سىزدەردى كۇللى مۇسىلمان قاۋىمى اسىعا كۇتكەن قاسيەتتى رامازان ايىنىڭ كەلۋىمەن شىن جۇرەكتەن قۇتتىقتايمىن! ءاربىر شاڭىراققا شاتتىق پەن باقىت, بىرلىك پەن بەرەكە تىلەيمىن! بارشاڭىزعا جاراتقان يەم جار بولسىن!
ءبىزدىڭ حالقىمىز ەجەلدەن رامازاندى ەرەكشە قاستەرلەپ: «ون ەكى ايدىڭ سۇلتانى», – دەپ اتاعان. بەرەكەسى مول ايدا جارامازان جىرىن ايتىپ, ورازانىڭ كەلگەنىن قۋانىشپەن جەتكىزىپ, ناسيحاتتاعان. ال اۋىزاشار داستارقانى رۋحاني سۇحباتتىڭ, باتا مەن ىزگى تىلەكتىڭ قاينارى بولعان. اۋىز بەكىتكەن ادامدى ايرىقشا قادىرلەپ, وعان اۋىزاشار بەرۋ – باعزىدان كەلە جاتقان سالت-ءداستۇرىمىز بەن ادەت-عۇرپىمىز.
تاڭعى سارەسى ءار شاڭىراق ءۇشىن قۋانىشتى ءسات بولسا, كەشكى اۋىزاشار اعايىن مەن تۋىستى, ءبىر قاۋىم ەلدى يماندىلىققا ۇيىتقان, مەرەكەسى مەن بەرەكەسى ۇيلەسكەن باسقوسۋ بولاتىن. اللاعا شۇكىر, بۇل يگى ءداستۇر عاسىردان عاسىرعا جالعاسىپ, جاڭعىرىپ كەلەدى.
رامازان – راقىم ايى. اللا ەلشىسى: «كىمدە-كىم رامازان ايىندا شىنايى سەنىممەن, ساۋابىن ءبىر اللادان ءۇمىت ەتىپ, ورازا ۇستاسا, بۇرىن-سوڭدى جاساعان كۇنالارى تۇگەلدەي كەشىرىلەدى», – دەگەن. قاسيەتتى ايدىڭ قۇرمەتى ءۇشىن ءبىر-ءبىرىن كەشىرىپ, مەيىرىمدىلىك جولىن ۇستانعان پەندەلەر ساۋاپقا كەنەلەدى. وزگەگە مەيىرىم كورسەتكەن ادامعا اللا تاعالا ونى مەيىرىمىنە بولەيدى. كەشىرگەنگە – كەشىرىم جاسالادى.
رامازان – جاقسىلىق ايى. ورازادا ءاربىر جاقسى امالدىڭ ساۋابى ەسەلەنىپ جازىلادى. حاديس-شاريفتە ايتىلعانداي, «ادام بالاسىنىڭ بارلىق يگى ىستەرىنىڭ ساۋابى ارتادى. ءاربىر جاقسىلىققا ون ەسەدەن جەتى ءجۇز ەسەگە دەيىن ساۋاپ جازىلادى». ومىراۋدا بالاسى بار, دەنساۋلىعى جارامايتىن, كارىلىك جەتكەن قارتتارىمىز اۋىز بەكىتكەن كىسىلەرگە اۋىزاشار بەرسە, ول دا – ابزال امالدىڭ ءبىرى.
وسى رەتتە وتانداستارىمدى ماتەريالدىق كومەككە مۇقتاج جاندارعا كوڭىل ءبولىپ, قايىرىمدىلىق ءىس-شارالارعا بەلسەندى تۇردە اتسالىسۋعا شاقىرامىن. كاسىپكەرلەردى رامازاننىڭ قۇرمەتى ءۇشىن ازىق-ت ۇلىك, كوكونىس پەن تۇرمىستىق زاتتارعا, جول-كولىك اقىسىنا جەڭىلدىكتەر جاساۋعا ۇندەيمىز.
رامازان – تاربيە ايى. اۋىز بەكىتكەن ادام ءتىلىن جامان سوزدەن تەجەيدى. ويتكەنى ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىم بولسا دا ورازا ۇستاعان كۇنى جامان ءسوز ايتپاسىن, ءارى ەشكىمگە داۋىس كوتەرمەسىن...», – دەپ وسيەت ەتكەن. راسىندا, اللا تاعالا ءۇشىن ءتىلىن وتىرىك پەن عايبات سوزدەن تىيماعان پەندەسىنىڭ ۇستاعان ورازاسى قاجەت ەمەس.
رامازان – قاسيەتتى قۇران تۇسكەن اي. بۇل ايدا ادام بالاسىن تۋرا جول مەن باقىتقا باستايتىن, اقيقات پەن جالعاننىڭ اراجىگىن اجىراتاتىن قۇران اياتتارى تۇسە باستادى. ورازا كەزىندە قۇراندى كەمىندە ءبىر رەت تولىق وقۋدىڭ, ءمان-ماعىناسىن كوڭىلگە توقۋدىڭ ساۋابى ايرىقشا.
رامازان – سابىر ايى. اۋزى بەرىك ادام كەيبىر كىسىلەردىڭ دورەكى ءسوزى مەن ادەپسىز ارەكەتىنە سابىر ساقتاپ: «مەن ورازامىن», – دەگەن سوزبەن ناپسىسىنە توقتاۋ سالىپ, توزىمدىلىك تانىتادى. ال سابىر يەسىنە بەرىلەتىن سىي – ءجاننات.
رامازان – وزگەرۋ ايى. قاسيەتتى قۇران كارىمنىڭ «راعىد» سۇرەسىنىڭ 11-اياتىندا: «قايبىر قاۋىم ءوزىن-ءوزى وزگەرتپەيىنشە, اللا ونى وزگەرتپەيدى», – دەپ باياندالعان.
ورازادا ادامنىڭ تۇلا بويى ىزگىلىككە تولىپ, سانا-سەزىمى وزگەرەدى. بۇل – قابىل بولعان ورازانىڭ كورىنىسى. ءوزىن وزگەرتۋگە تىرىسقان پەندە جاراتقاننىڭ جارىلقاۋىنا كەنەلەدى.
قۇرمەتتى جاماعات! قازاقستان مۇسىلماندارى ءدىني باسقارماسى «2018 – يسلام جانە وتباسى جىلى» دەپ اتادى. قاسيەتتى ايدا قاراۋسىز قالعان قارتتار مەن مۇگەدەكتەرگە, جەتىمدەر مەن كوپبالالى وتباسىلارعا, ناۋقاس ادامدارعا بارىنشا قامقورلىعىمىزدى كورسەتەيىك, ارداقتى اعايىن! ءبىر ادامدى قۋانىشقا بولەۋ – ساداقا.
قۇدايى استار مەن ساداقالار اۋىزاشار ۋاقىتىندا ۇيىمداستىرىلسا, تويلار ىشىمدىكسىز وتكىزىلسە, جاماندىقتىڭ باستاۋى بولعان اراق-شاراپتىڭ ساتىلۋىنا بارىنشا جول بەرىلمەسە دەگەن تىلەگىمدى بىلدىرەمىن.
رامازان ايىنداعى ساۋاپتى امالدىڭ ءبىرى – ءپىتىر ساداقاسىن بەرۋ. ءپىتىر ساداقاسى باسپاناسى, جيھازدارى, كولىگى, قۇرالدارى مەن كيەر كيىمىنەن بولەك ارتىق مال-مۇلكى بار كەز كەلگەن ازات مۇسىلمانعا – مىندەت. ءپىتىر ساداقاسىن رامازان ايىنىڭ ءبىرىنشى كۇنىنەن باستاپ, ورازا ايت نامازىنا دەيىن بەرۋ مىندەتتى. بۇل شاريعات تالابى ورىندالۋى شارت. ءپىتىر ساداقاسىن پاقىرعا, مىسكىنگە بەرۋگە بولادى. ءپىتىر ساداقا – پەندەنىڭ رامازان ايىندا جىبەرگەن قاتە-كەمشىلىكتەرىنىڭ وتەۋى.
قۇرمەتتى قاۋىم! ون ەكى ايدىڭ سۇلتانى – رامازان قۇتتى, بەرەكەلى بولسىن! قاسيەتتى ايدا جاسايتىن قۇلشىلىق, دۇعا-تىلەكتەرىڭىز قابىل بولسىن! العا قويعان ارمان-ماقساتتارىڭىز ورىندالىپ, ورازادان ورازاعا امان-ەسەن جەتە بەرۋىمىزدى اللا ءناسىپ ەتسىن! ەلىمىز امان, جۇرتىمىز تىنىش, حالقىمىزدىڭ بىرلىگى نىعايىپ, بەرەكەسى ارتا بەرگەي! تاۋەلسىزدىگىمىز ارقاشان باياندى بولعاي! ءاۋمين!
سەرىكباي قاجى وراز,
قازاقستان مۇسىلماندارى
ءدىني باسقارماسىنىڭ توراعاسى, باس ءمۇفتي
