ماقساتى - عىلىمدى, ونەركاسىپتى جانە بيزنەستى بىرىكتىرۋ. ءوندىرىستى ءوڭىردىڭ دامۋ بولاشاعىنا ارنالعان فورۋمعا ەلىمىزدىڭ جانە جەرگىلىكتى مەملەكەتتىك باسقارۋ ورگاندارىنىڭ, دامۋ ينستيتۋتتارى, ۇلتتىق كومپانيالار, ينۆەستيتسيالىق كومپانيالاردىڭ وكىلدەرى قاتىستى.
پلەنارلىق ماجىلىستە وبلىس اكىمىنىڭ ورىنباسارى جايىق شاراباسوۆ, اقسۋ قالاسىنىڭ اكىمى نيكولاي دىچكو, س. تورايعىروۆ اتىنداعى مەملەكەتتىك ۋنيۆەرسيتەت رەكتورى گاۋحار احمەتوۆا سوز سويلەپ, ەكونوميكالىق فورۋمنىڭ ماڭىزدىلىعىنا ارنالعان جوسپار-جوبالارىمەن ءبولىستى.
وتىرىس بارىسىندا تاۋار وندىرۋشىلەر تۇراقتى ينۆەستورلارمەن ءوزارا كەلىسسوزدەر جۇرگىزدى. اۋىل شارۋاشىلىعى سالاسى دا كەڭىنەن قامتىلدى. جوعارى وقۋ ورىندارىنىڭ عالىمدارى, بيزنەس وكىلدەرى وزدەرىنىڭ يننوۆاتسيالىق عىلىمي جوبالارىن ۇسىندى.
فورۋم سوڭىندا قالا اكىمدىگى مەن مەملەكەتتىك ۋنيۆەرسيتەتى ءوزارا ىنتىماقتاستىق تۋرالى مەموراندۋمعا قول قويدى. رەكتورى گ. احمەتوۆانىڭ ايتۋىنشا, بۇگىنگى كۇنى جاڭاشىل يننوۆاتسيالىق تەحنولوگيالارسىز ەنەرگيا ۇنەمدى جانە ەنەرگيالىق تيىمدى كاسىپورىنداردى كوزگە ەلەستەتۋ مۇمكىن ەمەس.
- بۇل فورۋمنىڭ ءبىلىم, عىلىمي قاۋىمداستىق جانە وڭىردىڭ وندىرىس الىپتارى وكىلدەرىنىڭ قاتىسۋىمەن ءوتىپ جاتقانى قۋانتادى. ءبىزدىڭ ۋنيۆەرسيتەت شاعىن جانە ورتا بيزنەس كاسىپورىندارىمەن بىرلەسىپ جۇمىس ىستەۋ جولىندا سەرىكتەس بولۋعا دايىن. عالىمدارىمىز ءوڭىردىڭ ءىرى ونەركاسىپتەرىندە زاماناۋي تەحنولوگيالاردى دامىتۋعا ءوز جوبالارىن ۇسىنۋعا ءازىر, - دەيدى.
سەكتسيالىق وتىرىستاردا ۋنيۆەرسيتەت عالىمدارى ەنەرگەتيكا, مەتاللۋرگيا, قۇرىلىس, حيميالىق تەحنولوگيالار جانە اۋىل شارۋاشىلىعى سالالارى بويىنشا بايانداما جاسادى. ۋنيۆەرسيتەتتەردىڭ تەحنولوگيالىق كاسىپكەرلىك جانە قايتا وڭدەۋ ونەركاسىبىنىڭ دامۋىنا سەپ بولاتىن عىلىمي-تاجىريبەلىك جوبالارى قاتىسۋشىلار تاراپىنان قىزىعۋشىلىق تۋدىردى.
ۋنيۆەرسيتەت پەن مەن اقسۋ قالاسىنىڭ اكىمدىگى اراسىنداعى ىنتىماقتاستىق ماقساتىندا مەموراندۋمعا قول قويىلدى. كەلىسىم نەگىزىندە بىرلەسكەن عىلىمي جانە زەرتتەۋ قىزمەتىن جۇزەگە اسىرۋ, سەمينارلار مەن ارنايى كۋرستاردى ۇيىمداستىرۋ, وقىتۋشىلىق-پروفەسسورلىق قۇرامنىڭ بىلىكتىلىگىن ارتتىرۋ مۇمكىندىگى, سونداي-اق, الەۋمەتتىك سەرىكتەستىكتى دامىتۋ كوزدەلگەن.
فورۋم سوڭىندا اقسۋ جانە قالاعا قاراستى اۋىلداردىڭ دا الەۋمەتتىك-ەكونوميكالىق دامۋى تانىستىرىلىپ, جەرگىلىكتى كاسىپورىنداردىڭ ونىمدەرى كورسەتىلدى.
فاريدا بىقاي,
«ەگەمەن قازاقستان»
پاۆلودار
