وسى ورايدا پارتيا توراعاسىنىڭ ءبىرىنشى ورىنباسارى ماۋلەن اشىمباەۆتىڭ قاتىسۋىمەن جوبانىڭ تۇساۋكەسەر كەزدەسۋى ءوتتى. وندا قاتىسۋشىلار «قازاقستاندا نەسيە ۇستەمەسى نەگە جوعارى؟» تاقىرىبىن جان-جاقتى ساراپتاپ, كوتەرىلگەن ماسەلەگە قاتىستى ءوز پىكىرلەرىن ءبىلدىردى. بەلگىلى ەكونوميست راحىم وشاقباەۆتىڭ مودەراتورلىعىمەن وتكەن ءىس-شارا Facebook الەۋمەتتىك جەلىسىندە تىكەلەي ەفيردە كورسەتىلدى.
بۇگىندە «نۇر وتان» پارتياسى ەلباسىنىڭ تاپسىرماسى بويىنشا پارتيا قىزمەتىن جاڭعىرتۋ اياسىندا جۇيەلى جۇمىس جۇرگىزۋدە. وسى باعىتتا بىرقاتار تىڭ باستامالار مەن پارتيالىق جوبالار قولعا الىندى. Nur Otan Trends جوباسى دا وسى قارقىندى جۇمىستىڭ ناتيجەسى ەكەنى ءسوزسىز. بۇل باستامانىڭ ماڭىزى مەن مانىنە توقتالعان پارتيا توراعاسىنىڭ ءبىرىنشى ورىنباسارى قوعامداعى وزەكتى ماسەلەلەردى شەشۋدىڭ باسى-قاسىندا ءجۇرۋ پارتيانىڭ باستى مىندەتى ەكەنىن ايتتى.
– الداعى ۋاقىتتا Nur Otan Trends جوباسى قوعامداعى الەۋمەتتىك, ەكونوميكالىق, ساياسي جانە تاعى دا باسقا ماسەلەلەردى اشىق تالقىلايتىن ەركىن پىكىرتالاس الاڭى رەتىندە تۇراقتى جۇمىس ىستەيدى دەپ سەنەمىن. بۇگىنگى وتىرىسىمىزدا قازىرگى كەزدەگى ەڭ وزەكتىلەردىڭ ءبىرى جوعارى ۇستەمەلى نەسيە ماسەلەسىنە توقتالىپ وتىرمىز. ويتكەنى بۇل تۇيتكىلدىڭ حالىققا دا, بيزنەس-قاۋىمداستىققا دا تىكەلەي قاتىسى بار. سوندىقتان وسىنداي جۇيەلى ماسەلەنى وزگەرتۋدىڭ ءتيىمدى تەتىكتەرىن قاراستىرۋ ءۇشىن بىلىكتى ساراپشىلارمەن بىرلەسىپ تالقىلاۋدىڭ بەرەرى مول دەپ ەسەپتەيمىن, – دەدى ماۋلەن اشىمباەۆ.
سونداي-اق «نۇر وتان» پارتياسى توراعاسىنىڭ ءبىرىنشى ورىنباسارى بۇل جەردە ماسەلەلەر جاي تالقىلانىپ قانا قويىلماي, سونىڭ ناتيجەسىندە ناقتى ۇسىنىستار دايارلاناتىنىن جەتكىزدى. كەيىن ولاردى ۇكىمەت پەن پارلامەنتكە جولداۋ باعىتىندا جۇمىستار جۇرگىزىلمەك. ودان بولەك, وتىرىستىڭ الەۋمەتتىك جەلىدە تىكەلەي ەفيردە كورسەتىلگەنىنە نازار اۋدارعان ماۋلەن اشىمباەۆ: «بۇل پارتيانىڭ ەلمەن ەتەنە ءارى اشىق جۇمىس ىستەيتىنىن ايقىن دالەلدەيدى. وسىلايشا ءبىز قوعام بەلسەندىلەرى جانە بەلگىلى ساراپشىلارمەن تىعىز بايلانىس ورناتىپ, ەل دامۋىنا وڭ اسەرىن تيگىزەتىن تۇستاردى ايقىندايتىن بولامىز. بۇل ەلباسى جۇكتەگەن ستراتەگيالىق مىندەتتەردى جۇزەگە اسىرۋعا دا ءوز سەپتىگىن تيگىزەدى», دەدى.
پارتيانىڭ باستاماسىمەن قولعا الىنعان جوبانىڭ العاشقى تاقىرىبى شىن مانىندە وتە وزەكتى. سەبەبى ءالى كۇنگە دەيىن ەلىمىزدەگى بانك سەكتورى 2007 جىلعى قارجى داعدارىسىنىڭ سالدارىن تارتىپ كەلەدى. ءتىپتى كەيبىر جەكەلەگەن بانكتەر ايتارلىقتاي كەلەڭسىزدىكتەرگە تاپ بولىپ, جۇمىستارىن توقتاتۋعا دا ءماجبۇر بولعانىن بىلەمىز. وسىعان وراي مەملەكەت تاراپىنان بۇل سالاعا قارجىلاي قولداۋ كورسەتۋ ءىسى تۇراقتى تۇردە جۇرگىزىلۋدە. سوعان قاراماستان ەلىمىزدە نەسيە كولەمى ۇلعايماي, 2015 جىلعى دەڭگەيدە قالىپ وتىر. نەسيە ۇستەمەسى دە وتە جوعارى دەڭگەيدە.
وسىنداي ولقىلىقتاردىڭ الدىن الۋ ماقساتىندا ءتۇرلى مەملەكەتتىك باعدارلامالاردىڭ دا قولعا الىنعانى بەلگىلى. «بيزنەستىڭ جول كارتاسى-2020», «اگروونەركاسىپتىك كەشەندى دامىتۋ», «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ» سياقتى تىڭ باستامالار مەن «نۇرلى جەر»,
«7 – 20 – 25» سياقتى قولجەتىمدى تۇرعىن ءۇي باعدارلامالارى جۇمىس ىستەۋدە. وسىلايشا وتاندىق بانكتەردىڭ ولقى تۇستارى مەملەكەت ەسەبىنەن رەتتەلۋدە.
Nur Otan Trends الاڭىندا وسى ماسەلەلەرگە باسا نازار اۋدارىلىپ, ساراپشىلار وزدەرىنىڭ ناقتى ۇسىنىستارىن جەتكىزدى. اتاپ ايتقاندا, كوپشىلىككە «Halyk Finance» اكتسيونەرلىك قوعامى مەن «تالاپ» قولدانبالى زەرتتەۋلەر ورتالىعىنىڭ اتالعان ماسەلەنى وڭتايلى شەشۋگە باعىتتالعان جوبالارى تانىستىرىلدى. بۇل جوبالاردا نەسيە بەرۋدىڭ توقىراۋ سەبەبى, ەكونوميكاداعى قۇرىلىمدىق ماسەلەلەر, ءىرى بيزنەستەردىڭ بانك جۇيەسىنەن تىس قارجىلاندىرىلۋى, ەكونوميكاداعى مەملەكەتتىك كومپانيالار ۇلەسىنىڭ ءوسۋى سياقتى باعىتتار تولىققاندى ساراپتالىپ, ولاردى شەشۋدىڭ ناقتى مەحانيزمدەرى قاراستىرىلعان.
ءىس-شارانى قورىتىندىلاعان «نۇر وتان» پارتياسى توراعاسىنىڭ ءبىرىنشى ورىنباسارى بۇل باستامانىڭ دەر كەزىندە قولعا الىنعانىنا توقتالدى. ەندى پارتيا ەلدىڭ دامۋى جولىنداعى وزەكتى ماسەلەلەردى ۇدايى باستى نازاردا ۇستاپ, ولاردى وڭتايلى شەشۋ ءۇشىن وسىلاي بىلىكتى ساراپشىلارمەن بىرلەسىپ جۇمىس ىستەمەك.
– بۇگىن كوپتەگەن ۇتىمدى ويلار ايتىلدى. سونىڭ ناتيجەسىندە ماسەلەلەردىڭ سەبەبى مەن سالدارىن انىقتادىق. جوعارى ۇستەمەلى نەسيەلەردىڭ كەلەڭسىز تۇستارىنا نازار اۋداردىق. بۇل ماكروەكونوميكالىق تۇراقتىلىق, جەكەشەلەندىرۋ, شاعىن جانە ورتا بيزنەسكە جۇيەلى قولداۋ كورسەتۋ جانە نەسيە الۋشىلار مەن جالپى بانك جۇيەسىنە قاتىستى ماسەلەلەردى قامتيدى. وتىرىستا سولاردى شەشۋ جولدارىن تالقىلاپ, ەكونوميكامىز بەن وتاندىق بيزنەستى قارجىلاندىرۋدىڭ قولجەتىمدىلىگىن قامتاماسىز ەتۋ جايىن پىسىقتادىق, – دەدى ماۋلەن اشىمباەۆ.
جولدىباي بازار,
«ەگەمەن قازاقستان»
