مەن ەلباسىنىڭ بۇل يگى باستاماسىن جاستاردىڭ جوعارى ءبىلىم الۋداعى اشىقتىعى مەن جوعارى ساپاسىنا قاراي, سونداي-اق تەحنيكالىق ءبىلىمنىڭ قارىشتاپ دامۋى تۇرعىسىنان قولدايمىن. ونداعى جىل سايىنعى بولىنەتىن 54 مىڭ گرانتقا قوسىمشا 20 مىڭ گرانتتى جانە ونىڭ 11 مىڭىن تەحنيكالىق ماماندىقتارعا قاراي ءبولۋى تەحنيكالىق ءبىلىم بەرەتىن جوعارى وقۋ ورىندارىن مەملەكەت تاراپىنان شىن مانىندەگى قوماقتى قولداۋ دەپ تۇسىنگەن ءجون.
قازىرگى تاڭداعى ءتورتىنشى ونەركاسىپتىك جاڭعىرۋ جاعدايىندا تەحنيكالىق مامانداردى دايارلاۋ, ونىڭ ىشىندە اقپاراتتىق تەحنولوگيا ايدىنىندا روبوتتاندىرۋ سالاسىنىڭ, سونداي-اق نانوتەحنولوگيالار ءداۋىرىنىڭ سالتانات قۇرۋى مەملەكەتىمىزدىڭ ستراتەگيالىق مىندەتتەرى بولىپ تابىلادى. بۇل مەملەكەتىمىزدىڭ جاڭا الەمدەگى باسەكەگە قابىلەتتى بولۋىنا, بولاشاقتاعى قازاقستاندىق ەكونوميكانىڭ قۋاتتى رەسۋرستارىنا اينالاتىن مىڭداعان مامانداردى دايارلاۋعا ۇلكەن مۇمكىندىك اشپاق. سونىمەن بىرگە ەلباسىنىڭ بۇل باستاماسىنىڭ ارقاسىندا بەلگىلى ءبىر دەڭگەيدە ستۋدەنتتەرىمىزدىڭ شەتەلگە وقۋعا بارماي-اق وتاندىق ءبىلىمنىڭ وزىمەن ءبىرشاما بيىكتەردى باعىندىرۋىنا جاعداي تۋعىزباق. وسى ارقىلى ەلىمىزدەگى جوعارى وقۋ ورىندارىنىڭ جۇمىسىنا جاڭا سەرپىن بەرىلىپ, ءبىلىم ساپاسىنىڭ جاقسارۋىنا, وقىتۋشىلاردىڭ بىلىكتىلىگىن ارتتىرۋ مەن ماتەريالدىق-تەحنيكالىق بازانىڭ كۇشەيۋى سياقتى تەتىكتەر جاڭا كەزەڭگە وتەدى. سايكەسىنشە, گرانت يەگەرى, بولاشاق ستۋدەنت تە وتاندىق وقۋ ورىندارىن ويلانباي تاڭدايتىن بولادى. وعان سونداي-اق جوعارى وقۋ ورىندارىنا دەيىنگى ورتا ءبىلىم بەرەتىن ءبىلىم وشاقتارى دا ءوز ۇلەستەرىن قوسۋى كەرەك.
ءالي ابىشەۆ,
اتىراۋ مۇناي جانە گاز ۋنيۆەرسيتەتىنىڭ رەكتورى
اتىراۋ
