بۇگىندە قازاقستاندا ەكولوگيالىق قاۋىپسىزدىك ۇلتتىق قاۋىپسىزدىك پەن مەملەكەتتىك باسىمدىقتاردىڭ ستراتەگيالىق كومپونەنتتەرىنىڭ بىرىنە اينالىپ وتىر.
ەلىمىزدىڭ كوپتەگەن ايماقتارىنداعى ەكولوگيالىق قيىن جاعداي تۇرعىنداردىڭ دەنساۋلىعىنا نۇقسان كەلتىرىپ, ولاردىڭ ءتۇرلى اۋرۋلارعا شالدىعۋىنا جول اشۋدا. سونىڭ ىشىندە تەحنوگەندىك اسەرلەردىڭ كەسىرىنەن قۇرعاقشىلىق تۋدىرۋ, توپىراقتىڭ قۇنارىن جويۋ, سۋ رەسۋرستارىن قۇرتۋ مەن لاستاۋ, تابيعاتتىڭ گەنەتيكالىق قورىن ازايتۋ, ونەركاسىپتىك اپاتتاردىڭ كوبەيۋى, رادياتسيا تارالۋىنىڭ ارتۋى, قاۋىپتى جانە ۋلى قالدىقتاردىڭ ءوسۋى – مىنە, وسىنىڭ ءبارى ەكولوگيامىزدى بارىنشا بۇلدىرۋدە. ماسەلەن, 2017 جىلعى مالىمەت بويىنشا, «قازگيدرومەت» 49 قالانى زەرتتەپ, ونىڭ سەگىزىن بارىنشا لاستانعان قالا قاتارىنا قوستى. ولار جىتىقارا, اتىراۋ, بالقاش, پەتروپاۆل, اقتوبە, قاراعاندى, تەمىرتاۋ جانە وسكەمەن قالالارى.
بۇكىلالەمدىك ەكولوگييالىق فورۋمنىڭ 2017 جىلعى قورىتىندى ەسەبىنە قاراعاندا قازاقستان 136 مەملەكەتتىڭ ىشىندە ەكولوگياسىنىڭ تازالىعى جونىنەن 99 ورىن العان.
مىنە, وسى جاعدايلار مەملەكەتتىك ورگاندار تاراپىنان ەكولوگيالىق ماسەلەلەرگە ءجىتى قاراۋدى تالاپ ەتىپ وتىر. ەلىمىزدىڭ ەكولوگيالىق كودەكسى 2007 جىلى قورشاعان ورتا ساپاسىنىڭ ماقساتتى كورسەتكىشتەرىن ازىرلەۋدى وكىلەتتى جانە جەرگىلىكتى اتقارۋ ورگاندارىنا جۇكتەگەن ەدى. ونى ىسكە اسىرۋعا بايلانىستى 2015 جىلى ەنەرگەتيكا مينيسترلىگىنىڭ بۇيرىعى دا شىققان. بىراق بۇل تالاپتار قاعاز جۇزىندە عانا قالدى. تەك جامبىل, پاۆلودار جانە شىعىس قازاقستان وبلىستارى عانا كورسەتكىشتەردى ازىرلەدى, قالعاندارى بۇل ىسكە ءالى كىرىسكەن دە جوق.
سونىمەن قاتار بىزدە ءالى كۇنگە قورشاعان ورتا ساپاسىن راتسيونالدى ادىسپەن انىقتاۋ بويىنشا بىرتەكتىلەنگەن كورسەتكىشتەر دە بەلگىلەنبەگەن. ەكولوگيالىق تولەمدەردىڭ تيىمدىلىگى دە وتە تومەن. تابيعاتتى بۇلدىرۋشىلەرگە سالىناتىن ايىپپۇل كولەمىنىڭ دە ىقپالى از.
ءبىز وسى ماسەلەلەردى پرەمەر-مينيستر باقىتجان ساعىنتاەۆقا دەپۋتاتتىق ساۋالمەن جولداپ, تومەندەگى ۇسىنىستاردى ىسكە اسىرۋدى سۇراپ وتىرمىز:
1. جەرگىلىكتى اتقارۋشى ورگاندارعا وسى جىلدىڭ اياعىنا دەيىن قورشاعان ورتا ساپاسىنىڭ ماقساتتى كورسەتكىشتەرىن ازىرلەۋدى تاپسىرۋ;
2. وسى كورسەتكىشتەردىڭ نەگىزىندە وكىلەتتى ورگانعا ەلىمىزدىڭ ءاربىر ايماعى بويىنشا قورشاعان ورتا ساپاسىن انىقتاۋ جانە ونى وڭالتۋ شارالارىن قاراستىرۋ تۋرالى تاپسىرما بەرۋ;
3. ماقساتتى كورسەتكىشتەردى نورماتيۆتەر رەتىندە قولدانۋ مۇمكىنشىلىگىن قاراستىرۋ.
قۇرالاي قارەكەن,
ءماجىلىس دەپۋتاتى
