1 مامىر قازاقستان حالقىنىڭ بىرلىگى كۇنىنە وراي اتىراۋدا العاش رەت Street Workout-تان قالالىق ءتۋرنيردىڭ العاشقى كەزەڭى ءوتتى.
ق.سماعۇلوۆ الاڭىندا باستالعان ىرىكتەۋ كەزەڭىندە 30-عا جۋىق قاتىسۋشى نيەت ءبىلدىردى. سايىس بەلتەمىرگە قوسىمشا سالماقتى بەلىنە بايلاپ الىپ تارتىلۋ, بەلتەمىردەن كەۋدەنى اسىرا تارتىلۋ جانە سىرىقتاعى جاتتىعۋ كەزەڭدەرىنەن تۇردى.
- العاشقى كەزەڭدە جارىستى قىزىعىپ كورۋشىلەر سانى كوپ بولدى. بۇنىڭ ءوزى Street Workout-تىڭ جاستار اراسىندا سۇرانىسقا يە ءارى قولجەتىمدى سپورت ەكەنىنىڭ دالەلى. وسى سپورت ءتۇرىن دامىتۋ ماقساتىندا قالامىزدا ءتورت Street Workout الاڭدارى اشىلعان بولاتىن. بولاشاقتا حالىق سۇرانىسى كوبەيىپ جاتسا, اتالعان سپورت الاڭدارىن كوبەيتەمىز, - دەيدى قالالىق سپورت ءبولىمىنىڭ باسشىسى رينات يبراگيموۆ.
سايىستىڭ ەڭ جاس قاتىسۋشىسى – 12 جاسار ارمان ىبىراي. ول بارلىق جاتتىعۋ بويىنشا 31 ۇپاي جيناپ, ەرەسەكتەرمەن بىردەي دارەجەدە سىنعا ءتۇستى. ۇيىمداستىرۋشىلار ارماندى «جەڭىسكە دەگەن جىگەرى ءۇشىن» ارنايى ديپلوممەن ماراپاتتادى. وزگە دە جارىس جەڭىمپازدارىنا ارنايى ديپلوم, مەدالدار مەن باعالى سىيلىقتار تابىس ەتىلدى.
ايتا كەتۋ كەرەك, قالالىق تۋرنيرگە ىرىكتەۋدىڭ ەكىنشى كەزەڭى 7 مامىر كۇنى ۆوكزال ماڭى 5-ءى مولتەك اۋدانىندا وتەدى. ۇزدىك شىققان 5 قاتىسۋشى 1 ماۋسىم كۇنى وتەتىن اقتىق سايىسقا جولداما الادى.
