«سارىارقااۆتوپروم» اۆتوزاۋىتى قارايتىن «الليۋر» كومپانياسى بۇگىندە JAC ءشاسسيى بازاسىنداعى N سەرياسىمەن كوممۋنالدىق تەحنيكالاردىڭ 9 مودەلىن شىعارادى, ال Iveco 682 شاسسيى بازاسىندا كوممۋنالدىق ماشينالاردىڭ قۇم شاشاتىن, بەتون ارالاستىراتىن, ءوزى اۋدارعىش سەكىلدى ءۇش مودەلى شىعارادى. وتكەن جىل وسىنداي سىناقتىق العاشقى 96 كوممەرتسيالىق تەحنيكا ساپقا قويىلدى.
«سارىارقااۆتوپروم» زاۋىتى ءوندىرىستى جىل سايىن كەڭەيتىپ جانە جاڭعىرتىپ كەلە جاتىر. 2017 جىلى تۇتىنۋشىلاردىڭ سۇرانىسىنا قاراي تۇرمىستىق جانە ونەركاسىپتىك قوقىستاردى جيناپ, شىعاراتىن تەحنيكالاردى جاساپ كورۋگە بەل بايلاعان. كوممۋنالدىق ماشينالاردىڭ العاشقى لەگى «تازا-الەم استانا» جاۋاپكەرشىلىگى شەكتەۋلى سەرىكتەستىگىنە بەرىلدى. وندا ماشينالاردىڭ تيىمدىلىگى سىنالدى.
قوقىس تاسيتىن, جينايتىن كوممۋنالدىق ماشينالار قۇرالدىڭ نەگىزگى بولىگىنە قوندىرما سالۋ ەسەبىنەن Iveco 682 جانە JAC شاسسيى N سەرياسى بازاسىندا وندىرىلەدى. مۇنداي قوندىرما سالعان كولىكتەردى 7 جىلعا دەيىن ەش جوندەمەي پايدالانۋعا بولادى. ماشينالاردىڭ بولشەكتەرى رەسەيدەن, تۇركيادان, ەۋروپا ەلدەرىنەن اكەلىنەدى. ولاردىڭ ەڭ نەگىزگى بولشەكتەرىن وزگەرتىپ, قوندىرما سالۋ ارقاسىندا قازاقستاندىق ۇلەس, ياعني قوستانايلىق زاۋىتتا اتقارىلاتىن جۇمىس 35 پايىزعا دەيىن جەتكىزىلەدى. قازاقستاندىق زاۋىتتا جاسالعان قوقىس تاسيتىن ماشينالاردىڭ بەرىكتىگىن كۇشەيتۋ ءۇشىن 6-7 مم بولات پايدالانىلادى. سونىمەن قاتار كونتەينەردى جۋاتىن قوسىمشا قۇرالمەن جابدىقتالادى. ول ءۇشىن تەحني-كاعا سۋ قۇياتىن باك ورناتىلادى.
– بىزدەگى تەحنولوگيالار بويىنشا وندىرىلەتىن قوندىرعىلار رەسەي نارىعىندا جەتى جىلدان بەرى پايدالانىلىپ كەلەدى, ساپاسى جاقسى. بۇعان دەيىنگى سىناق كورسەتكەندەي, كىشى كولەمدە جاساۋ ارنايى تەحنيكالاردىڭ قىزمەتىن ازايتپايدى. شاعىن قوقىس تاسيتىن تەحنيكالار ۇلكەن قالالارداعى تىعىز سالىنعان ۇيلەر مەن باسقا عيماراتتار اراسىندا جۇمىس ىستەۋدە تيىمدىلىگىن كورسەتتى. از توننالىق ماشينالار جولى تار قالالاردا جەڭىل جۇمىس ىستەيتىن بولادى, – دەدى «Allur Auto Astana» جشس قىزمەتكەرى الەكساندر تسوي.
تيىمدىلگى سىنالعان قوقىس تاسيتىن ماشينالار الداعى ۋاقىتتا جەكە سۇرانىسپەن دە جاسالاتىن بولادى. مۇنداي تەحنيكا تەك ءوزىمىزدىڭ نارىققا عانا ەمەس, ەكسپورتقا دا شىعارىلادى. كوممۋنالدىق شارۋاشىلىقتاردىڭ تيىمدىلىگى جوعارى تەحنيكاعا قول جەتكىزۋى ءۇشىن جەڭىلدىگى بار ليزينگ باعدارلامالار دا ىسكە قوسىلماق.
ءنازيرا جارىمبەت,
«ەگەمەن قازاقستان»
قوستاناي
