وبلىس بويىنشا 16 ازاماتتىق قورعانىس قىزمەتى, 1400 ادامنان قۇرالعان 14 شۇعىل ارەكەت ەتۋ وتريادى, 1230 تەحنيكا, ونىڭ ىشىندە 365 سۋ سورعىش, 80-گە جۋىق ءجۇزۋ قۇرالى ازىرلىك قالپىنا كەلتىرىلگەن. ينەرتتى ماتەريالدار مەن جانار-جاعارمايلار ءتيىستى ايماقتارعا جەتكىزىلگەن. وبلىس ورتالىعىنان 100 مىڭ تەكشە مەتر قار سىرتقا شىعارىلعان. قاۋىپسىز جەرلەرگە شىعارىلعان ادامدار جاتىن ورىنمەن, ىستىق تاعاممەن قامتاماسىز ەتىلەدى.
بيىل قار از تۇسكەندىكتەن ەسىل وزەنى تاسي قويماس دەپ كۇتىلگەن ەدى. الايدا استانا, قاراعاندى جاقتان جىبەرىلگەن ءنوپىر سۋ سەرگەەۆ سۋ قويماسىن لىقا تولتىرعاندىقتان لاجسىزدان بوساتۋعا تۋرا كەلگەن. پوكروۆكا اۋىلى ماڭىنداعى سۋدىڭ دەڭگەيى 1108 سانتيمەتردى قۇراپ وتىر.تاسقىننىڭ ەكپىنى سەيىلگەنىمەن قاۋىپتىڭ بەتى قايتار ەمەس. دولماتوۆو ەلدى مەكەنى اۋماعىندا سۋ دەڭگەيى 1250-1300 سانتيمەترگە دەيىن جەتەدى دەپ كۇتىلۋدە. نوۆونيكولسكوە اۋىلىنا قاتىنايتىن كوپىردى سۋ الىپ, قوعامدىق كولىكتەر اينالما جول ارقىلى قاتىناۋعا ءماجبۇر.
اعىن سۋدىڭ الدى وبلىس ورتالىعىنا دا جەتىپ, زاردابىن تيگىزە باستادى. قالا سىرتىنداعى بىرقاتار ساياجاي ۋچاسكەلەرى سۋ استىندا قالدى. حالىقارالىق ماڭىزى بار چەليابى-ءنوۆوسىبىر تاس جولىنىڭ ءبىر بولىگىن شايىپ كەتىپ, جەڭىل كولىكتەردىڭ جۇرۋىنە شەكتەۋ قويىلدى. پەتروپاۆل گيدروتورابىنداعى سۋ دەڭگەيى ءبىر كۇندە 63 سانتيمەترگە دەيىن كوتەرىلگەن. الداعى كۇندەرى بۇل كورسەتكىش 1060 سانتيمەترگە دەيىن جوعارىلايدى دەگەن بولجام بار. وبلىس ورتالىعى مەن زارەچنوە كەنتى اراسىنداعى جولدى جىلداعىداي سۋ السا, زاردابىن كورەتىن–تۇرعىندار. ونداي قاۋىپ بار.
جەرگىلىكتى سينوپتيكتەر كوكتەمنىڭ سوڭعى ايى جاۋىن-شاشىنمەن باستالىپ, ەسىلدەگى سۋ دەڭگەيى كوتەرىلەدى دەگەن اقپارات تاراتىپ وتىر. تابيعاتتىڭ مۇنداي قۇبىلىسى وڭىردەگى احۋالدى شيەلەنىستىرىپ جىبەرۋى ىقتيمال.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
