جازدا سۋپەر ترانسفەر جاساماقشى
انگليانىڭ «مانچەستەر سيتي» كلۋبى جاز مەزگىلىندەگى ترانسفەر ماۋسىمىندا شابۋىل شەبىن توپ فۋتبولشىلارمەن تولىقتىرماق نيەتتە.
شەتەلدىك باسىلىمداردىڭ جازۋىنشا, «مانچەستەر سيتي» جازعى ماۋسىم-ارالىق ۇزىلىستە حارري كەين («توتتەنحەم»), موحاممەد سالاح («ليۆەرپۋل»), نەيمار (پسج) جانە انتۋان گريزمانن («اتلەتيكو») سەكىلدى شەبەر فۋتبولشىلاردى ساتىپ الۋدى جوسپارلاۋدا.
فۋتبولشىلاردىڭ باعاسىن انىقتايتىن Transfermarkt سايتىنىڭ مالىمەتى بويىنشا, كەين مەن سالاحتىڭ نارقى شامامەن – 200, نەيماردىڭ باعاسى 300 ملن ەۋرو. ال «اتلەتيكو مادريد» گريزمان ءۇشىن 100 ملن ەۋرو سۇراپ وتىر. بىراق فرانتسيالىق فۋتبولشى «بارسەلونا» كلۋبىمەن كەلىسىمگە كەلىپ, جازدا كاتالونيالىقتاردىڭ قاتارىنا قوسىلۋى مۇمكىن ەكەنى ايتىلۋدا.
ماكگرەگوردىڭ كەزەكتى ماسقاراسى
جەڭىل سالماقتاعى UFC چەمپيونى يرلانديالىق كونور ماكگرەگوردىڭ دوستارىمەن بىرگە UFC 223 باسەكەسىنىڭ قاتىسۋشىلارى وتىرعان اۆتوبۋسقا شابۋىل جاساعان ارەكەتى الەۋمەتتىك جەلىلەر مەن الەمدىك باسىلىمداردا كەڭىنەن تالقىلانىپ جاتىر.
ۆيدەودان كورگەنىمىزدەي, كونور ءباسپاسوز ءماسليحاتىنا قاتىسىپ, قوناق ۇيگە كەتىپ بارا جاتقان سپورتشىلاردىڭ اۆتوبۋسىنا تاس لاقتىرىپ, كولىكتىڭ تەرەزەسىن سىندىرعان. UFC وكىلىنىڭ جانىنداعى دوستارى دا تەك تۇرماي, اۆتوبۋستىڭ ەكىنشى انەگىن شاعىپ تۇسىرگەن.
UFC پرەزيدەنتى دانا ۋايتتىڭ ايتۋىنشا, جەرگىلىكتى ءتارتىپ ساقشىلارى ماكگرەگورعا ازىرشە مەملەكەتتەن سىرتقا شىعا المايتىنىن ءتۇسىندىرىپ, ودان «قاراقشىلىق» وقيعاسىن تەزىرەك ءتۇسىندىرىپ بەرۋدى تالاپ ەتكەن. سونداي-اق ۋايتتىڭ پىكىرىنشە, ەكى سالماق بويىنشا الەمنىڭ ەكس-چەمپيونىنىڭ ارەكەتى –UFC تاريحىنداعى ەڭ جامان وقيعالاردىڭ ءبىرى. «بۇل UFC تاريحىنداعى ەڭ اۋىر وقيعا. ءتارتىپ ساقشىلارىنا ماكگرەگوردى قاماۋعا الۋعا وردەر بەرىلدى. ايتا كەتەۋ كەرەك, اۆتوبۋستىڭ ىشىندە رەسەيلىك حابيب نۋرماگومەدوۆ تە بولعان.
ەكى مينۋتتا ميلليون دوللار تاپتى
باسكەتبولدان «مايامي حيت» كلۋبى مەن كانادا قۇراماسىنىڭ شابۋىلشىسى كەللي ولينيك ۇبا تۇراقتى چەمپيوناتى اياسىندا «اتلانتى حوكس» كومانداسىنا قارسى ويىن وتكىزىپ, ەكى مينۋتتىڭ ىشىندە ميلليون دوللار تابىسقا كەنەلدى.
باسكەتبولشى مەن كلۋب اراسىنداعى كەلىسىمشارتتا كەللي ولينيك ءبىر ماۋسىمدا 1700 مينۋت الاڭدا ويىن وتكىزەتىن بولسا, كوماندا باسشىلىعى وعان 1 ميلليون دوللار كولەمىندە قارجىلىق سىياقى بەرەتىنى ايتىلعان. بۇل جەتىستىككە جەتۋ ءۇشىن ولينيككە «اتلانتى حوكس» كلۋبىنا قارسى ويىندا الاڭعا نەبارى ەكى مينۋتقا شىقسا جەتكىلىكتى ەدى. بۇل كەزدەسۋگە دەيىن باسكەتبولشى الاڭدا 1698 مينۋت ويىن وتكىزگەن بولاتىن.
كانادالىق شابۋىلشى اتالعان ماتچتا 22 مينۋت الاڭعا شىعىپ, 19 ۇپاي جيناعان. كەزدەسۋ قورىتىندىسى بويىنشا «حيتس» قارسىلاستارىنان 115:86 ەسەبىمەن باسىم تۇسكەن.
رونالدۋدى جەكپە-جەگىنە شاقىردى
ەكىنشى جەڭىل سالماقتاعى WBO بەلبەۋى بويىنشا الەم چەمپيونى, ۋكراينالىق كاسىپقوي بوكسشى ۆاسيلي لوماچەنكونىڭ مەنەدجەرى ەگيس كليماس كريشتيانۋ رونالدۋدى ءۆاسيليدىڭ كەلەسى جەكپە-جەگىنە شاقىرعانىن ايتتى.
«جۋىردا رونالدۋمەن جولىعىپ, ونى جەكپە-جەككە ارنايى شاقىردىق. ول 12 مامىر كۇنى نيۋ-يورك قالاسىنداعى «Madison Square Garden» سپورت كەشەنىندە وتەتىن لوماچەنكو – لينارەس ايقاسىنا كەلۋگە ۋادە بەردى», دەيدى كليماس. ايتا كەتەيىك, بۇعان دەيىن لوماچەنكو پورتۋگاليالىق فۋتبولشىعا بوكس قولعابىن سىيلاعان ەدى.
دايىنداعان
ءالي بيتورە,
«ەگەمەن قازاقستان»
