قاراتوبەنىڭ قيانداعى قالدىعايتى اۋىلىندا تۋىپ-وسكەن رافحات فوتو الەمىمەن العاش 11 جاسىندا تانىسىپتى. 4 سىنىپتىڭ وقۋشىسى اكەسى ساتىپ الىپ بەرگەن «سمەنا-8» فوتواپپاراتىن قولىنا الىپ, الەمدى وبەكتيۆ ىشىنەن كورۋدى داعدىعا اينالدىرعالى بەرى قايتالانباس قانشا ءسات تاسپاعا تاڭبالاندى دەسەڭىزشى. بۇگىندە ۋاقىت ءمۇجىپ, تامتىعى عانا قالعان ءحىح عاسىر ەسكەرتكىشى – جۇمىر-ساسىق مازارىنىڭ وتىز جىل بۇرىنعى وڭدىلاۋ كورىنىسىن حاتتاپ قالعان دا – رافحات.
رافحاتتىڭ ءوز ونەرىنە ادالدىعى كەرەمەت. ءاۋ باستان-اق ول فوتوسۋرەتشىلىكتى كاسىپ ەمەس, ونەر دەپ قابىلداعان سياقتى. ايتپەسە وتپەلى كەزەڭنىڭ سىناعى تالاي جاندى تەنتىرەتىپ جىبەرگەنى, ونەر ءبىر جاقتا, ءومىر ءبىر جاقتا قالعانى راس قوي. رافحات بولسا «سمەناسىن» اسكەردە دە قولىنان تاستاماپتى. ءساتتى كادرىنىڭ سيپاتتاماسىن ەكى-ءۇش اۋىز سوزبەن قاعازعا ءتۇسىرىپ بەرەتىن قابىلەتى رەداكتسيالاردىڭ دا كوڭىلىنەن شىقتى. ءسويتىپ اۋەلى تۇسىرگەن سۋرەتى توپقا كىرگەن رافحات كوپ كەشىكپەي ءوزى دە ورالعا كەلىپ, ۇلكەن ورتاعا ارالاستى.
راسى كەرەك, حح عاسىردىڭ سوڭعى جىلدارى ورالدا كاسىبي فوتوگرافتاردىڭ دەنى وزگە ۇلت وكىلدەرى ەدى. فوتوگرافيا – اقسۇيەك ونەر سانالاتىن. قانداس فوتوسۋرەتشىلەر كوبىنە توي-تومالاقتىڭ اينالاسىندا جۇرەتىن. وسى كەزدە ورالدىڭ فوتوەليتاسىنا اۋىلدان كەلگەن اقجۇرەك رافحات قوسىلدى. سول ءبىر ءوزىن-ءوزى دالەلدەۋ, سىناق جىلدارى جولىن اشقان, كومەك كورسەتكەن, قولداۋ بىلدىرگەن جانداردى كەيىپكەرىمىز ءالى كۇنگە اۋزىنان تاستامايدى.
– ەڭ العاش قىمبات باعالى كاسىپقوي فوتواسپاپتى الماتىدا «ارىس» قورىنىڭ پرەزيدەنتى, بەلگىلى عالىم عاريفوللا انەس سىيعا تارتقاندا توبەم كوككە ءبىر ەلى جەتپەي قالدى! – دەيدى ول. ال 2000 جىلى رافحات حالەلوۆتىڭ «جاڭا عاسىر – جاڭا ءداۋىر» فوتوكورمەسىنە كەلگەن سول كەزدەگى وبلىس باسشىسى قىرىمبەك كوشەرباەۆ كەرەمەت سۋرەتتەردىڭ كونەتوز, ءارتۇرلى راما-جاقتاۋدا تۇرعانىن كورىپ, جەرگىلىكتى دەپۋتاتتار مەن كاسىپكەرلەرگە: «رافحاتقا كومەكتەسسەڭدەر قايتەدى؟!» دەپتى. اكىمنىڭ وسىناۋ ءبىر اۋىز ءسوزى اجەپتاۋىر قولداۋ بولعان.
رافحات حالەلوۆ كۇندەلىكتى ساياسي-مادەني ءومىردىڭ سورپاسىندا قايناپ جۇرسە دە ماڭگىلىك ونەر ميسسياسىن ۇمىتپايدى. ءومىردىڭ ولمەس ساتتەرىنەن تۇراتىن فوتوسۋرەتتەردەن ءجيى-ءجيى كورمە جاسايدى. رافحاتتىڭ فوتوكورمەلەرى بۇعان دەيىن ورال قالاسىندا بىرنەشە مارتە ۇيىمداستىرىلسا, ودان بولەك قازاقستان, قىتاي, رەسەي قالالارىندا 15 مارتە جەكە كورمەسى ءوتىپتى. قازاقستاننىڭ حالىق اقىنى قادىر مىرزا الىگە ارنالعان جەكە كورمەسىن دە استانا, الماتى, ورال قالالارىندا قىزىعا تاماشالاۋشى كوپ بولدى.
مىنە, رافحاتتىڭ « ۇلى دالادان ەسكەن سامال جەل» اتتى جاڭا ءبىر كوشپەلى كورمەسى ورالدىقتاردىڭ كوزايىمىنا اينالىپ ۇلگەردى. ورال قالالىق كورمە ۇيىندەگى 70 سۋرەت كەيىن قالا مەكتەپتەرىن ارالاپ كەتپەك. سىناپتاي سىرعىپ ءوتىپ جاتقان ءومىردىڭ ءار ءساتىنىڭ قۇنىن ۇقتىراتىن قۇندى جۇمىستاردىڭ اۆتورى فوتواپپاراتىن سىرتىلداتىپ, ارامىزدا ءجۇر. امان بولسىن, اسىل ازامات!
قازبەك قۇتتىمۇرات ۇلى,
«ەگەمەن قازاقستان»
ورال
