وسى ورايدا «استانا ەكسپو-2017» ۇلتتىق كومپانياسى, اقمولا وبلىسى اكىمدىگى جانە «اتامەكەن» ۇكپ اراسىندا ۇشجاقتى ىنتىماقتاستىق تۋرالى مەموراندۋمعا قول قويىلدى. مەموراندۋم ماقساتى – وقۋشىلار مەن ستۋدەنتتەر ءۇشىن حالىقارالىق مامانداندىرىلعان كورمە مۇراسىنىڭ نىساندارىنا مادەني, ءبىلىم بەرۋ تۋرلارىن ۇيىمداستىرۋدى قامتيدى. ەكىجاقتى كەلىسىمنىڭ قالاي جۇزەگە اسارى پىسىقتالىپ, ءتۇسىندىرۋ شاراسى ايماقتارداعى ءبىلىم وشاقتارىندا جالعاسىن تاپپاق. وسىلايشا, ءساۋىر ايىنىڭ 26-سى كۇنى «نۇر الەم» بولاشاق مۇراجايىندا اقمولا وبلىسىنىڭ ۇستازدارىنا اقپاراتتىق تۋر وتكىزىلىپ, مامىر ايىنان باستاپ اشىق ساباقتارعا بەلسەندى تۇردە وقۋشىلار قاتىستىرىلادى.
«استانا ەكسپو-2017» ۇلتتىق كومپانياسىنىڭ قىزمەتكەرى ەرنۇر كەنجەبەكوۆتىڭ ايتۋىنشا, ءدارىستى ادەتتەگىدەي وقۋ عيماراتىندا وقىعاننان گورى, «نۇر الەم» سفەراسىنداعى ارنايى جابدىقتالعان لەكتسيالىق اۋديتوريادا وتكىزۋ ءتيىمدى ءارى قىزىقتى. ەڭ باستىسى, ستۋدەنتتەر مەن وقۋشىلار ءۇشىن قالىپتى جاعدايداعى ساباقتاردىڭ وزگەشە فورماتتا ءوتۋى تىڭ دۇنيە بولماق. «نۇر الەم» سفەراسى بولاشاقتىڭ ەنەرگياسىن ناسيحاتتايتىن الەمدە بالاماسى جوق بىردەن-ءبىر مۇراجاي. بولاشاقتا ءوز تانىمىن فيزيكا, بيولوگيا, جاعرافيا, ينفورماتيكا, حيميا عىلىمدارى سالاسىندا كەڭەيتەم دەگەن جاستار ءۇشىن تاپتىرماس مۇمكىندىك. عارىش الەمىنىڭ قۇپيالارىن زەرتتەيمىن دەگەن جاس وركەندەر ءۇشىن دە مۇندا اقپارات جەتكىلىكتى.
وتكەن جىلدىڭ جەلتوقسان ايىنان باستاپ وقۋشىلار ءۇشىن مۇراجايدا اشىق ساباقتار وتكىزۋ قولعا الىنعان بولاتىن. ناتيجەسىندە, كورمە مۇراسى نىساندارىمەن 17 000-عا جۋىق وقۋشى, 4000 ستۋدەنت تانىستى. جاڭا جوبا قازىرگى كەزدە ءبىلىم وشاقتارى جانە جوعارى وقۋ ورىندارىنداعى ۇستازدار اراسىندا ۇلكەن قىزىعۋشىلىق تۋعىزۋدا. اسىرەسە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ءدارىس وقۋشىلارى بەرىلگەن مۇمكىندىكتى پايدالانىپ قالۋدا. اتالعان وقۋ ورداسىنداعى تۋريزم كافەدراسىنىڭ وقىتۋشىسى ءاليا نيازباەۆا العاشقىلاردىڭ ءبىرى بولىپ ءبىر توپ تالىمگەرگە اعىلشىن تىلىندە ءدارىس وقىپ, ەلىمىزدەگى ءتۋريزمنىڭ دامۋ قارقىنى مەن دەڭگەيى جايىندا قۇندى اقپاراتتار ۇسىندى.
اشىق ساباق مۇلدەم جاڭا فورماتتا ءوتتى. ستۋدەنتتەر تەك اقپارات تىڭداپ قانا قويماي, مۇراجايدى ارالاۋ ارقىلى دۇنيەتانىمىن ۇلعايتۋعا مۇمكىندىك الدى. ساباق بارىسىندا جالپى ەكسپو-2017 شاراسى جونىندە, الداعى ۋاقىتتا «نۇر الەم» مۇراجايىنا ىشكى جانە سىرتقى تۋريستەردى قىزىقتىرۋ ءۇشىن قانداي جۇمىس اتقارىلۋى قاجەت دەگەن ماسەلەلەر توڭىرەگىندە تالقىلاۋلار بولدى.
ايتا كەتسەك, ۇيىمداستىرۋشىلاردىڭ كوزدەگەن ماقساتى وقۋشىلاردىڭ عىلىمعا دەگەن زەيىنىن ارتتىرۋ, ولاردىڭ ءدارىس پەن تاجىربيەنى ۇشتاستىرۋىنا مۇمكىندىك تۋدىرۋ بولىپ وتىر. وسى ماقساتتا وزگە دە وڭىرلەرمەن كەلىسىم جاسالىپ, باستاما بولاشاقتا دا جالعاسىن تاپپاق.
ميراس اسان,
«ەگەمەن قازاقستان»
