تۇركولوگ عالىمدارمەن كەڭەسۋ بارىسىندا تىزىمگە ەنبەي, ەسكەرۋسىز قالعان تاريحي ورىندارعا ارحەولوگيالىق قازبا جۇمىستارىن جۇرگىزۋ جايى ءسوز بولدى. ءوز كەزەگىندە دارحان قىدىرالى تولە بي اۋدانىنداعى ەسىم حاننىڭ ورداسى بولعان تاريحي ماڭىزى بار جەردى مەملەكەتتىك دەڭگەيدە قورعاۋعا الىپ, ارحەولوگيالىق زەرتتەۋ جۇمىستارىن جۇرگىزۋدى ۇسىندى. مۇنى قولداعان ايماق باسشىسى, عالىمدار توبىن تارتىپ اتالعان نىسانعا زەرتتەۋ جۇمىستارىن جۇرگىزۋگە باستاماشى بولاتىنىن ايتتى.
باسقوسۋدا ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان مىندەتتەردى ىسكە اسىرۋ جايى تالقىلاندى. جيىن بارىسىندا ءوڭىر باسشىسى عالىمداردى وبلىس اۋماعىنداعى ماڭىزدى تاريحي نىساندار تۋرالى ماعلۇمات جيناستىرىپ, ارنايى سەريامەن كىتاپ شىعارۋعا اتسالىسۋعا شاقىردى.
«وزدەرىڭىز بىلەسىزدەر, وڭتۇستىك ءوڭىرى تاريحقا باي ولكە. ءالى دە زەرتتەۋدى قاجەت ەتەتىن دۇنيەلەر, زەرتتەلگەنىنەن كوپ. سوندىقتان وسىعان ءمان بەرۋىمىز كەرەك. وبلىستاعى بارشا تاريحي جانە مادەني جەرلەردىڭ ءتىزىمىن جاساپ, ولار تۋرالى مالىمەتتەردى جيناقتاپ, كىتاپتار سەرياسىن شىعارۋدى جانداندىرۋ كەرەك دەپ ويلايمىن. مىنە, وسى ءىستى قارقىنمەن اتقارۋعا شاقىرامىن», - دەدى جانسەيىت تۇيمەباەۆ.
سونداي-اق, اتاقتى تۇركولوگتاردىڭ باسىن قوساتىن كەلەلى كەڭەستىڭ ءبىرىن وڭتۇستىكتە ۇيىمداستىرۋ ماسەلەسى دە قوزعالدى.
