وتكەن سەنبىدە وبلىس اكىمى اماندىق باتالوۆ كەگەن جانە رايىمبەك اۋداندارىنا جۇمىس ساپارىمەن بارىپ, ءوڭىر تۇرعىندارىنا ەكى اۋداننىڭ جاڭادان تاعايىندالعان اكىمدەرىن تانىستىردى. تيىسىنشە, جاڭادان اشىلعان رايىمبەك اۋدانىنىڭ اكىمى بولىپ جولان وماروۆ تاعايىندالسا, كەگەن اۋدانىن باسقارۋ مىندەتى تالعات باەدىلوۆكە جۇكتەلدى. سونداي-اق وبلىس باسشىسى نارىنقول اۋىلىنداعى اكىمشىلىك باسقارۋ ورتالىعى مەن قىزمەت كورسەتۋ ورىندارى ورنالاساتىن عيماراتتارداعى جوندەۋ جۇمىستارىمەن تانىسىپ, بىرقاتار ەسكەرتپەلەر ايتتى. ال اۋدان اكىمىنىڭ اپپاراتى ۋاقىتشا عيماراتقا قونىستانىپ, جۇمىسىن باستادى. وسىلايشا وبلىستاعى ون جەتىنشى اۋداننىڭ ورتالىعىندا تىرشىلىك كورىگى قىزدى.
– «تەمىردى قىزعان كەزىندە سوق» دەگەندەي, پرەزيدەنت جارلىعى شىققان كۇننەن بەرگى ساناۋلى ۋاقىت ىشىندە اۋدان ورتالىعىن كوشىرۋگە قاتىستى قىرۋار جۇمىس اتقارىلدى. ەڭ باستىسى شەكارانىڭ شەبىنە اۋدان ورتالىعى قونىستاندى. جاس, ىسكەر اكىم تاعايىندادىق. ەندى ءوڭىردىڭ تىنىسى اشىلىپ, اۋىل كوركەيۋى كەرەك. وبلىس اكىمدىگى تاراپىنان بارلىق كومەك, قولداۋ جاسالادى. جاڭا اۋدان اۋىلعا جاستاردىڭ قايتىپ كەلۋىنە ۇيىتقى بولۋى ءتيىس. ەندى نارىنقولدا بيزنەس دامىپ, جاڭا جۇمىس ورىندارى اشىلادى, – دەدى اۋدان تۇرعىندارىمەن كەزدەسكەن وبلىس اكىمى اماندىق باتالوۆ.
شەكارالىق اۋداندى دامىتۋعا قاتىستى جوسپاردى جۇزەگە اسىرۋ وڭىردەگى اۋىل شارۋاشىلىعىنىڭ ءورىسىن كەڭەيتەدى. نەگىزىنەن مال ءوسىرىپ, كارتوپ ەگۋمەن داڭقى شىققان نارىنقول ايماعىنىڭ ەڭبەككەرلەرى ءۇشىن جارقىن بولاشاق جاقىن. اسىرەسە كارتوپ شارۋاشىلىعىن دەمەپ, قولداۋ جاساۋ نارىنقول توپىراعىندا ونگەن ءونىمنىڭ وبلىس, قالا بەردى ەلىمىزدىڭ سۇرانىسىن وتەيتىندەي مۇمكىندىككە جول اشادى. بيىلعى جىلى كارتوپ ەگىستىگىنىڭ كولەمىن ارتتىرىپ, 110 مىڭ گەكتارعا جەتكىزۋ مىندەتى تۇر.
جالپى, جاڭادان اشىلعان اۋداندا جاسالاتىن جۇمىس اۋقىمى ۇلكەن. نارىنقولداعى عيماراتتار مەن نىسانداردىڭ بارلىعى دەرلىك كۇردەلى جوندەۋدى قاجەت ەتەدى. اۋىلدىڭ جولدارى دا سىن كوتەرمەيدى. جاستار مەن تۇرعىنداردىڭ تۋعان اۋىلىنا ورالۋىنا دا جاعداي جاساۋ كەرەك. ول ءۇشىن باسپانا مەن باسقا دا مادەني-سپورت نىساندارىنىڭ ەسىگى اشىق بولۋى ءتيىس. مۇنسىز شەكاراداعى اۋىلدىڭ شامى سامالاداي جارقىرامايتىنى ايان. ەل كەلەشەكتەن ءۇمىتتى. نارىنقولدىڭ ناعىز داۋىرلەۋ كەزەڭى تۋادى دەپ سەنەدى.
ايتپاقشى, وسى ساپارىندا اماندىق باتالوۆ نارىنقول اۋىلىندا جاڭادان 50 ءۇي سالىناتىنىن ايتتى. باسپانا قىزمەتكەرلەرگە ارناپ تۇرعىزىلادى. بۇل – اۋدانعا جاستاردى, بىلىكتى مامانداردى تارتۋدىڭ بىرەگەي جولى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
