اقتىق سايىس قالانىڭ ورتالىق مەشىتىندە ءوتتى. قاريلەرگە قويىلعان باستى تالاپ قۇران سۇرەلەرىن جاتقا وقىپ قانا قويماي, مانىنە ساي مانەرلەپ, اۋەزى مەن ناقىشىنا كەلتىرىپ جەتكىزۋ. قاتىسۋشىلار قۇراننىڭ 10 پاراسىن جاتقا وقۋ, قۇراندى مانەرلەپ وقۋ, 20 پارا قۇراندى جاتقا ايتۋ جانە قاسيەتتى كىتاپتى تولىق جاتقا وقۋ سىندى ءتورت باعىت بويىنشا باق سىنادى. ءار ايماقتان سۋىرىلىپ شىققان قاريلاردىڭ دەڭگەيى جوعارى بولعاندىقتان ءادىل-قازىلار القاسى ءۇشىن جەڭىمپازدى انىقتاۋ وڭاي بولعان جوق. باس جۇلدەگەردەن بولەك, قۇراندى مانەرلەپ وقۋدان 1 ورىن العان قاتىسۋشىعا 500 مىڭ تەڭگە, 10 پارا بويىنشا جەڭىمپاز دەپ تانىلعان جانعا 1 ميلليون تەڭگە, 20 پارا بويىنشا كوش باستاعان قاتىسۋشىعا 1 ميلليون 500 مىڭ تەڭگە تابىستالدى. وعان قوسا ءار وڭىردەن كەلىپ قاتىسىپ جۇلدەلى ورىندارعا يە بولا الماعان قاريلارعا دا ارنايى العىس حات پەن 50 مىڭ تەڭگە كولەمىندە قارجىلاي سىياقى بەرىلدى.
«باستى ماقسات ءبىزدىڭ اتا-بابامىزدىڭ ءدىنى يسلامنىڭ كىتابى قۇراندى ناسيحاتتاۋ. قۇراندى جاتتاۋدى ناسيحاتتاۋ. قۇراندى جاتتاعان قاريلاردى حافيزداردى ىنتالاندىرۋ. قۇران كارىمدى جاتقا جانە مانەرلەپ وقۋ بويىنشا الەمدە حالىقارالىق جارىستار وتەدى. بۇگىنگى جارىستى سول حالىقارالىق جارىستارعا بارۋعا لايىقتى قاريلاردى, قۇراندى جاتتاعان مامانداردى انىقتاۋ ءۇشىن وتكىزىپ وتىرمىز», - دەيدى الماتى قالاسىنىڭ باس يمامى ەركىنبەك شوقاي.
جارىستىڭ سوڭعى كۇنى اللانى ۇلىقتايتىن اندەر شىرقالىپ, سالاۋات ايتىلدى. جينالعان جاماعاتتى قۇتتىقتاعان باس ءمۇفتي قازاقستاندا قۇراندى جاتقا بىلەتىن قاريلاردىڭ كوبەيىپ كەلە جاتقانىن تىلگە تيەك ەتتى.
«كەشەگى ناۋبەتتىك كەزەڭدە بىزدە مۇلدە قۇراندى تولىق جاتتاپ, وقىپ نەمەسە ۇيرەتەتىن ءداستۇرلى مەكتەپ بولعان جوق. بۇگىنگى تاڭدا ءبىزدىڭ ەلىمىزدە قۇران قاريلارىن دايىندايتىن ءتورت بىردەي وقۋ ورنى جۇيەلى تۇردە جۇمىس ىستەپ كەلە جاتىر. سونىڭ ناتيجەسىندە 500-ءدىڭ ۇستىندە قۇران قاريلارىمىز بار. دەمەك, ول بولاشاقتا ارتا بەرەدى دەگەن ءسوز» - دەيدى قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي سەرىكباي قاجى وراز ۇلى.
ارمان وكتيابر,
«ەگەمەن قازاقستان»
الماتى
