك شىعارىپ, اتا-انالاردى بالاسىمەن بىرگە بىزگە الىپ كەلىپ كورسەتسە ساۋاپتى ءىس بولار ەدى», دەيدى ر.جانكۇشىكوۆا.
ءتۇيىن
ورتالىقتان شىعىپ بارا جاتقاندا دالىزدە تۇرعان بىرنەشە ۆەلوسيپەدكە كوزىمىز تۇسكەن. ورتالىق قىزمەتكەرلەرى بۇل دا جانى جابىرقاۋلى, مۇمكىندىگى شەكتەۋلى بالالاردى ىنتالاندىرۋدىڭ ءبىر ءادىسى ەكەنىن ايتقان. مۇنداعى لەشا سەكىلدى اياعىن باسا المايتىن بالعىندار الگى شايتان اربالاردى قولمەن اينالدىرىپ, وينايدى ەكەن...
عيماراتتان شىعاردا الگى ۆەلوسيپەدتەرگە تاعى دا كوز سالدىم. كوز سالدىم دا, مۇنداعى 56 بالانىڭ بارلىعى سىرقاتتارىنان قۇلان-تازا ايىعىپ, وسى ۆەلوسيپەدتەرگە وتىرىپ, جەلدەي جۇيتكىسە دەپ تىلەدىم.
بالالار – پەرىشتە عوي. پەرىشتە تىلەگى ورىندالار.
ازامات قاسىم,
«ەگەمەن قازاقستان»
شىعىس قازاقستان وبلىسى,
ءۇرجار اۋدانى,
اقجار اۋىلى
