جيىنعا «وزەنمۇنايگاز», «ەمبىمۇنايگاز», «قاراجانباسمۇناي» اكتسيونەرلىك قوعامدارى, «قازگەرمۇناي» بىرلەسكەن كاسىپورنى», «كارپوۆسكي سەۆەرنىي», «ۋرال ويل ەند گاز», «سۋ ءوندىرۋ جانە تاسىمالداۋ», «قازاق گاز وڭدەۋ زاۋىتى», «وزەنمۇنايسەرۆيس» جاۋاپكەرشىلىگى شەكتەۋلى سەرىكتەستىكتەرىنىڭ گەولوگ-ماماندارى قاتىسىپ, جەردىڭ قىرتىسى جانە ىشكى قاباتتارى, ولاردىڭ قۇرامى, قۇرىلىسى, قوزعالىسى, دامۋ تاريحى, ورنالاسۋ زاڭدىلىقتارى تۋرالى باياندامالارى مەن سلايدتارىن ۇسىنىپ, قىزۋ تالقىلادى. ولار وزدەرىنىڭ الدىندا كەن ورىندارىن وڭدەۋ, بايىتۋ سياقتى كۇردەلى مىندەتتەر تۇرعاندىعىنا توقتالىپ ءوتتى. جيىنعا گەولوگيا سالاسىنىڭ دامۋىنا, جوعارى دەڭگەيگە كوتەرىلۋىنە تەر توككەن ارداگەر-گەولوگتەر دە قاتىسىپ, وزدەرىنىڭ باي تاجىريبەلەرىمەن ءبولىستى.
كەڭەستىك كەزەڭدە گەولوگ دەسە, كوز الدىمىزعا بالعا مەن جولدوربا ۇستاعان ماماندار ەلەستەيتىن. قازىرگى گەولوگتەر – زاماناۋي كومپيۋتەرلىك جانە عارىشتىق تەحنولوگيالارمەن جابدىقتالعان كاسىپ يەسى. جيىندا ءسوز العان «قازمۇنايگاز» ءبو» اق ءوندىرىس جانە كەن ورىندارىن يگەرۋ جونىندەگى باسقارۋشى ديرەكتور قۋانىشباي نۇرعاليەۆ سالا ماماندارىنا ارنالعان «قازمۇنايگاز» ءبو» اق باس ديرەكتورى قۇرمانعازى ەسقازيەۆتىڭ ارنايى قۇتتىقتاۋ تىلەگىن جەتكىزدى.
«قۇرمەتتى ارىپتەستەر, كاسىبي مەرەكە قۇتتى بولسىن. سىزدەرگە زور دەنساۋلىق, باياندى باقىت, ەڭبەكتەرىڭىزگە جەمىس تىلەيمىن. وتكەن جىلى گەولوگتەر كۇنىن قازاق مۇنايىنىڭ قاراشاڭىراعى «ەمبىمۇنايگازدا» سالتاناتتى اتاپ وتتىك. مىنە, بيىل ءداستۇردى جالعاستىرىپ, گەولوگتەر كۇنىن «وزەنمۇنايگازدا» اتاپ ءوتىپ وتىرمىز.
ءبىر عاسىردان استام تاريحى بار مۇناي-گاز سەكتورى – بۇگىندە ستراتەگيالىق سالانىڭ ءبىرى. سونىڭ ىشىندە مۇناي قورىن ۇلعايتۋ, جاڭا كەن كوزدەرىن تابۋ, سونىمەن قاتار ەلىمىزدەگى ەسكى كەن ورىندارىن قايتا جانداندىرۋ باعىتىنداعى جۇمىستار مۇنايشى گەولوگتەرگە ۇلكەن سەنىم, اۋىر جۇك ارتادى.
سىزدەر جەر قويناۋىن بارلاۋ, مۇناي-گاز قورلارىن كوبەيتۋ, جاڭا كەن ورىندارىن يگەرۋ, ءوندىرىس كولەمىن ارتتىرۋ سياقتى جاۋاپتى مىندەتتەردى ابىرويلى اتقارىپ وتىرسىزدار. سالا ماماندارىنا جۇكتەلگەن جاۋاپكەرشىلىك جۇگى اۋىر, سالماقتى.
سىزدەر ماماندىققا ادالدىق دەگەن قاعيدانى بەرىك ۇستانىپ, بۇل باعىتتاعى جۇمىستاردى تابىستى اتقارۋعا كۇش سالىپ كەلەسىزدەر. ءونىم كولەمىن ۇلعايتۋداعى ىزدەنىستەر, ءتيىمدى گەولوگيالىق-تەحنيكالىق شارالار, وندىرىسكە ەنگىزىلىپ جاتقان جاڭالىقتار ءوز ناتيجەسىن بەرىپ وتىر. كومپانيا وندىرىستىك قىزمەتىندە جەتكەن جەتىستىكتەردە ارقايسىڭىزدىڭ ۇلكەن ۇلەسىڭىز بار. سىزدەردىڭ قاجىرلى قىزمەتتەرىڭىز ءۇشىن باس ديرەكتور قۇرمانعازى ورىنعازى ۇلىنىڭ اتىنان جانە ءوز اتىمنان زور العىسىمدى بىلدىرەمىن. الداعى ۋاقىتتا دا جوعارى جەتىستىكتەرگە جەتە بەرىڭىزدەر», دەدى ق.نۇرعاليەۆ.
كاسىبي مەرەكەگە وراي ەڭبەگىمەن ەلەنگەن مۇنايشى گەولوگتەر قۇرمەت گراموتالارى جانە العىس حاتتارمەن ماراپاتتالدى.
راسبەرگەن ماحمۇدوۆ,
«قازمۇنايگاز»بارلاۋ ءوندىرۋ» اق گەولوگيا جانە كەن ورىندارىن يگەرۋ دەپارتامەنتى ديرەكتورىنىڭ ورىنباسارى:
– بيىلعى جىلى كاسىبي مەرەكەگە بايلانىستى «قازمۇنايگاز»بارلاۋ ءوندىرۋ» اكتسيونەرلىك قوعامىنا قاراستى مەكەمەلەردىڭ گەولوگتەر قاۋىمى كاسپي تەڭىزى جاعاسىندا ورنالاسقان «كەندىرلى» مەكەنىندە باس قوسىپ سەمينار وتكىزدى. 2017 جىلى ورىندالعان جۇمىس باعدار-لاماسىنا تالداۋ جاسالىپ, قول جەتكەن جەتىستىكتەردى ورتاعا سالىپ, الداعى بولاشاقتا جاسالاتىن جوسپارلار ايقىندالدى. مۇناي-گاز سالاسىندا گەولوگتەر كوپتەگەن باعىتتاردا قىزمەت اتقارادى. ولار مۇناي-گاز قورلارىن ىزدەستىرۋ, بارلاۋدان باستاپ, مۇناي مەن گاز كەنىشتەرىن يگەرۋ, ءوندىرۋ پروتسەسىندە مۇناي-گاز قورلارىن تولىقتىرۋ جانە ەڭ سوڭعى كەزەڭدە مۇناي-گاز قورلارى تاۋسىلعان كەزدە كەنىشتەردى جويۋ جۇمىستارىنا قاتىسادى.
مۇناي-گاز قورلارىن تولىقتىرۋ گەولوگتەر ءۇشىن ماڭىزدى مىندەت. وسى كورسەتكىشتە 2017 جىلى «وزەنمۇنايگاز» اق گەولوگتەرى تابىسقا قول جەتكىزىپ, وزەن-قاراماندىباس كەنىشتەرىندەگى مۇناي قورىن 6,8 ملن تونناعا ءوسىردى. بۇل كورسەتكىش ءبىر جىلدىق مۇناي ءوندىرۋ كولەمىنەن اسىپ ءتۇستى. «ەمبىمۇنايگاز» اق گەولوگتەرى دە ايتارلىقتاي جاقسى تابىستارعا جەتتى. مۇناي-گاز قورلارىن تولىقتىرۋ 2,9 ملن توننادان استى. بۇل كورسەتكىشتە «ەمبىمۇنايگاز» اق ءبىر جىلدىق مۇناي ءوندىرۋ كولەمىنەن اسىپ ءتۇستى. «كەندىرلىدە» وتكەن سەميناردا كوپتەگەن گەولوگتەر قول جەتكىزگەن تابىستارى ءۇشىن العىس حاتتار جانە قۇرمەت گراموتالارىمەن ماراپاتتالدى.
بولاشاقتا الدا تۇرعان مىندەتتەردىڭ ءبىرى – جۇرگىزىلگەن ءۇش ولشەمدى سەيسميكالىق بارلاۋ جۇمىستارىنىڭ ناتيجەسىندە وزەن-قاراماندىباس ايماعىندا جانە قاراتون تۇز استى قۇرىلىمىندا 6000 مەتر تەرەڭدىككە پالەوزوي قاباتىنا ۇڭعىمالار بۇرعىلاۋ جۇمىستارىن ءساتتى ىسكە اسىرۋ جانە «وزەنمۇنايگاز» اق پەن «ەمبىمۇنايگاز» اق مۇناي-گاز قورلارىن ەسەلەپ تولىقتىرۋ.
بارلىق ارىپتەستەرىمە الداعى ۋاقىتتا دا جوعارى جەتىستىكتەر تىلەيمىن.
ايناگۇل مۇستاجانوۆا,
«ەمبىمۇنايگاز» اق «قاينارمۇنايگاز» مگوب كەنباي مۇناي جانە گاز ءوندىرۋ تسەحىنىڭ گەولوگى:
– «وزەنمۇنايگاز» اق-تا گەولوگتەر كۇنى جاقسى ءوتتى, ۇيىمداستىرۋى, قارسى الۋى ءبارى بىزگە ۇنادى. وتكەن جىلى «ەمبىمۇنايگازدا» وتكەندە ولار اتىراۋعا كەلگەن بولاتىن. جيىن بارىسىندا گەولوگيا سالاسىنداعى بۇگىنگى جەتىستىكتەر مەن الداعى جوسپارلار ءسوز بولدى. ماراپاتتالعاندار دا كوپ بولدى, سونىڭ ىشىندە ءوزىم دە «قازمۇنايگاز» ءبو» اق-تىڭ قۇرمەت گراموتاسىن يەلەندىم. ارىپتەستەرىممەن ءوزارا پىكىر الماسىپ, جەر كورىپ ءارى ماراپات الىپ مارقايىپ قايتتىق. مەرەكە قۇتتى بولسىن!
جەڭىس باعىتوۆ,
«ەمبىمۇنايگاز» اق «جىلىويمۇنايگاز» مگوب پرورۆا كەن ورنىن يگەرۋ توبىنىڭ ونىدىرىستىك باسقارماسىنىڭ گەولوگى:
– وزەندە گەولوگتەردىڭ باس-قوسۋى جاقسى ءوتتى. جەر استى قويناۋىن بارلاپ, مۇنايدى تاباتىن گەولوگتەر. سول باعىتتا كوپتەگەن العىس, جىلى لەبىزدەر ايتىلدى. اسىرەسە ا.ساحيەۆ, ا.وتەسىنوۆ سىندى ەڭبەك ارداگەرلەرىنىڭ «مۇنايدىڭ كوپ بولۋى گەولوگتەرگە دە بايلانىستى. كوپ وقىپ, كوپ ىزدەنىڭدەر. قازىرگى تالاپ باسقا. جاڭا تەحنولوگيالاردى وندىرىسكە ەنگىزۋ كەرەك. سوعان وراي ىزدەنۋدەن تالماڭىزدار» دەپ ايتقان وسيەتتەرى كوڭىلگە قونىمدى. سول باعىتتا ەڭبەك ەتىپ كەلەمىز. «قازمۇنايگاز» ءبو» اق-تىڭ العىس حاتىن العانىم مەنى قاناتتاندىرعانى دا راس. گەولوگتەردىڭ ەڭبەگى ءاردايىم ەلەنە بەرسىن!
گۇلايىم شىنتەمىرقىزى,
«ەگەمەن قازاقستان»
