ال جالپى تەكە تىرەستەگى العاشقى ماتچتى اتاقتى مارين چيليچ پەن دميتري پوپكو باستادى. بۇل ەكى تەننيسشىنىڭ دەڭگەيى جەر مەن كوكتەي ەدى. ويىن باستالماي جاتىپ بولجامشىلار جەڭىستى حورۆات تەننيسشىسى تويلايتىنىن ەش ءشۇباسىز ايتتى. ارينە, الەمنىڭ ءۇشىنشى راكەتكاسى مارين چيليچ جاس تەننيسشى دميتري پوپكوعا كوجەك كورگەن قاسقىرداي اتىلدى. ماتچ باستالىسىمەن جويقىن سوققىلارىمەن بىردەن قارسىلاستى تىقسىرىپ العىسى كەلگەن ءماريننىڭ بۇل ويى ىسكە اسپادى. قازاقستاندىق تەننيسشى ءچيليچتىڭ اۋىر سوققىلارىنا توتەپ بەرىپ, ءتىپتى رەتى كەلگەندە شابۋىلعا دا شىقتى. بىراق, بۇل جاعداي ءبىرىنشى سەتتىڭ 5 گەيمىنە دەيىن عانا جالعاستى. ودان كەيىن ءبىر برەيك جاساپ, قازاقستاندىقتىڭ گەيمىندە جەڭىسكە جەتكەن مارين, ماتچ تىزگىنىن ءوز قولىنا الدى. ءبىرىنىڭ ارتىنان ءبىرىن ەيستەر جاساپ گەيم ارتىنان گەيم, سەت ارتىنان سەت جەڭدى. ناتيجەسىندە 6:2, 6:1, 6:2 ەسەبىمەن چيليچ العاشقى جەڭىستى تىركەپ, حورۆاتيا 1:0 ەسەبىمەن العا وزدى.
اراعا ساعات سالىپ كورتقا حورۆاتيانىڭ تاعى ءبىر مىقتى تەننيسشىسى بورنا چوريچ كەلدى. ونىڭ دا ويى تەك قانا جەڭىس بولاتىن. قارسىلاسى كۋكۋشكيندە كەتكەن ەسەسى بار. مادريدتە ءوتىپ جۇرگەن تۋرنيردە 2 مارتە جەڭىلگەن ەكەن. بىراق, جاس تەننيسشى ودان بەرى بۇعاناسى قاتىپ, بىلەگى سومدالا تۇسكەن. 2018 جىلدىڭ باسىنان بەرى 2-3 جارىستىڭ جارىتىلاي فينالىنا جەتسە كەرەك. «تۇلپارى وزعان ەلدىڭ تايى دا وزار» دەپ ءچيليچتىڭ ءىزىن چوريچ جالعاۋى كەرەك دەپ حورۆات جانكۇيەرلەرى الاقان سوقتى. باستاپقىدا ءبىرىنشى سەتتى بورنا 6:3 ەسەبىمەن جەڭدى. بىراق, ودان كەيىنگى سەتتەردە سەنىمىنەن ايىرىلىپ, راكەتكاسىن جەرگە ۇرىپ, ءوز-ءوزىنىڭ قۇتىن قاشىردى. جاس جىگىتتىڭ جەلىگىپ كەتكەنىن كورگەن كۋكۋشكين تاجىريبيەسىنىڭ ارقاسىندا ءچوريچتىڭ ءالسىز تۇسىن قايتا-قايتا كوزدەي بەردى. ميحايلدىڭ بىردە جوعارى, بىردە تومەن, ءتىپتى كەيدە قىسقا تاستاعان دوپتارىنىڭ بارلىعى ۇپايعا اينالا بەردى. قالعان ءۇش سەتتى ول 7:6, 6:4, 6:2 ەسەبىمەن ۇتتى. تارازى باسى تەڭەسىپ, العاشقى جارىس كۇنى قازاقستان قۇراماسى ءۇشىن ءساتتى اياقتالدى.
ەرتەسىنە جالعىز عانا ويىن جوسپارلاندى. جۇپتاسۋ باسەكەسىندە ءبىزدىڭ قۇرامادا الەكساندر نەدوۆەسوۆ پەن تيمۋر حابيبۋللين ونەر كورسەتتى. ءبىرىنشى سەتتە بۇل ەكەۋى نيكولا مەكتيچ پەن يۆان دوديگتىڭ دەگبىرىن قاشىرىپ, كورتتىڭ تۇبىنە تىعىپ باقتى. ۇلكەن جىلدامدىقپەن بەرگەن سوققىلارى الاڭ يەلەرىن ابىگەرگە سالعانى راس. تاي-برەيكتە نەدوۆەسوۆ ءوز تاجىريبيەسىنە سالىپ, ەسەپتى 7:6 قىلدى. الايدا, ءحابيبۋلليننىڭ جاستىعى, مۇنداي ءىرى قارسىلاستارعا قارسى كوپ ويناماعاندىعى كوپ اسەرىن بەردى. قازاقستاندىق جۇپ قالعان ءۇش سەتتە جەڭىلىپ, ۇپايدى ۋىستان جىبەردى. كەزدەسۋ اياقتالىسىمەن حابيبۋللين سەنىمدى اقتاي المادىم دەپ كوزىنە جاس الدى. ەندى قالعان ەكى كەزدەسۋدە كۋكۋشكين مەن پوپكونىڭ قالاي قيمىلدارىن كورەمىز. جۇپتاسۋدا جەڭىلگەن سوڭ, كەلەسى كەزەڭگە ءوتۋ مۇمكىندىگىمىز كۇرت تومەندەپ كەتتى.
حورۆاتيا – قازاقستان تەننيس ماتچىنداعى ەسەپتى تەڭەستىرگەن ميحايل كۋكۋشكين تىلشىلەر ساۋالىنا جاۋاپ بەردى.
– بىردەن ايتايىن, «دەۆيس كۋبوگىندا» رەيتينگ دەگەن ەسكەرۋسىز قالادى. بورنا چوريچ رەيتينگتە مەنەن الدەقايدا بيىك تۇر. الايدا, بۇل – جەكە سىن ەمەس, بۇل ۇلتتىق قۇراما ويىنى. مۇندا ماعان كومەكتەسەتىن ادامدار كوپ. بۇكىل ەل بولىپ جولىما قاراپ وتىرعاندا, ەشكىمدى جەرگە قاراتقىم كەلمەدى. وسى وي مەنى بۇگىن العا جەتەلەدى.
– جەڭىسكە جەتۋگە نە سەبەپ بولدى؟ قارسىلاسىڭىزدان كۇتكەندەي كۇش كورە الدىڭىز با؟
– ارينە, ويىننىڭ باستاپقى بولىگىندە ول وتە اگرەسسيۆتى وينادى. بىراق, كەيىننەن قۇم توسەنىشىنە جىلدام بەيىمدەلمەگەنىن بايقاتىپ الدى. بورنا ەكەۋمىز ءبىر-ءبىرىمىزدى جاقسى بىلەمىز. ونىڭ ۇستىنە وسى ويىنعا اقش-تاعى جارىستان بىرگە كەلدىك. ول جاقتا حارد توسەنىشتە وينادىق. ال مۇندا جاعداي باسقاشا. كوبىرەك جاتتىعىپ, قول ۇيرەتىپ الدىق. شاماسى, قۇمعا مەن جىلدام ۇيرەنىسكەن سەكىلدىمىن. ونىمەن قوسا ەكىنشى سەتتەگى تاي-برەكتەگى جەڭىسىم ماعان پسيحولوگيالىق جەڭىلدىك جاسادى. ودان كەيىن ءۇشىنشى سەتتىڭ باسىندا ءتىپتى ءاربىر ۇرعان سوققىم ۇپايعا اينالىپ جاتتى.
ءباسپاسوز ءماسليحاتىنا ميحايل كۋكۋشكينمەن بىرگە دياس دوسقاراەۆ تا كەلدى.
– ەكىنشى سەتتە ميحايل ءبىر گەيمدە برەيك جاسادى, الايدا قايتادان وزىنىكىن بەرىپ قويدى. دەگەنمەن, بۇل وقيعا ەكىنشى رەت قايتالانىپ, قارسىلاسىنىڭ گەيمىندە جەڭىسكە جەتكەن كەزدە ءبىز جەڭىسكە سەندىك. قارسىلاس تا شامامەن سول تۇستا سىنىپ قالدى عوي دەيمىن.
– ءبىرىنشى سەتتىڭ 8-گەيمىندە قاتارىنان كوپ قاتەلەسە باستاعان ميحايلگە قانداي اقىل-كەڭەس ايتتىڭىز؟
– بىردەن بايقاعانىم, ميحايل قارسىلاستىڭ توپ-سپين ء(شيىرىپ تاستاعان سوققىلار) سوققىلارىن قايتارا الماي جاتتى. ودان كەيىن سول بۇرىشقا قاتارىنان ەكى رەت ۇرىپ, وڭعا قاراي ءبىر مارتە ۇر دەگەن سەكىلدى اقىلدارىمدى دەر كەزىندە ايتىپ وتىردىم. مەنىڭ نەگىزگى جۇمىسىم سول ەدى. كورتتىڭ تۇبىنە قاراي, ياعني توردان كەيىنشەكتەپ بارىپ سوققىلار جاساۋىن سۇرادىم. سىرت كوز سىنشى عوي, ميحايل كورمەگەن قاتەلىكتەردى ايتىپ تۇردىم.
ەرمۇحامەد ماۋلەن,
«ەگەمەن قازاقستان»
ۆاراجدين (حورۆاتيا)
