قازاق كينوسى اپتالىعىنىڭ اشىلۋ سالتاناتىنا ومان سۇلتاندىعىنىڭ زيالى قاۋىمى, ىسكەرلىك جانە مادەني ۇيىمدار وكىلدەرى, سونىمەن قاتار ديپلوماتيالىق كورپۋستىڭ وكىلدەرى مەن ومان سۇلتاندىعىندا تۇراتىن قازاقستان ازاماتتارى قاتىسادى.
قازاقستان رەسپۋبليكاسىنىڭ ومان سۇلتاندىعىنداعى توتەنشە جانە وكىلەتتى ەلشىسى ەرجان مۇقاش اتالمىش مادەني شارا قر پرەزيدەنتى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان مىندەتتەردىڭ ءبىرى – «جاھانداعى زاماناۋي قازاقستاندىق مادەنيەت» جوباسى اياسىندا وتكىزىلىپ جاتقانىن جانە وسىنداي ءىس-شارالار ەكى ەل اراسىنداعى ەكىجاقتى ىنتىماقتاستىقتى ودان ءارى نىعايتۋعا كەڭ مۇمكىندىك بەرەتىنىن ايتتى.
ماسكاتتا ءوتىپ جاتقان قازاق كينوسى اپتالىعى رەجيسسەر اقان ساتاەۆتىڭ «اناعا اپارار جول» فيلمىمەن اشىلدى. ال 5 مامىردا وماندىقتار قازاق حاندىعىنىڭ قۇرىلۋى تۋرالى باياندايتىن, رەجيسسەرى رۇستەم ابدىراشەۆتىڭ «الماس قىلىش» تاريحي ءفيلمىن تاماشالايتىن بولادى.
ايناش ەسالي,
«ەگەمەن قازاقستان».
الماتى
