ەۋرازيالىق ينتەگراتسيا ينستيتۋتىنىڭ ۇيىمداستىرۋىمەن وتكەن جيىنعا پارلامەنتى ءماجىلىسىنىڭ دەپۋتاتتارى, ۇلتتىق اۋدارما بيۋروسىنىڭ جانە عىلىمي-ساراپشىلىق قاۋىمداستىعىنىڭ وكىلدەرى, سونداي-اق قازاقستان حالقى اسسامبلەياسىنىڭ XXVI سەسسياسىنىڭ وكىلدەرى قاتىسىپ, قىزۋ تالقىلاۋ ءجۇرىلدى. پىكىر الماسۋ بارىسىندا قاتىسۋشىلار ۇلتتىق اۋدارما بيۋروسىنىڭ قىزمەتىمەن, قازاق تىلىندەگى العاشقى 18 تاڭداۋلى وقۋلىقتاردى جارىققا شىعارۋدىڭ ەرەكشەلىكتەرىمەن جان-جاقتى تانىستى.
«بۇل جيىننىڭ ماقساتى – 100 جاڭا وقۋلىقتى قازاق تىلىنە اۋدارۋ بويىنشا جوبانىڭ ماڭىزدىلىعىنا, سونداي-اق التى جالپىۇلتتىق جوبانى ىسكە اسىرۋعا قوعامنىڭ قاتىسۋ پەرسپەكتيۆاسى تۋرالى ساراپتامالىق پىكىردى جالپىلاۋ», دەدى اتالعان ينستيتۋتتىڭ شارتتىق زەرتتەۋلەر دەپارتامەنتىنىڭ ديرەكتورى داۋرەن ەرمەك ۇلى بازاروۆ.
جيىندا پارلامەنتى ءماجىلىسىنىڭ دەپۋتاتى گەننادي شيپوۆسكيح, ل.ن. گۋميلەۆ اتىنداعى ەۇۋ پروفەسسورى, ەۋرازيالىق زەرتتەۋلەر كافەدراسىنىڭ مەڭگەرۋشىسى نۇربەك شاياحمەتوۆ جانە وزگە قاتىسۋشىلار ءسوز سويلەپ, سانا مودەرنيزاتسياسى گۋمانيتارلىق بىلىمگە تىكەلەي بايلانىستى بولعاندىقتان تاريح پەن ساياساتتانۋ, الەۋمەتتانۋ مەن فيلوسوفيا, پسيحولوگيا, ەكونوميكا, انتروپولوگيا, مادەنيەتانۋ, فيلولوگيا مەن پەداگوگيكا عىلىمدارى بويىنشا ستۋدەنتتەرگە زامانعا لايىق ءبىلىم بەرۋگە قاجەتتى جاعداي جاساۋ قاجەتتىگى تۇرعاندىعىن العا تارتتى.
وسى ورايدا وقۋلىقتىڭ اۋدارىلۋ بارىسىن بايانداعان ۇلتتىق اۋدارما بيۋروسى جوبا جەتەكشىسى قيسىباي الىبەك: «بەلگىلىنگەن شارتتارعا سۇيەنە وتىرىپ بيىلعا 18 وقۋلىق تاڭدالدى. ىرىكتەلگەن وقۋلىقتاردى اۋدارۋ جۇمىسىنا قازاقستاننىڭ الدىڭعى قاتارلى وقۋ ورىندارى مەن 200-گە جۋىق مامان قاتىستى. جوسپارعا ساي, بۇل وقۋلىقتار مامىر ايىنىڭ سوڭىنا دەيىن جوعارى وقۋ ورىندارىنا جەتكىزىلەدى. 2018-2019 وقۋ جىلىنان باستاپ اۋدارىلعان وقۋلىقتار جوعارعى ءبىلى بەرۋ جۇيەسىنە ەنەدى. قازاقستاننىڭ بارلىق جوعارى وقۋ ورىندارى وسى وقۋلىقتارمەن وقىتا باستايدى», دەدى.
ۇلاربەك نۇرعالىم ۇلى,
«ەگەمەن قازاقاستان»
