دارىسكە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جۋرناليستيكا جانە ساياساتتانۋ فاكۋلتەتىنىڭ 40-قا جۋىق ستۋدەنتى قاتىستى. الەۋمەتتىك جەلى قولدانۋشىلارى دا ساباقتى ونلاين كورۋگە مۇمكىندىك الدى.
ءدارىستى «قازاقپارات» حالىقارالىق اقپاراتتىق اگەنتتىگى باس ديرەكتورى اسقار وماروۆ جۇرگىزدى. كەزدەسۋ بارىسىندا بۇگىنگى جۋرناليستيكانىڭ جاي-كۇيى, اقپارات تاراتۋ تۋرالى ماسەلەلەر ءسوز بولدى.
«قازىرگى كەزدە اقپارات سالاسى وزگەرىپ بارادى. قازىر الەۋمەتتىك جەلى قولدانۋشىلارى دا اقپارات تاراتۋشى, نيۋسماكەر بولا الادى. بىرىنشىدەن, سونىڭ اسەرىنەن جالعان اقپارات سانى دا ارتا ءتۇستى. ەكىنشىدەن, قوعامعا تاعى ءبىر قاۋىپتى جاعداي تۋدى, مەن مۇنى «حايپوكراتيا» دەپ اتايمىن. مىسالى ءبىر شەشىمگە كەدەرگى جاسايمىن دەسەڭ, بىرەۋگە تروللينگ شابۋىل ۇيىمداستىرساڭىز جەتىپ جاتىر. حايپ باستالسا, وسىنىڭ ارقاسىندا ءبىراز شەشىم قابىلداۋعا بولادى. مىسالى جاقىندا الماتىداعى رەستوراندا بولعان جاعداي دا وسى «حايپتىڭ» ءبىر كورىنىسى. بۇل قوعامعا وتە قاۋىپتى جاعداي. سەبەبى وسىنىڭ كولەڭكەسىندە ءبىرشاما بىلىقتى ۇيىمداستىرۋعا بولادى. سوندىقتان قازىر قازاق جۋرناليستيكاسىنىڭ دارەجەسى وتە ماڭىزدى. جاقىندا فرانتسيادا جالعان اقپاراتقا قارسى زاڭ قارالدى. سوندىقتان وسى ولقىلىقتى بولدىرماۋ ءۇشىن قازىرگى جۋرناليست نيۋسماكەر عانا ەمەس, ترەندسەتتەر بولۋى كەرەك» دەدى.
سونداي-اق, اسقار وماروۆ «قازاقپارات» حاا اگەنتتىگىنىڭ جۇمىسى, جەدەل ءارى سەنىمدى اقپارات تاراتۋ تۋرالى اقپاراتپەن ءبولىستى.
سونىمەن قاتار, جاس جۋرناليستەر الەۋمەتتىك جەلى جانە جالعان اقپارات, جۋرناليستيكا توڭىرەگىندە سۇراقتار قويىپ, ءوز پىكىرلەرىن ورتاعا سالدى.
ءمادينا جالەلقىزى,
«ەگەمەن قازاقستان»
سۋرەتتى تۇسىرگەن ورىنباي بالمۇرات
