سول ماقالامىزدا «بالكىم, بولاشاقتا ۇلكەن دودالاردا كوك تۋىمىزدى كوكتە جەلبىرەتىپ, ءانۇرانىمىزدى الەمگە تىڭداتاتىن سپورتشىلارىمىزدىڭ ءبىرى وسى قارشاداي قىز شىعار؟ جەڭىستەرىڭ كوپ بولسىن, جىبەك!» دەگەن ىزگى تىلەكتى بارشا وقىرماندار اتىنان جولداعان ەدىك. كۇنى كەشە عانا بىرىككەن اراب امىرلىكتەرىنىڭ استاناسى ءابۋ-دابيدەن جەتكەن ءسۇيىنشى حابار وسى ارمان-تىلەگىمىزدى اقيقاتقا اينالدىرعانداي بولدى. ويتكەنى ءابۋ-دابي قالاسىندا وتكەن الەم بىرىنشىلىگىنىڭ جاسوسپىرىمدەر اراسىندا ەلىمىزدىڭ اتىنان ونەر كورسەتكەن «ساعادات باتىر» سپورت كلۋبىنىڭ قوس بىردەي سپورتشىسى ەل سەنىمىن ابىرويلى قورعادى. ناقتىراق ايتساق, جىبەك ق ۇلىمبەتوۆا (32 كيلو) چەمپيون اتانسا, الينا ماحامبەت (36 كيلو) قولا مەدالعا قول جەتكىزدى. سونداي-اق 13 جاسار بەكزات جامانباي (45 كيلو) جاقسى ونەر كورسەتىپ, الەم بىرىنشىلىگىنىڭ قولا جۇلدەسىنە يە بولدى.
قوس سپورتشى قىزدىڭ جاتتىقتىرۋشىسى نۇرسۇلتان ورىنباساروۆ الەم چەمپيوناتىنىڭ جوعارى دەڭگەيدە وتكەنىن, جارىسقا ءار مەملەكەتتىڭ ۇزدىك سپورتشىلارى عانا قاتىسقانىن ايتادى. ونىڭ سوزىنشە, جىبەكتىڭ تازا سالماعى 28 كيلو. الايدا جارىس ەرەجەسىنە ساي ەڭ كىشى سالماق 32 كيلو بولعاندىقتان, جىبەككە وزىنەن سالماعى اۋىر سپورتشىلارمەن بەلدەسۋگە تۋرا كەلسە دە بوزكىلەمدە كەزدەسكەن ءۇش قارسىلاسىن دا ايقىن باسىمدىقپەن جەڭگەن.
جاسى 11-گە ەندى عانا تولعان جىبەك وسىعان دەيىن كوپتەگەن رەسپۋبليكالىق, حالىقارالىق جارىستاردا توپ جاردى. ەندى الەم بىرىنشىلىگىنىڭ التىن مەدالى ونىڭ ارمانىن ودان ءارى قاناتتاندىرا تۇسەتىنى انىق.
ارمان وكتيابر,
«ەگەمەن قازاقستان»
الماتى
