ءماجىلىستىڭ نەگىزگى تاقىرىبى – قازاق تىلىنە اۋدارىلعان جاڭا وقۋلىقتاردى ازىرلەۋ بارىسىن, عىلىمي مازمۇنىن تالقىلاۋ. تاريح, فيلوسوفيا, پسيحولوگيا, انتروپولوگيا, مادەنيەتتانۋ, ءدىنتانۋ, لينگۆيستيكا سالالارى بويىنشا ازىرلەنگەن وقۋلىقتاردىڭ عىلىمي رەداكتورلارىنىڭ باياندامالارىندا اتالعان وقۋلىقتاردى وقۋ باعدارلاماسىنا ەنگىزۋدىڭ باسىمدىقتارى ايتىلدى.
باياندامالاردى تالقىلاۋ بارىسىندا ساراپشىلار ءبىلىم بەرۋ جۇيەسىنىڭ باسەكەگە قابىلەتتىلىگىن كوتەرەتىن جوبالاردى ەنگىزۋگە ءمان بەرۋدى, ەلىمىزدىڭ ءبىلىم بەرۋ سالاسىن وقۋ-ادىستەمەلىك ماتەريالدارمەن قامتاماسىز ەتۋدىڭ تۇجىرىمداماسىن قايتا قاراۋدى ۇسىندى.
«الەمدىك دەڭگەيدە تانىمال وقۋلىقتاردى قازاق تىلىنە تىكەلەي اۋدارۋ بارىسىندا ۇلتتىق جادىنى دا ەستەن شىعارماۋ قاجەت. قازىرگى ۋاقىتتا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىندا ەكى باعىتتا جۇمىس ىستەگەن ابزال. بىرىنشىدەن, اتالعان وقۋلىقتاردى اۋدارۋ ەسەبىنەن الەمدىك ستاندارتتار دەڭگەيىنە جەتۋىمىز قاجەت. ەكىنشىدەن, بىزگە ۇلتتىق جادىمىزدى ساقتاپ قالۋ ماڭىزدى. ويتكەنى جاراتىلىستانۋ عىلىمىندا ۇلت جوق. بيولوگيا, فيزيكا, حيميا سىندى سالالارداعى كىتاپتاردى ەركىن اۋدارۋعا بولادى. ال قوعامدىق-گۋمانيتارلىق عىلىمعا كەلگەندە ءبىزدىڭ ۇلتتىق قۇندىلىقتارىمىزدى, سالت-ءداستۇرىمىزدى, ۇلتتىق جادىمىزدى ەسكەرۋىمىز قاجەت», دەدى ۇلتتىق عىلىم اكادەمياسىنىڭ اكادەميگى بولات كومەكوۆ.
وقۋلىقتاردى اۋدارۋ جۇمىسىنا بەلسەنە ارالاسقان فيلولوگيا عىلىمدارىنىڭ دوكتورى شەرۋباي قۇرمانباي ۇلى وقۋلىقتاردى اۋدارۋ بارىسىندا پايدا بولعان ماسەلەلەر مەن سۇراقتارعا توقتالىپ, تەرمين اۋدارۋ بارىسىندا ءارتۇرلى پىكىرلەر مەن داۋدىڭ بولعانىن ايتتى. «عىلىم ءۇشىن كاسىبي پىكىرتالاستار پايدالى. ول جەتىلۋگە, وسۋگە كومەكتەسەدى. شىنى كەرەك, وقۋلىقتاردى اۋدارۋ بارىسىندا قازاق تىلىندە سويلەم قۇراۋ قيىندىق تۋدىرعان جوق. نەگىزىنەن ۇعىمدار مەن تەرميندەردىڭ قازاقشا بالاماسىن تابۋ اۋىر بولدى. ءبىر تەرمين ءۇشىن ەكى-ءۇش كۇن پىكىرلەسۋ, تالقىلاۋ بولدى. تۋرا ماعىناسىندا اۋدارماشىلار كۇنى-ءتۇنى جۇمىس ىستەدى. بۇل ۇلكەن ەڭبەك. گۋمانيتارلىق عىلىمداردىڭ وقۋلىقتارى, ونىڭ ىشىندە ءتىل بىلىمىنە بايلانىستى كىتاپتار ستۋدەنتتەر ءۇشىن دە, وقىتۋشىلار ءۇشىن دە پايدالى بولادى», دەدى شەرۋباي قۇرمانباي ۇلى.
ساراپشى-عالىمدار جاڭا وقۋلىقتاردى ەلىمىزدىڭ بارلىق جوعارى وقۋ ورىندارىنا بەيىمدەۋدى جەدەلدەتۋدىڭ, ولاردى وقۋ ۇدەرىسىندە قولدانۋ بويىنشا پراكتيكالىق سەمينارلاردى وتكىزۋدىڭ قاجەتتىلىگىن باسا ايتتى.
باعاشار تۇرسىنباي ۇلى,
«ەگەمەن قازاقستان»
