ماعان سەنبەسەڭىز, مونتايعا كەلىپ كورىڭىزشى; دوسقارا كوكەمنىڭ اياق-قولى بالعا... جو-جوق, جاي بالعانى ايتايىن دەپ وتىرعانىم جوق, ناعىز كۋال (كۋۆالدا) بالعاداي. تۇلا بويى قۇم تولتىرعان قاپ سەكىلدى – قاپ-قاتتى, شىپ-شىمىر. ال جۇگىرگەن كەزدە, ونىڭ شاڭىنا ءوزىڭىز تۇرماق, كوزىڭىز دە ىلەسە الماي قالادى.
فۋتبول الاڭىندا قارسىلاستارىن ەرەجەگە ساي يىقپەن قاققاندا, كەيبىرەۋلەرى تالتىرەكتەپ, جيەكتەگى سىزىقتىڭ سىرتىنا شىعىپ كەتىپ جاتادى. ونىڭ ۇستىنە شاشى دا بۇيرا. ءوڭى بولسا, قاراتورى. ءبىر سوزبەن ايتقاندا, الەمگە ايگىلى ارگەنتينالىق فۋتبولشىنىڭ ءبىزدىڭ مونتايدا تۋعان ءبىر ۇلگىسى. سىڭارى. ارىپتەسى.
سوندىقتان دوسقارا كوكەم فۋتبول ويناعاندا اۋزىمىز اشىلىپ, كوزىمىز باقىرايىپ, ايقايلاپ-شۋلاپ ناعىز فانات جانكۇيەرگە اينالىپ كەتەمىز. ول دا سونى بايقاپ, كەيدە ءبىزدىڭ كوڭىلىمىز ءۇشىن ءبىر الداپ وتكەن قارسىلاسىن بىرنەشە رەت الداپ, ءارتۇرلى فينتتەر جاساپ, ەسىنەن تاندىرىپ كەتەدى. وندايدا الاڭ شەتىندەگى جانكۇيەرلەر ءماز بولىپ, ىشەك-سىلەسى قاتا ك ۇلىپ, «انە, كوردىڭ بە» دەگەندەي ءبىر-ءبىرىن بۇيىردەن ءتۇرتىپ جاتادى.
دوسقارا كوكەم اۋەلى كوشەنىڭ, سودان سوڭ اۋىلدىڭ, سونسوڭ بارىپ, نەبارى ون التى جاسىندا بۇكىل كەڭشاردىڭ قۇراما كومانداسىنىڭ كاپيتانى بولدى. ول ويناعان كوماندانىڭ ءسوزسىز جەڭەتىنىنە ءبىز ەشقاشان دا كۇماندانبايتىنبىز.
بىراق سونا-ا-اۋ شولەيت دالانىڭ ءبىر تۇكپىرىندەگى الاقانداي اۋىل – اينالايىن مونتاي – ارگەنتينا ەمەس قوي. سوندىقتان ونىڭ فۋتبولىنىڭ مىناۋ ايداي الەمگە تانىلا قويۋى قيىن. سول سەبەپتى مارادوناعا بۇيىرعان باقتىڭ دوسقارا كوكەمە بۇيىرماسى دا انىق...
ال ۋاقىت, شىركىن, كىم-كىمگە دە ءوز شارتىن قويادى. تاماق ىشكىڭ كەلە مە, ەڭبەك ەت. ۇرپاق سۇيەمىن دەيسىڭ بە, ۇيلەن. شاڭىراق كوتەر. بالا-شاعاڭدى اسىرا.
مىنە, سونى ورىنداۋ ءۇشىن دوسقارا كوكەم تالاي-تالاي جۇمىستىڭ باسىن شالدى. دالىرەك ايتساق, تراكتور ايدادى, ءشوپ شاپتى, مال باقتى, قورا تازالادى. تەك فۋتبول ويناۋعا مۇرشاسى, ۋاقىتى بولعان جوق.
سەبەبى ءبىزدىڭ مونتاي, شىنىندا دا, ارگەنتينا ەمەس قوي.
نۇرعالي وراز,
«ەگەمەن قازاقستان»
