كوميتەت توراعاسى داريعا نازارباەۆا كورشى ەلدىڭ كەمەروۆو قالاسىندا ورىن العان قايعىلى وقيعاعا بايلانىستى تۇرعىندار قاۋىپسىزدىگىنە, اسىرەسە بالالاردى ءتۇرلى قاتەردەن قورعاۋعا باسا نازار اۋدارىلىپ وتىرعانىن اتاپ ءوتتى. كەمەروۆو وقيعاسى – ادامدار قاۋىپسىزدىگىن ەڭ ءبىرىنشى كەزەككە قوياتىن, ارقايسىمىزدى وقيعا زارداپتارى تۋرالى ويلاۋعا مىندەتتەيتىن اششى ساباق بولدى.
ىشكى ىستەر مينيسترلىگى توتەنشە جاعدايلار جونىندەگى كوميتەتىنىڭ توراعاسى ۆلاديمير بەككەر ادامدار كوپ كەلەتىن نىسانداردىڭ ورتتەن قاۋىپسىزدىگىن قامتاماسىز ەتۋ شارالارى جانە وسى سالاداعى وزەكتى ماسەلەلەر تۋرالى دەپۋتاتتاردى حاباردار ەتتى.
پارلامەنتشىلەر ادامدار كوپ جينالاتىن الەۋمەتتىك ينفراقۇرىلىمدار مەنشىك يەلەرىنىڭ ورتتەن قاۋىپسىزدىك تالاپتارىن بۇزعانى جانە ساقتاماعانى ءۇشىن جاۋاپكەرشىلىگىن كۇشەيتۋ جونىندەگى نورماتيۆتىك قۇقىقتىق اكتىلەرگە وزگەرىس ەنگىزۋ قاجەتتىگىن اتاپ ءوتتى. سونداي-اق مۇنداي نىسانداردى ەكونوميكالىق ىنتىماقتاستىق جانە دامۋ ۇيىمى ەلدەرىنىڭ تاجىريبەسى بويىنشا ءورت جاعدايىنا مىندەتتى ساقتاندىرۋدى ەنگىزۋ ۇسىنىلدى.
ءبىلىم جانە عىلىم مينيسترلىگىنە جالپى ءبىلىم بەرۋدىڭ باستاۋىش جانە ورتا ءبىلىم باعدارلاماسىنا ورتتەن قاۋىپسىزدىك ەرەجەلەرىن وقىتۋ جانە توتەنشە جاعدايلار بولعان كەزدە دۇرىس ارەكەتتەر جاساۋعا داعدىلاندىرۋدى قوسۋ مۇمكىندىگىن پىسىقتاۋ ۇسىنىلدى.
دەپۋتاتتار سونداي-اق ءورت قاۋىپسىزدىگىن قامتاماسىز ەتۋ سالاسىندا جۇمىس ىستەپ كەلە جاتقان كاسىپورىنداردىڭ قىزمەتىن ليتسەنزيالاۋدى قايتارۋدى دا ۇسىندى.
وتىرىس بارىسىندا ۆ. بەككەر ەلىمىزدەگى تاسقىن سۋ جانە ەلدى مەكەندەردى سۋ باسىپ كەتۋگە وراي ەسكەرتۋ جونىندەگى جۇرگىزىلىپ جاتقان جۇمىستار تۋرالى باياندادى.
تالقىلاۋ قورىتىندىسى بويىنشا سەناتورلار توتەنشە جاعدايلار جونىندەگى كوميتەت بولىمشەلەرىنىڭ جەرگىلىكتى اتقارۋشى ورگاندارمەن جۇمىستارىندا ۇيلەسىمنىڭ جوقتىعىن, سونداي-اق توتەنشە جاعدايلار جونىندەگى وبلىستىق دەپارتامەنتتەردىڭ جانە جۇمىلدىرۋ دايىندىعى, ازاماتتىق قورعانىس باسقارمالارى, اكىمدىكتەردەردىڭ اۆاريالار مەن تابيعي اپاتتاردى ەسكەرتۋ جانە زارداپتارىن جويۋ ۇيىمدارى مىندەتتەرىنىڭ قوسارلانۋى تۋرالى اتاپ ءوتتى. سەناتورلار ءتيىستى قىزمەتتەردىڭ اكىمشىلەندىرۋ جۇيەسىنە رەفورما جۇرگىزۋدى جانە جەرگىلىكتى اتقارۋشى ورگانداردىڭ كوكتەمگى سۋ تاسقىنىنا دايىندىق جۇمىستارىن ناشار جۇرگىزگەنى ءۇشىن جاۋاپتىلىعىن كۇشەيتۋدى ۇسىندى.
«كاسىبي اسكەريلەندىرىلگەن اۆاريالىق-قۇتقارۋ قىزمەتى» رەسپۋبليكالىق مەملەكەتتىك كاسىپورنى باس ديرەكتورىنىڭ مىندەتىن اتقارۋشى ديقانبەك ساتىلعانوۆ وسى قىزمەتتىڭ جۇمىسى تۋرالى جان-جاقتى بايانداپ بەردى. ونىڭ مىندەتتەرى اياسىندا تاۋدا قۇتقارۋ, قاۋىپتى ءوندىرىس نىساندارىنداعى سۋ بۇرقاعىنا قارسى, گازدان قۇتقارۋ جۇمىستارىن ورىنداۋ بار. بۇگىنگى تاڭدا اۆاريالىق-قۇتقارۋ مىندەتىن باسەكەلەستەر ورتاسىنا بەرۋ, ال رمك-نى جەكە قولعا بەرۋ تۋرالى شەشىم قابىلداندى. تۇرعىنداردىڭ, ستراتەگيالىق ماڭىزى بار ءىرى ءوندىرىس نىساندارىنىڭ قاۋىپسىزدىگى مەملەكەتتىك ورگاندار تاراپىنان جان-جاقتى, مۇقيات زەردەلەۋدى جانە باقىلاۋدى تالاپ ەتەتىندىكتەن دەپۋتاتتار قاۋىپتى ءوندىرىس نىساندارىن اۆاريادان ەسكەرتۋ جانە ونىڭ زارداپتارىن جويۋ جونىندەگى بىرىڭعاي مەملەكەتتىك قىزمەت – «كاسىبي اسكەريلەندىرىلگەن اۆاريالىق-قۇتقارۋ قىزمەتى» رەسپۋبليكالىق مەملەكەتتىك كاسىپورنىن ساقتاۋ, ونى جەكەشەلەندىرۋگە جاتاتىن ۇيىمدار تىزىمىنەن الىپ تاستاۋدى ۇسىندى.
قازىرگى كەزدەگى باسەكەگە قابىلەتتى نارىقتا ساپالى بالاما قىزمەت ازىرگە قۇرىلعان جوق. تاجىريبە كورسەتىپ وتىرعانداي, جەكە كومپانيالاردىڭ ءتيىستى تاجىريبەسى دە, ونەركاسىپ ورىندارىنداعى توتەنشە جاعداي ورىن العانداي بولعاندا دۇرىس كومەك بەرەتىن جابدىقتارى دا جوق.
كەزدەسۋ قورىتىندىسى بويىنشا ۇسىنىستار ازىرلەنىپ, قازاقستان رەسپۋبليكاسىنىڭ ۇكىمەتىنە جىبەرىلەتىن بولدى.
