ۇسىنىلعان جوبالارعا قوعام قايراتكەرلەرى, پارلامەنت ءماجىلىسىنىڭ دەپۋتاتتارى, ۇكىمەتتىك ەمەس ۇيىمداردىڭ وكىلدەرىنەن قۇرىلعان ارنايى كوميسسيا باعا بەرىپ, جىلدىڭ گرانت يەلەرىن انىقتايدى. وتكەن جىلى گرانتتى جوبالاردى جۇزەگە اسىرۋعا 618,5 ملن تەڭگە ءبولىنىپ, 57 جوبا وڭ ناتيجە كورسەتكەن. سونىڭ ىشىندە 39 الەۋمەتتىك قىزمەتتەر قۇرىلىپ, اقپارات, ءبىلىم, كەڭەس بەرۋ جانە الەۋمەتتىك قىزمەتتەر كورسەتۋ جاندانعان. بۇعان قوسا, 35 زەرتتەۋ, 400-گە جۋىق وقىتۋ شارالارى جۇرگىزىلىپ, بۇل باستامالارعا 39 ۇلتتىق جانە 7 حالىقارالىق ساراپشىلار تارتىلعان.
ءدىن ىستەرى جانە ازاماتتىق قوعام مينيسترلىگى بيىل 956 ملن تەڭگەگە 11 باعىت بويىنشا 87 جوبانى جۇزەگە اسىرۋدى كوزدەپ وتىر. وعان قاتىسۋعا 202 ۇكىمەتتىك ەمەس ۇيىمنان 352 ءوتىنىش كەلىپ تۇسكەن. سونىڭ ىشىندە 251-ءى قابىلدانىپ, قالعان 176,5 ملن تەڭگە كولەمىندەگى 23 گرانت بويىنشا بايقاۋدىڭ قورىتىندىسى تاياۋدا انىقتالماق.
مەملەكەتتىك گرانتقا ۇسىنىلعان جوبالاردىڭ ىشىندە جاستاردى اسكەري-پاتريوتتىق تاربيەلەۋ بويىنشا شارالار كەشەنىن وتكىزۋ, جاس جازۋشى-اقىنداردىڭ جانە جۋرناليستەردىڭ شىعارماشىلىق الەۋەتىن دامىتۋ, كاملەتكە تولماعان بالالارمەن جۇمىس بويىنشا الەۋمەتتىك قىزمەت قۇرۋ, اۋىلدى ايماقتارداعى تۇرعىنداردىڭ قاجەتتىلىكتەرى مەن مۇقتاجدىقتارىن انىقتاۋ سىندى ماسەلەلەر نازاردا بولماق.
بىزدە ۇكىمەتتىك ەمەس ۇيىمدارعا ارنالعان مەملەكەتتىك الەۋمەتتىك تاپسىرىستار مەن مەملەكەتتىك گرانتتار رەسپۋبليكا دەڭگەيىندە جۇرگىزىلىپ كەلەدى. وعان ارنايى قۇرىلعان كوميسسيا بەكىتىلگەن شارتتار بويىنشا تالداۋ جاساپ, شەشىم شىعارادى. تاپسىرىستار مەن گرانتتارعا ۇسىنىلعان جوبالاردىڭ باعا جۇيەسى بىردەي. ايىرماشىلىعى سول, مۇندا گرانتتىق جوبالاردى جەڭىپ العان ۇيىمدار تۇيتكىلدى ماسەلەلەردى شەشۋدىڭ ناقتى جولدارىن قاراستىرۋى ءتيىس. سونداي-اق گرانتتىق جوبانى جۇزەگە اسىرۋمەن قاتار, بولىنگەن قاراجاتتىڭ 10 پايىزىن ۇيىمنىڭ دامۋىنا جۇمساۋعا مۇمكىندىك تۋىپ وتىر. «بيىل 15 تاقىرىپ بويىنشا 50-گە جۋىق جوبانى قارادىم. ساپا جاعىنان ايتارلىقتاي ىلگەرىلەۋشىلىك بار», دەدى پارلامەنت ءماجىلىسىنىڭ دەپۋتاتى, كوميسسيا توراعاسى سەرىك تۇرار ۇلى.
ەركەجان ايتقازى,
«ەگەمەن قازاقستان»
