سەرىكتەستىك ماڭىنداعى بوس جاتقان 30 گا جەر تەلىمى قوسىمشا ءبولىنىپ بەرىلگەندىكتەن الاڭدا ينۆەستيتسيالىق كولەمى 360 ملرد تەڭگەنى قۇرايتىن ءتورت جوبا جۇزەگە اسىرىلماق, ولارداعى جالپى جۇمىس ورىندارىنىڭ سانى 895 ادامدى قامتىماق. الاڭدا ءوڭىر ءۇشىن تىڭ كاسىپ ءتۇرى بولىپ تابىلاتىن توقىما فابريكاسىن سالۋ جوباسىنىڭ تۇساۋى كەسىلدى. 97 ملرد تەڭگە ينۆەستيتسيالاناتىن كاسىپورىن جىلىنا 32,4 مىڭ توننا يىرىلگەن ءجىپ شىعارادى دەپ مەجەلەنگەن. فابريكانىڭ قۇرىلىسى كەزەڭىندە 200 ادام جۇمىس ىستەسە, پايدالانۋعا بەرىلگەن سوڭ 700 ادامدى جۇمىسپەن قامتۋ جوسپارلانىپ وتىر. كاسىپورىنعا وتاندىق جانە ءىشىنارا وزبەكستاندىق شيكىزات قولدانىلىپ, دايىن ونىمدەر شەتەلدەرگە شىعارىلماق.
اتالمىش پارك اۋماعىندا ينۆەستيتسيالىق كولەمى 80 ملرد تەڭگەنى قۇرايتىن, قۋاتى 2ح50 مۆت گاز-تۋربينالى ستانسانىڭ قۇرىلىسى پايدالانۋعا بەرىلگەن سوڭ 60 ادامدى جۇمىسپەن قامتيدى دەپ جوسپارلانعان, قازاقستاندىق شيكىزاتتى تۇتىنىپ, ونىمدەرىن ەۋرازيالىق ەكونوميكالىق وداق ەلدەرىنە جەتكىزۋدى كوزدەگەن بولات يلەۋ زاۋىتى جوباسى دا تارتىمدى بولىپ وتىر. قۇنى 50 ملرد تەڭگەگە مولشەرلەنگەن زاۋىت جىلىنا 150 مىڭ توننا ءونىم ءوندىرىپ, 60 ادامنىڭ جۇمىس ورنىنا اينالادى دەپ شامالانادى. 133 ملرد تەڭگە ينۆەستيتسيا سالىناتىن, جىلىنا 150 مىڭ توننا قۋاتپەن جۇمىس جاسايتىن فەرروحروم وندىرىسىندە 75 جۇمىس ورنى اشىلۋعا ءتيىس. زاۋىت ءۇشىن قاجەتتى جابدىقتاردى گەرمانيادان الۋ جوسپارلانعان, وتاندىق شيكىزاتتان دايىندالعان ونىمدەر جاپونياعا, قىتايعا, ۇندىستانعا ەكسپورتتالاتىن بولادى.
جاقسى جوبالار جاڭاوزەن قالاسىنىڭ يندۋستريالىق اۋماعىندا جالعاسىن تاپپاق. مىسالى, مۇنايلى قالادا جۇزەگە اساتىن ەكى ينۆەستيتسيالىق جوباعا سالىناتىن قارجى كولەمى 162,4 ملرد تەڭگەنى قۇراپ, 210 جۇمىس ورنى قۇرىلاتىن بولادى. قوس نىسان ىسكە قوسىلعان كەزدە 1105 ادام جۇمىسپەن قامتىلماق. ولاردىڭ ءبىرى – فەرروسيليتسي قورىتپاسىن شىعارۋ زاۋىتى بولسا, ەكىنشىسى – قۋاتى 2ح384 مۆت گازتۋربينالىق ەلەكتر ستانساسى. كوڭىلگە ءۇمىت ۇيالاتاتىن جوبالاردىڭ قاي-قايسىسىنىڭ دا قولدانىسقا بەرىلەتىن مەرزىمى كەلەر جىلعا مەجەلەنىپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
