جاقىندا «بولاشاققا باعدار: رۋحاني جاڭعىرۋ» باعدارلاماسى اياسىندا «Arna-b» باسپاسىنان جارىق كورگەن ء«شامشى قالداياقوۆ» فوتوالبوم-كىتابى كومپوزيتور شىعارماشىلىعىن, ءومىرىن جاڭا ءبىر قىرىنان تانىتقانداي.
قر ۇلتتىق كىتاپحاناسىندا وتكەن كىتاپتىڭ تۇساۋكەسەرىنە جينالعان قاۋىم ءشامشى ومىرىنەن سىر شەرتتى. جوبانىڭ اۆتورى كومپوزيتور شىعارماشىلىعىن زەرتتەۋشى, كومپوزيتور ق.قۇرمانالى فوتوالبومنىڭ تاريحىنان بىرقاتار دەرەكتەردى ورتاعا سالدى. ال مەملەكەت جانە قوعام قايراتكەرى ا.تشانوۆ, قر ۇعا اكادەميگى, ف.ع.د. ءو.ايتباي ۇلى, جازۋشى-پۋبليتسيست ق.سارسەنباي, بەلگىلى ساتيريك ك.امىربەك, ا.ش.ع. دوكتورى, پروفەسسور ا.اسانوۆ, «Arna-b» باسپاسىنىڭ ديرەكتورى ب.ويسا, ت.ب. كومپوزيتور تۋرالى ەستەلىكتەردى ورتاعا سالدى.
اۋقىمدى جيناق جەتى بولىمگە جىكتەلىپتى. «مەنىڭ قازاقستانىم» دەپ اتالاتىن العاشقى ءبولىم كومپوزيتوردىڭ وتانعا دەگەن سۇيىسپەنشىلىگى, تۋعان ولكە تۋرالى اندەرىنە ارنالعان. ال ەكىنشى ءبولىم - ء«ومىر-وزەن». بولىمدە كومپوزيتور ءومىرىنىڭ ءار كەزەڭدەرىن قامتىعان فوتوشەجىرەلەر بار. «سول ءبىر كەز ەسىمدە...» دەپ اتالاتىن بولىمدە كومپوزيتور تۋرالى ەستەلىكتەر جيناقتالسا, ارى قاراي جالعاسىن تاپقان ء«شامشىنىڭ ءانى»,«سارعايعان سۋرەتتەر سىرى», «امانات», ء«شامشى-مۇرا» بولىمدەرىندە وقىرمانىن بەي-جاي قالدىرمايتىن اسەرلى كەزدەر توپتاستىرىلعان.
كەش سوڭىندا س.قالىموۆ, ت.اشىمبەكوۆا, ە.وسپان ء«ان اعا», «سىعان سەرەناداسى» اندەرىن شىرقاپ, كوپشىلىكتى اسەم اۋەزگە بولەدى.
ەلۆيرا سەرىكقىزى,
«ەگەمەن قازاقستان»
الماتى
