فرانتسيادا تۋىپ-وسكەن داڭقتى بارون پەر دە كۋبەرتەننىڭ باستاماسىمەن تۇڭعىش رەت ۇيىمداستىرىلعان وليمپيا ويىندارىندا 241 سپورتشى باق سىنادى. باسەكەلەر اۋىر اتلەتيكا, ۆەلوسپورت, جەڭىل اتلەتيكا, ءجۇزۋ, كۇرەس, نىسانا كوزدەۋ, سەمسەرلەسۋ, سپورتتىق گيمناستيكا جانە تەننيس سەكىلدى سپورتتىڭ 9 تۇرىنەن ءوتىپ, 43 جۇلدە جيىنتىعىن ساراپقا سالدى.
10 تاۋلىككە سوزىلعان جارىس قورىتىندىسى بويىنشا اقش قۇراماسى الدىنا جان سالمادى. امەريكالىقتار 11 التىن, 7 كۇمىس جانە 2 قولانى ولجالادى.
گرەكيا سپورتشىلارى ەكىنشى ورىنعا جايعاستى. جارىس قوجايىندارى 10 التىن, 17 كۇمىس جانە 19 قولانى قورجىنعا سالدى. ءۇشىنشى ورىندا – گەرمانيا. نەمىستەر 6 التىن, 5 كۇمىس جانە 2 قولانى يەلەندى. سونداي-اق جۇلدە العاندار قاتارىندا فرانتسيا (5+4+2), ۇلىبريتانيا (2+3+2), ۆەنگريا (2+1+3), اۋستريا (2+1+2), اۋستراليا (2+0+0), دانيا (1+2+3) جانە شۆەيتساريا (1+2+0) قۇرامالارى بار.
ەجەلگى ەللادا ەلىندە اقش-تىڭ 28 جاستاعى ورەنى دجەيمس برەندان كوننوللي ءوز ەسىمىن تۇڭعىش وليمپيادا چەمپيونى رەتىندە سپورتتىق شەجىرەگە التىن ارىپتەرمەن جازدى. ول جەڭىل اتلەتتەردىڭ ءۇش قارعىپ سەكىرۋ سايىسىندا 13 مەتر 71 سانتيمەترلىك كورسەتكىشپەن وزگە قارسىلاستارىنان قارا ءۇزىپ كەتتى. ودان بولەك, كوننوللي سول جارىستا بيىكتىككە سەكىرۋدە – كۇمىس جانە ۇزىندىققا سەكىرۋدە قولا مەدالدى موينىنا ءىلدى.
گەرمانيالىق گەرمان ۆاينگەرتنەر افينىدا ەڭ كوپ جۇلدەگە يەلىك ەتكەن سپورتشى رەتىندە تاريحتا قالدى. سپورتتىق گيمناستيكادان وتكەن جارىستا 32 جاستاعى نەمىس جىگىتى 3 التىن, 2 كۇمىس جانە 1 قولا مەدالدى ەنشىلەپ, كورەرمەندەردىڭ زور قوشەمەتىنە بولەندى. ال گەرمانيانىڭ تاعى ءبىر گيمناسشىسى 29 جاستاعى كارل شۋمان 4 التىن مەدالدى كەۋدەسىندە جارقىراتتى.
مىنە, جاڭا زاماندا تۇڭعىش رەت الاۋى تۇتانعان جازعى وليمپيا ويىندارىنىڭ قىسقاشا تاريحى وسىنداي.
عالىم سۇلەيمەن,
«ەگەمەن قازاقستان»
