قازاقستان حالقى اسسامبلەياسىنىڭ كەزەكتى جيىنىنا قاتىسۋ ءۇشىن ەلورداعا ارنايى كەلگەن قالامگەر وقىرماندارمەن ءوزىنىڭ ءومىر جولى, شىعارماشىلىق ىزدەنىستەرىنە قاتىستى سۇبەلى سۇحبات جۇرگىزىپ, تۋعان جەرىنە دەگەن جۇرەكجاردى ساعىنىشىن جەتكىزدى.
«بۇگىن, مىنە, تۋعان ولكەم – قازاقستان جەرىنە كەلىپ, سىزدەرمەن كەزدەسىپ, پىكىرلەسىپ وتىرعانىما وتە قۋانىشتىمىن. مەن قاراتاۋ قالاسىندا تۋعانىممەن, نەگىزگى جۇمىسىم ماسكەۋدە بولعاندىقتان, قازىر سول جاقتامىن. بىراق تۋعان ەلىممەن اراداعى بايلانىستى ەشقاشان ۇزگەن ەمەسپىن. ۇنەمى رۋحاني شىعارماشىلىق بايلانىستامىز. بۇگىنگى كەزدەسۋ دە وسى ويىمنىڭ ايقىن ايعاعى. جالپى, فانتاستيكا جانرىنداعى ادەبيەت وقىرمان ءۇشىن وتە قىزىقتى دەپ سانايمىن. سوندىقتان دا بۇل جانر بولاشاققا وزگەشە وي جۇگىرتىپ, باسقا الەمگە كوز تىككىسى كەلەتىن جاستاردى ۇنەمى وزىنە ءۇيىرىپ اكەتەرىنە سەنەمىن», دەيدى جازۋشىنىڭ ءوزى.
جامبىل وبلىسىندا ومىرگە كەلىپ, شىعارماشىلىق جولىن الماتى قالاسىنان باستاعان سەرگەي لۋكيانەنكونىڭ كىتاپتارى 1980-1990 جىلدارى ارالىعىندا شىعا باستادى. «نارۋشەنيە» اتتى العاشقى عىلىمي-فانتاستيكالىق حيكاياسى «زاريا» جۋرنالىندا جاريالانىپ, سول كەزدە-اق وقىرماننىڭ ۇلكەن قىزىعۋشىلىعىن وياتقان بولاتىن. بۇگىندە «اەليتا», «زۆيوزدنىي موست», «EuroCon», «پلاتينوۆىي تارلان», «Corine» پرەميالارىنىڭ لاۋرەاتى اتانىپ ۇلگەرگەن فانتاست قالامگەردىڭ قيالى الەمدى شارلاپ كەتكەنى قاشان. ونىڭ كىتاپ بەتتەرىندەگى تەرەڭ ويى مەن ۇشقىر قيالى وقۋشىسىن ەشقاشان بەيجاي قالدىرمايدى. كەرىسىنشە, تەك قانا قيال قارمايتىن عاجايىپ الەمنىڭ تىلسىمىنا جەتەلەپ, ءاردايىم وقىرمانىنا عالامات اسەر سىيلاۋ مۇراتىنان ءبىر ءسات تە اينىعان ەمەس.
جازۋشى ەڭبەگى تەك كىتاپحانا سورەلەرىندە عانا ەمەس, بۇگىندە كينوتەاترلار ەكرانىنا شىعىپ, قىم-قۋىت سيۋجەتكە قۇرىلعان شىتىرمانعا تولى وقيعالار كورۋشىسىن دە ۇمىتىلماس اسەرگە بولەپ ءجۇر. ايگىلى كينورەجيسسەر تيمۋر بەكمامبەتوۆتىڭ شىعارماشىلىق جۇمىسىنا ارقاۋ بولعان سەرگەي لۋكيانەنكونىڭ «دوزور» تۋىندىسى سونداي شىعارمالار قاتارىنان.
قازىرگى تاڭدا ەسىمى رەسەي شەكاراسى ەمەس, الەمدىك وقىرماندارعا جاقسى تانىس شىعارماشىلىق يەسىنىڭ تاعىلىمدى اڭگىمەسىن تىڭداۋعا جينالعان مەيماندار اراسىندا ەلىمىزگە بەلگىلى جازۋشىلار, جۋرناليستەر, قحا مۇشەلەرى, ەتنومادەني بىرلەستىكتەردىڭ, عىلىمي جانە شىعارماشىلىق زيالى قاۋىمىنىڭ وكىلدەرى, ستۋدەنتتەر جانە تاعى باسقا قوناقتار بار.
كەزدەسۋدە جازۋ ونەرىندەگى ىزدەنىستەرى جايلى جان-جاقتى سىر قوزعاعان قالامگەر ءوزىنىڭ «چەرنوۆيك» اتتى اڭگىمەسى بويىنشا تۇسىرىلگەن وسى اتتاس كوركەم ءفيلمىنىڭ پرەمەراالدى ترەيلەرىمەن كوپشىلىك قاۋىمدى تانىستىرىپ, جاقىندا الەمدىك كينوپروكاتكا شىعۋى جوسپارلانعان كوركەم شىعارما جايلى اسەرىمەن ءبولىسىپ, ءفيلمنىڭ ءتۇسىرىلۋ بارىسىنداعى قىزىقتى جايتتارىن دا اڭگىمەلەدى. سونداي-اق جازۋشى شىعارماشىلىق جۇزدەسۋدە ءوزىنىڭ كاسىپتىك قىزمەتى مەن شىعارماشىلىق ىزدەنىستەرىنە قاتىستى قويىلعان سۇراقتارعا جاۋاپ بەردى.
نازەركە جۇماباي,
«ەگەمەن قازاقستان»
