– اتىڭىز ءتىپتى ەرەكشە ەكەن! – دەپ جاتىرمىز اۋىل مەكتەبىنە كەلگەنىمىزدە.
– ءيا, ءسابي كۇنىمنەن باستاپ, بۇگىنگى بويجەتكەن شاقتا دا ءبارىن تاڭعالدىرعان اتىم مەنىڭ وسىنداي! – دەيدى مەكتەپ ديرەكتورى وليمپيادا دوسىمجانقىزى.
اكەسى دوسىمجان ءبيسميللاي ۇلى 1942 جىلى وسى اقجار اۋىلىندا, اناسى نازىم قوجابايقىزى 1951 جىلى لەبياجى اۋدانىنداعى زور وكتيابر دەگەن اۋىلدا ومىرگە كەلىپتى. ال ۇلكەن اتالارى ءبيسميللاي اتىنا زاتى ساي دىنىنە بەرىك, اۋىلدىڭ مولداسى بولعان ەكەن. دوسىمجان اعامىزدىڭ ماماندىعى قارجىگەر, ەڭبەك جولىندا بۋحگالتەر, باس ەكونوميست, سوۆحوز ديرەكتورىنىڭ ورىنباسارى, كەيىن اۋىلدىڭ اكىمى بولىپ زەينەتكەرلىككە شىعىپتى. ماي اۋدانىنىڭ قۇرمەتتى ازاماتى. اناسى نازىم اپاي اقجاردىڭ مەكتەبىندە 35 جىل بويى مۇعالىمدىك قىزمەتىن اتقارىپتى.
– اكە-شەشەم ەكەۋى دە زەينەتكەر. كۇنى بۇگىنگە دەيىن اقجار اۋىلىندا تۇرادى. جايلى جەر ىزدەپ قالاعا كوشكەن جوق. اۋىلدىڭ ۇلكەندەرىنىڭ قاتارىندا ەل ىشىندە, بالا-شاعا ءوسىرىپ, نەمەرەلەرىنىڭ ورتاسىندا وتىر, – دەيدى وليمپيادا.
دوسىمجان اعا مەن نازىم اپاي ەرجان, التىنجان, راشيد, راحات, ناريمان, نىسانا, دينارا جانە وليمپيادا دەپ ات قويعان 8 بالانى ومىرگە اكەلىپتى. قازىر التى بالاسى امان-ەسەن. ەرجان مەن ناريمان اۋىلىندا «اعايىندىلار» شارۋا قوجالىعىن باسقارادى. راحات ساۋدا سالاسىندا, نىسانا زاڭتانۋ ماگيسترى, دينارا فيلولوگيا عىلىمدارىنىڭ كانديداتى, دوتسەنت, استانادا قىزمەت ەتەدى.
ال وليمپيادا بولسا, 1998 جىلى وبلىس ورتالىعىنداعى پەداگوگيكالىق كوللەدجدى, 2001 جىلى ۋنيۆەرسيتەتتى ءبىتىرىپ تۋعان اۋىلى اقجارعا ورالادى. اناسىنىڭ ۇستازدىق جولىن جالعاستىرىپ, مۇعالىم ماماندىعىن تاڭدايدى.
– ايتىڭىزشى, اتىڭىزدى كىم قويدى؟
– مەن 1980 جىلى 12 قاڭتاردا تۋدىم. اتىمدى 1980 جىلعى ماسكەۋدە وتكەن وليمپيادانىڭ قۇرمەتىنە ارناپ اكەم قويعان. اناما دا ۇناپ, ەكەۋى كەلىسىپ سولاي اتاعان ەكەن. وزىمە دە ۇنايدى. مەكتەپتە وقىپ جۇرگەندە, ستۋدەنت بولعاندا, ول كەزدە ينتەرنەت جوق, كىتاپحانالارعا بارىپ ماسكەۋ وليمپياداسى تۋرالى ماتەريالداردى تۇگەل قاراپ, وقىپ شىقتىم. ستۋدەنت كەزىمدە ءوزىڭىز ايتقانداي, بارلىعى تاڭعالاتىن. لەكتسيادا بولماي قالسام, «وليمپيادا دەگەن قىز قايدا؟» دەپ بىردەن سۇرايدى ەكەن, – دەيدى وليمپيادا.
– ءوزىڭدى ۇيدە جانە دوستارىڭ ەركەلەتىپ قالاي اتايدى؟
– وليكو دەيدى!
ءيا, بۇل كۇندە وليمپيادا باسقاراتىن اقجار ورتا مەكتەبى دە ەلىمىزدەگى ءبىلىم بەرۋ سالاسىنداعى وزگەرىستەرگە ساي جاڭارتىلعان مازمۇنعا كوشۋدە. كەڭ جولاقتى ينتەرنەت جۇيەسىنە قوسىلعان. ينفورماتيكا ءپانىن ەكسپەريمەنت رەتىندە اعىلشىن تىلىندە كۋرستار وتكىزىلۋدە. مەكتەپتە «ديپلوممەن – اۋىلعا!» باعدارلاماسى بويىنشا اينا مىڭجاساروۆا, گۇلجان جايلاۋباەۆالار كەلىپ قىزمەت ەتۋدە.
– ءوزىڭىز سپورتتى جاقسى كورەسىز بە؟
– ارينە جاقسى كورەمىن. سپورت مەنىڭ ومىرىمدە, جانىمدا ءجۇر عوي! باسقا ەلدە, ءوزىمىزدىڭ ەلدە وليمپيادا بولادى, دايىندىق جۇرۋدە, باستالدى دەسە ەرەكشە ءبىر سەزىمدە جۇرەمىن. جۇرەك لۇپىلدەپ, وزگەشە كۇي كەشەمىن. تولقىپ كوزىمە جاس كەلەدى. ويتكەنى مەن وليمپيادا, سپورتشىلارمەن بىرگەمىن عوي! كەشكى ۋاقىتتا تەلەديداردان سپورت حابارلارىن ءجيى-ءجيى كورگىم-اق كەلىپ تۇرادى. وكىنىشكە قاراي, ۋاقىت بولا بەرمەيدى. اكەم دە, اعالارىم دا, جولداسىم باۋىرجان دا قازاقشا كۇرەس, بوكس, بياتلون سياقتى سپورت تۇرلەرىن ءسۇيسىنىپ تاماشالايدى. ۇلدارىم اسىل مەن ادىلەت كورشى كۋرچاتوۆ قالاسىنداعى سپورت مەكتەبىندە قازاقشا كۇرەسكە قاتىسادى, – دەيدى وليمپيادا.
فاريدا بىقاي,
«ەگەمەن قازاقستان»
پاۆلودار وبلىسى,
ماي اۋدانى,
اقجار اۋىلى
