«كىندىگىمنىڭ جاس قانى,
تامعان جەرىم اۋىلىم.
شابىتىمنىڭ اسقارى,
سامعاۋشى ەدى اۋىلىم.
جاستىعىمنىڭ كۋاسى,
شۇرقىراعان اۋىلىم.
جۋسانى مەن جۋاسى,
بۇرقىراعان اۋىلىم».
وسى ءاندى تەبىرەنبەي ايتپايتىن قازاق بالاسى جوق شىعار. سەبەبى تالاي مىقتىنىڭ توركىنى بولعان اۋىلعا دەگەن, ساعىم بولعان بالالىق بال-داۋرەنگە دەگەن ساعىنىش وسى ءان ارقىلى جۇرەكتى قوزعايدى. بۇكىل الاش ەلىن ارالاپ كەتكەن وسى «اۋىلىم» ءانىنىڭ اۆتورلارى جابايىل بەيسەنوۆ پەن تەمىرجان بازارباەۆ سىندى قازاقتىڭ ماڭدايىنا بىتكەن ءبىرتۋار ازاماتتارى ەدى. ەكى الىپتى تابىستىرعان قۇدىرەتتى ءان تالايدىڭ جانىنا داۋا, دەرتىنە شيپا بولعان الاكولدىڭ ەكى جاعاسىندا دۇنيەگە كەلۋى دە كەزدەيسوقتىق ەمەس. ءاننىڭ ءسوزىن جازعان جابايىل اعامىز الاكولدىڭ شىعىسىندا بولسا, ءانىن جازعان تەمىربەك اعامىز تالدىقورعان وبلىسى الاكول اۋدانىنا قاراستى جالعىزاعاش اۋىلىندا دۇنيەگە كەلگەن ەكەن. «اۋىلىم» ولەڭى تەمىربەك اعانىڭ قولىنا تيگەننەن كەيىن ءسوزى وعان قاتتى ۇناپ, ءان جازادى. ول كەزدە اعالارىمىز ءبىر-ءبىرىن تانىماپتى. كەيىن «اۋىلىم» ءانى حالىقتىڭ كوڭىلىنەن شىعىپ, بۇكىل قازاقستاندى شارلاپ كەتكەن كەزدە عانا ەكى اۆتور باس قوسقان كورىنەدى.
ءاننىڭ اۋەنىن جازعان تەمىرجان بازارباەۆتىڭ دۇنيەدەن وتكەنىنە ءۇش جىلداي ۋاقىت بولدى. ال ولەڭ اۆتورى جابايىل اعامىز بۇگىندە سەكسەن جاستى ەڭسەرگەن, ءۇرجار اۋدانىندا تۇرادى. وسى اۋدانعا كەلگەلى بەرى اقىن اعام ۇنەمى كوڭىلىمدە جۇرەتىن. ارقامدى كەڭگە سالىپ, اسىل اعاممەن ارقا-جارقا اڭگىمەلەسۋدىڭ ءساتىن توسىپ ءجۇر ەدىم. كەزدەسۋدىڭ ءساتى جاقىندا ءتۇستى. اڭگىمە بارىسىندا سەكسەن بەس جاسقا اياق باسقان اقساقالدىڭ ايتقان سالماقتى سوزدەرىنە, كەلەلى كەڭەستەرىنە ريزا بولىپ وتىردىم. «ارمانىڭىز بار ما؟» دەگەن سۇراعىما «ارمانىم شىعارماشىلىعىمدى دامىتىپ, ۇرپاعىما ولمەس مۇرا قالدىرسام دەپ ەدىم. وعان جەتتىم بە, جەتپەدىم بە, حالىق بىلەدى. مەنىڭ نەگىزگى تاقىرىبىم – اۋىل. سەبەبى اۋىلدا تۋدىم, اۋىلدا ءوستىم, بۇكىل عۇمىرىم اۋىلمەن بايلانىستى. ءتىپتى مەنىڭ اۋىلعا بەرىلگەنىم سونشا, الماتىدان باسقا قالاعا شىعىپ كورمەپپىن (بىرگە كۇلدىك). جاز شىقسا, الاكولىمنىڭ جاعاسىنا بارىپ دەمالامىن. سودان ارتىق نە كەرەك؟» دەپ اڭگىمەسىن اياقتادى.
كەنجەگۇل تەرگەمباەۆا,
قازاقستان جۋرناليستەر وداعىنىڭ مۇشەسى
شىعىس قازاقستان وبلىسى,
ءۇرجار اۋدانى
