يران باسشىلىعىن ءتۇسىنۋ قيىن. ءسوزى مەن ءىسى بولەك. ءوزىنىڭ يادرولىق باعدارلاماسى بەيبىت ماقساتتى كوزدەيدى دەيدى دە, سوعان قايشى ارەكەتكە بارادى. ال ۋراندى 20 پايىزعا دەيىن بايىتۋ ودان يادرولىق قارۋ جاساۋعا مۇمكىندىك بەرەدى. وسى اپتانىڭ باسىندا بۇل ەل سول ۋراندى 20 پايىزعا بايىتۋ ۇدەرىسىن باستاپ كەتتى.
راس, ولار مۇنى جاسىرماي, اشىق ايتتى. بىراق بۇدان ماسەلەنىڭ ءمانى وزگەرمەيدى. ەندى يراننىڭ يادرولىق قارۋ جاساۋىنان قاۋىپتەنەتىن جۇرت بۇل ەلگە قاتاڭ شارا قولدانۋدى تالاپ ەتىپ وتىر. ءسىرا, يران مەن ونىڭ يادرولىق باعدارلاماسىنا قارسى ەلدەردىڭ اراسىنداعى قايشىلىق ءورشي تۇسەتىن ءتۇرى بار.
اقشانى ايىرباستاپ قاتەلەستى
كحدر-دا وتكەن جىلدىڭ اياعىندا اقشا رەفورماسى جۇرگىزىلگەن بولاتىن. ونىڭ تالاپتارىمەن تانىسقاننان كەيىن بۇل شارانىڭ حالىققا ءتيىمسىز بولاتىنى, ازىق-ت ۇلىك ونىمدەرىنىڭ تاپشىلىعىنا سوقتىراتىنى تۋرالى پىكىرىمىزدى دە بىلدىرگەنبىز. ەل ۇكىمەتىنىڭ باسشىسى كيم چەن ير جاقىندا جۇرتشىلىق الدىندا اقشا ايىرباستاۋدىڭ جەتە ويلاستىرىلماي جۇزەگە اسىرىلعانى ءۇشىن حالىقتان كەشىرىم سۇراپ, مالىمدەمە جاسادى. سول رەفورماعا بايلانىستى شەتەل ۆاليۋتاسىنىڭ قولدانىسىنا تىيىم سالىنىپ, كاسىپكەرلەردىڭ ازىن-اۋلاق ارتىق اقشالارى كۇيىپ كەتكەن ەدى. ۇكىمەت باسشىسى جىبەرىلگەن قاتەلىكتەردى تەز جويۋعا ۋادە بەردى.
قولبالا پرەزيدەنت ءۇشىن
قىرعىزستاننىڭ كونستيتۋتسيالىق سوتى پرەزيدەنت ق.باكيەۆتىڭ ۇسىنىسىمەن ەل كونستيتۋتسياسىنا وزگەرىس ەنگىزدى. ەندى ەل باسشىسى قىزمەتىن اتقارا المايتىن جاعداي تۋسا, مەملەكەت باسىندا وتىرعان شاعىن توپ ۋاقىتشا پرەزيدەنت تاعايىندايتىن بولادى. مۇنداي وزگەرىس نە قاجەتتىلىكتەن تۋدى دەگەن ساۋالعا جۇرت جاۋاپ ىزدەيدى. پرەزيدەنت ق.باكيەۆتىڭ دەنساۋلىعى دا قاۋىپ تۋدىراتىنداي ەمەس سياقتى. ساراپشىلاردىڭ كوپشىلىگى مۇنى قازىرگى پرەزيدەنتتىڭ قالاي دا بيلىكتى ءوز ادامىنا ۇستاتۋ ماقساتىنان تۋعان دەيدى.
تارتىپ العان اس بولمايدى
زيمبابۆەدە بارلىق كومپانيالاردىڭ باسىندا جەرگىلىكتى ءناسىلدىڭ وكىلدەرى بولۋى كەرەك دەگەن تالاپ قويىلىپ وتىر. ياعني, كەز كەلگەن اق ءناسىلدى كاسىپكەر ءوز اكتسياسىنىڭ 51 پايىزىن قارا ءناسىلدى كاسىپكەرگە بەرۋگە ءتيىس. ايتپەسە تۇرمەگە وتىرادى. سىرت قاراعاندا, بارلىق نارسە جەردىڭ يەسىنە بەرىلۋى كەرەك دەگەن يدەيانى قۇپتاۋعا دا بولعانداي. بىراق بۇل ەشقانداي اقىلعا سىيمايتىن شارانىڭ پايداسىنان گورى, زيانى كوپ. زورلىقپەن جۇرگىزىلگەن شارادان كەيىن تالاي كومپانيانىڭ كۇيرەيتىنى انىق. وسى ەلدە بۇعان دەيىن جۇرگىزىلگەن سولاقاي رەفورمالاردىڭ سالدارىنان ءبىر كەزدە بۇكىل افريكانىڭ ازىق-ت ۇلىك قويماسى سانالعان زيمبابۆەدە ينفلياتسيانىڭ دەڭگەيى 100 مىڭ پايىزدان اسىپ, ول قۇرلىقتاعى ەڭ كەدەي ەلدىڭ بىرىنە اينالدى.
“كەنەتتەن چاۆەستەن”
ۆەنەسۋەلا پرەزيدەنتى ۋگو چاۆەس سوڭعى كەزدەردە جۇرت كۇلەتىندەي ارەكەتتەرگە بارىپ ءجۇر. بىردە ەلەكتر ەنەرگياسىن ۇنەمدەۋ ءۇشىن قولشامدى پايدالانۋدى ۇسىنسا, بىردە سۋدى ۇنەمدەۋ ءۇشىن ازىراق شومىلۋعا كەڭەس بەرەدى. ونىڭ باستى ءبىر قۇمارلىعى – تەلەارنالارعا شىعۋ. جەكسەنبى سايىن ءۇش ساعاتقا سوزىلاتىن “سويلەس-اۋ, پرەزيدەنت” حابارىنا جۇرتتىڭ ەتى ۇيرەنگەن. قۇپ كورسە قالاعان ۋاقىتتا مەملەكەتتىك ارنالاردا سويلەپ كەتەدى. سونداي-اق جەكسەنبى كۇندەرى گازەتتەردە “چاۆەستىڭ جازعاندارى” دەگەن ايدارمەن ونىڭ ماقالالارى جاريالانادى. ەندى وعان راديو قوسىلىپ وتىر. بۇدان بىلاي “كەنەتتەن چاۆەستەن” دەگەن باعدارلاما داستۇرگە اينالماق. جانە پرەزيدەنت قالاعان كەزىندە, ءتىپتى تۇنگى ۇشتە سويلەۋى مۇمكىن.
بايلار دا سوتتالادى ەكەن
تۇركيادا ەلدەگى ەڭ باي ادامداردىڭ ءبىرى مەحمەت قارامەحمەت ءوزىنىڭ بۇرىنعى بانكىنىڭ قارجىسىن تالان-تاراجعا سالعانى ءۇشىن 11 جىل سەگىز ايعا تۇرمەگە جابىلماق. ءوزىنىڭ مەنشىگىندەگى Pamubank-تەن العان نەسيەنى قايتارماعانى ءۇشىن مەملەكەت ونى 2002 جىلى ۇلت مەنشىگىنە وتكىزىپ جىبەرگەن ەدى. ەندى ميللياردەردىڭ سول بانكتىڭ قارجىسىن قالاي ىسىراپ ەتكەنى انىقتالىپ وتىر.
ازىرلەگەن ماماديار جاقىپ.
