رەسەيدىڭ يامال-نەنەتس اۆتونوميالىق وكرۋگىنەن وڭىرگە كەلگەن دەلەگاتسيا مۇشەلەرى ەڭسەلى وقۋ ورنىندا كەزدەسۋ وتكىزىپ, ەكولوگيالىق ەكسپەديتسيانىڭ ماقسات-مىندەتتەرىمەن تانىستىردى. وسىدان 5 جىل بۇرىن باستاۋ العان ماڭىزدى شاراعا رەسەي, اۋستريا, بولگاريا, ۋكراينا, قىتاي جانە كۋبا ەلدەرىنەن 160-تان استام وكىل قاتىسىپتى. ەرىكتىلەر اركتيكانىڭ سولتۇستىك بولىگىن اۋىر مەتالل قالدىقتارىنان تازارتىپ, عىلىمي جۇمىستارمەن شۇعىلدانىپتى.
اركتيكا ەۋرازيا جانە سولتۇستىك امەريكا قۇرلىقتارىنىڭ سولتۇستىك شەتىن, سولتۇستىك مۇزدى مۇحيتتى ارالدارىمەن قوسا العاندا تۇگەل قامتيتىن جەر شارىنىڭ سولتۇستىك پوليۋس ايماعى سانالادى. اۋدانى – 27 ملن شارشى شاقىرىم, ونىڭ 15 ملن شارشى شاقىرىمىن مۇحيت سۋى قۇرايدى. ونىڭ قۇرامىنا رەسەيدىڭ مۋرمانسك, ارحانگەلسك, تۇمەن وبلىستارى, كراسنويارسك ولكەسى, ساحا رەسپۋبليكاسى, كانادانىڭ, اقش-تىڭ, دانيانىڭ, نورۆەگيانىڭ بىرقاتار ارالدارى كىرەدى.
– سولتۇستىك قازاقستان مەن يامال-نەنەتس وڭىرلەرىنىڭ اراسىندا ۇقساستىقتار از ەمەس. سىزدەر سياقتى ءبىز دە سولتۇستىك ايماقتا تۇرامىز. ەكى تاراپ اراسىنداعى دوستىق قارىم-قاتىناس ودان ءارى بەكي تۇسەرىنە سەنىمدىمىن,– دەدى جيىندا يامال-نەنەتس اۆتونوميالىق وكرۋگى حالىقارالىق سىرتقى بايلانىس دەپارتامەنتى ديرەكتورىنىڭ ءبىرىنشى ورىنباسارى سەرگەي ۋراماەۆ.
ەكولوگيالىق ەكسپەديتسيا 15 كۇنگە جالعاسادى. ۇمىتكەرلەر ەكولوگيا جانە بيولوگيا ماماندىقتارى بويىنشا وقىپ جۇرگەن ستۋدەنتتەردەن ىرىكتەلىپ الىنادى. ولار عالىمداردان, بيولوگتەردەن جاساقتالعان ەكسپەديتسيا قۇرامىندا كارسك تەڭىزىنىڭ جاعالاۋىندا ورنالاسقان, بۇگىندە ەشكىم تۇرمايتىن ۆيلكيتسكي ارالىنىڭ تىلسىم سىرلارىمەن تانىساتىن بولادى. كەزىندە مۇندا ءىرى ءوندىرىس ورىندارى, اسكەري بولىمدەر, مەتەوستانسالار بولعان ەكەن. وسىندا اۋماقتىڭ ەكولوگيالىق جاعدايىن رەتتەۋمەن قاتار عىلىمي زەرتتەۋلەر جۇرگىزۋ–ەكسپەديتسيانىڭ باستى ماقساتى .
«اركتيكا ەرىكتىلەرى» جوباسىنىڭ جەتەكشىسى ەۆگەني روجكوۆسكيدىڭ سوزىنە قاراعاندا 5 جىل بويى بەلوە ارالى قوقىستان تازارتىلىپتى. وسىلايشا ارالدىڭ ەكولوگيالىق پاسپورتى بارلىق تالاپتارعا سايكەستەندىرىلىپتى. ەندىگى كەزەك – ۆيلكيتسكي ارالى. وندا تەك تىكۇشاق قانا قاتىنايتىن كورىنەدى. ۇيىمداستىرۋشىلار ەكسپەديتسيا مۇشەلەرىن جاتىن ورىنمەن, ازىق-ت ۇلىكپەن قامتاماسىز ەتەدى.
ەكولوگيالىق ەكسپەديتسيا ساپارى شىلدە ايىندا باستالادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
